പ്രമുഖ സ്മാര്‍ട്ട്‌ഫോണ്‍ നിര്‍മ്മാതാക്കളായ ഷവോമി പോകറ്റില്‍ വെയ്ക്കാവുന്ന കുഞ്ഞന്‍ സ്പീക്കര്‍ പുറത്തിറക്കി. എം.ഐ സ്പീക്കര്‍2 എന്ന് പേരിട്ടിരിക്കുന്ന സ്പീക്കര്‍ എം.ഐ സ്പീക്കര്‍ എന്ന മുന്‍ മോഡലിന്റെ പിന്‍മുറക്കാരനാണ്.
കറുപ്പ്, വെളുപ്പ് എന്നിങ്ങനെ രണ്ട് നിറങ്ങളില്‍ ലഭ്യമാവുന്ന സ്പീക്കറിന്റെ വില 1,499 രൂപയാണ്.
1200 മില്ലി ആമ്പിയറിന്റെ ബാറ്ററിയാണ് ഈ കീശയില്‍ ഒതുക്കാവുന്ന സ്പീക്കറിലുത്. ഇതുവഴി ഏഴ് മണിക്കൂര്‍ വരെ സമയം ബാറ്ററി പ്രവര്‍ത്തിപ്പിക്കാന്‍ സാധിക്കുമെന്നാണ് കമ്പനി അവകാശപ്പെടുന്നത്.
ഫോണ്‍ കോളുകള്‍ സ്വീകരിക്കുന്നതിനും, സംഗീതം നിയന്ത്രിക്കുന്നതിനും സ്പീക്കറില്‍ തന്നെ സ്വിച്ചുകളുണ്ട്. മറ്റ് സമാന സ്പീക്കറുകളില്‍ നിന്നും എം.ഐ പോക്കറ്റ് സ്പീക്കറിനെ വ്യത്യസ്തമാക്കുന്നത് ഇതില്‍ മൈക്ക് കൂടി ഉണ്ട് എന്നതാണ്. പല കുഞ്ഞന്‍ സ്പീക്കറുകളിലും ഇല്ലാത്ത സംവിധാനമാണിത്. ഇതുവഴി ഫോണ്‍ കോളുകള്‍ സ്വീകരിക്കാനും സംസാരിക്കാനും സാധിക്കും.
ആന്‍ഡ്രോയിഡ്, ഐഫോണുകളുമായി സ്പീക്കര്‍ ബ്ലൂടുത്ത് വഴി കണക്ട് ചെയ്യാം. ബ്ലൂടുത്ത് 4.1 ടെക്‌നോളജി ആണ് സ്പീക്കറിലുള്ളത്.
ഇതിന്റെ ഡിസൈനും വളരെ മികച്ചതാണ്. അലൂമിനിയം ഉപയോഗിച്ച് നിര്‍മ്മിച്ച സ്പീക്കറിന് പ്രീമിയം ലുക്ക് ഉണ്ട്. ഷവോമിയുടെ ഔദ്യോഗിക വെബ്‌സൈറ്റായ Mi.comലൂടെ ആളുകള്‍ക്ക് ഈ സ്പീക്കര്‍ വാങ്ങാന്‍ സാധിക്കും.