ന്യൂദല്‍ഹി: ബോളിവുഡ് നടി രാഖി സാവന്തിന്റെ വിവാഹത്തില്‍ ഇസ്‌ലാമിനെതിരെ ആരോപണവുമായി ബംഗ്ലാദേശി എഴുത്തുകാരി തസ്‌ലിമ നസ്രിന്‍.
മുസ്‌ലീമായ ഒരാളെ വിവാഹം കഴിച്ചതിന്റെ പേരില്‍ രാഖി സാവന്തിന് പോലും ഇസ്ലാം മതം സ്വീകരിക്കേണ്ടി വന്നെന്നും മുസ്‌ലിങ്ങളും അമുസ്‌ലിങ്ങളും തമ്മിലുള്ള വിവാഹം അംഗീകരിക്കാന്‍ മറ്റു മതങ്ങളെപ്പോലെ ഇസ്‌ലാമിനും കഴിയേണ്ടതുണ്ടെന്നുമായിരുന്നു തസ്‌ലിമ നസ്രിന്റെ പ്രതികരണം. സുഹൃത്ത് ആദില്‍ ഖാനുമായുള്ള രാഖി സാവന്തിന്റെ വിവാഹ വാര്‍ത്തയിലായിരുന്നു തസ്‌ലിമയുടെ പ്രതികരണം.
‘ രാഖി സാവന്തിന് പോലും ഇസ്ലാം മതം സ്വീകരിക്കേണ്ടി വന്നത് അവര്‍ മുസ്‌ലീമായ ഒരാളെ വിവാഹം കഴിച്ചതുകൊണ്ടാണ്. മറ്റ് മതങ്ങളെപ്പോലെ ഇസ്ലാം മതവും മുസ്‌ലീങ്ങളും അമുസ്‌ലീങ്ങളും തമ്മിലുള്ള വിവാഹങ്ങള്‍ അംഗീകരിക്കണം,’ എന്നായിരുന്നു തസ്‌ലിമയുടെ ട്വീറ്റ്.
Even Rakhi Sawant had to convert to Islam because she married a man who happened to be a Muslim. Like other religions Islam must be evolved and accept marriages between Muslims and non-Muslims.
— taslima nasreen (@taslimanasreen) January 12, 2023
‘ഇസ്ലാം പരിണമിക്കണം. വിമര്‍ശനാത്മക പരിശോധന നടത്തണം. സംസാര സ്വാതന്ത്ര്യം, പ്രവാചക കാര്‍ട്ടൂണുകള്‍, സ്ത്രീ സമത്വം, നിരീശ്വരവാദം, മതേതരത്വം, യുക്തിവാദം, മുസ്‌ലീങ്ങളുടെ അവകാശങ്ങള്‍, മനുഷ്യാവകാശങ്ങള്‍, നാഗരികത എന്നിവയെ അംഗീകരിക്കാന്‍ തയ്യാറാകണം. അല്ലാത്തപക്ഷം ആധുനിക സമൂഹത്തില്‍ സ്ഥാനമുണ്ടാകില്ല, എന്നായിരുന്നു മറ്റൊരു ട്വീറ്റില്‍ തസ്‌ലിമ നസ്രിന്‍ കുറിച്ചത്.
Islam must be evolved and accept critical scrutiny, free speech, prophet’s cartoons, women’s equality, atheism, secularism, rationalism, non-Muslim’s rights, human rights, civilization etc. Otherwise it will have no place in the modern society.
— taslima nasreen (@taslimanasreen) January 12, 2023
കഴിഞ്ഞ ദിവസമായിരുന്നു രാഖി സാവന്തിന്റെയും ആദില്‍ ഖാന്റെയും വിവാഹ ഫോട്ടോകള്‍ സോഷ്യല്‍ മീഡിയയിലൂടെ പുറത്തു വന്നത്. രാഖി സാവന്ത് തന്നെ അവരുടെ സോഷ്യല്‍ മീഡിയ പേജ് വഴി വിവാഹ ഫോട്ടോകള്‍ പങ്കുവെക്കുകയും ചെയ്തിരുന്നു.
