സൂററ്റ് : ഇന്ത്യ- ദക്ഷിണാഫ്രിക്ക വനിത ടി20 പരമ്പരയിലെ മൂന്നാം മത്സരവും മഴ കാരണം ഉപേക്ഷിച്ചു. രാത്രി ഏഴിന് നടക്കേണ്ട മത്സരമാണ് മുടങ്ങിയത്. അഞ്ച് മത്സരങ്ങളുടെ പരമ്പരയില്‍ ഇതുവരെ ഒരു ടി20 മാത്രമാണ് നടന്നത്. അതില്‍ ഇന്ത്യ വിജയിക്കുകയും ചെയ്തു.

മത്സരത്തിന് ടോസിടാന്‍ കൂടി സാധിച്ചില്ല. രണ്ടാം മത്സരത്തിനും ടോസിടാന്‍ കഴിഞ്ഞിരുന്നില്ല. ആദ്യ മത്സരത്തില്‍ ദീപ്തി ശര്‍മ്മയുടെ മൂന്ന് വിക്കറ്റ് വീഴ്ത്തിയ പ്രകടനത്തോടെയായിരുന്നു ഇന്ത്യയുടെ വിജയം.
ടോസ് നഷ്ടപ്പെട്ട് ആദ്യം ബാറ്റ് ചെയ്ത ഇന്ത്യ എട്ട് വിക്കറ്റിന് 130 റണ്‍സെടുത്തപ്പോള്‍ മറുപടി ബാറ്റിംഗില്‍ ദക്ഷിണാഫ്രിക്ക 119 ന് പുറത്തായി.

അവസാന മത്സരങ്ങള്‍ക്കുള്ള ടീമിനെ ഇന്നു പ്രഖ്യാപിക്കും. ലോകകപ്പ് വരാനിരിക്കെ ബാറ്റിംഗ് താരങ്ങളുടെ ഫോമില്‍ ഇന്ത്യക്ക് ആശങ്കയുണ്ട്.