നിലവില്‍ വന്ന് കുറച്ച് കാലത്തിനകം ജനപ്രിയമായ മെസ്സേജിങ്ങ് ആപ്ലിക്കേഷനാണ് വാട്സ്ആപ്പ്. തുടര്‍ന്ന് ഫേസ്ബുക്ക് ഉടമകള്‍ സ്വന്തമാക്കിയ വാട്‌സ്ആപ്പിന്റെ സേവനം ചില സ്മാര്‍ട്ട് ഫോണില്‍ നിന്നും ഡിസംബര്‍ 31ന് ശേഷം നിര്‍ത്തലാക്കാന്‍ തീരുമാനിച്ചിരിക്കുകയാണ് ഉടമസ്ഥരായ ഫേസ്ബുക്ക്.
വിന്‍ഡോസ് ഫോണ്‍ 8.0, ബ്ലാക്‌ബെറി 10, ബ്ലാക്‌ബെറി ഒ.എസ്, അതിനും മുമ്പേയുള്ള ഒ.എസുകള്‍ എന്നിവ ഉപയോഗിക്കുന്ന സ്മാര്‍ട്ട് ഫോണുകളിലാണ് കമ്പനി വാട്‌സ്ആപ്പിന്റെ സേവനം അവസാനിപ്പിക്കാന്‍ തീരുമാനിച്ചിരിക്കുന്നത്.
ഡിസംബറിന് ശേഷം നോക്കിയ എസ് 40 യിലും വാട്സ്ആപ്പ് ലഭിക്കില്ല. ആന്‍ഡ്രോയ്ഡ് 2.3.7 നു മുമ്പുള്ള പതിപ്പുകളില്‍ 2018 ഫെബ്രുവരി ഒന്നിനുശേഷവും വാട്സ്ആപ്പ് ലഭിക്കില്ലെന്നും അധികൃതര്‍ അറിയിച്ചു.
ആന്‍ഡ്രോയ്ഡ് 4.0, ഐ.ഒ.എസ് 7 ന്ശേഷവും വിന്‍ഡോസ് ഫോണ്‍ 8.1 നു ശേഷവുമുള്ള ഫോണുകള്‍ ഉപയോഗിക്കുകയോ, അപ്ഗ്രേഡ് ചെയ്യുകയോ വേണമെന്ന് വാട്സ്ആപ്പ് അധികൃതര്‍ വ്യക്തമാക്കിയിട്ടുണ്ട്.
ഇത്തരം ഫോണുകളില്‍ തുടരാന്‍ ഞങ്ങള്‍ ആഗ്രഹിക്കുന്നില്ല എന്നാണ് അധികൃതര്‍ വ്യക്തമാക്കിയത്. ഭാവിയില്‍ വാട്സ്ആപ്പ് വികസിപ്പിക്കുന്നതിന് ആവശ്യമായ സംവിധാനങ്ങള്‍ ഈ ഫോണുകളില്‍ ഇല്ലാത്തതാണ് സേവനം അവസാനിപ്പിക്കാന്‍ അധികൃതര്‍ തീരുമാനിച്ചിരിക്കുന്നത്.