ജംഷഡ്പൂര്‍: ഇന്ത്യന്‍ സൂപ്പര്‍ ലീഗില്‍ ഇനി നടക്കുന്ന എല്ലാ മത്സരങ്ങളും അക്ഷരാര്‍ത്ഥത്തില്‍ ക്വാളിഫയറിനു തുല്ല്യമാണ്. പട്ടികയില്‍ അവസാന സ്ഥാനത്തുള്ള ടീമിനെയൊഴിച്ച് മറ്റുള്ളവര്‍ക്കെല്ലാം ഇപ്പോഴും പ്ലേ ഓഫ് സാധ്യതകള്‍ നിലനില്‍ക്കുന്നുണ്ട്. ഇന്നലെ നടന്ന ജംഷഡ്പൂര്‍ എഫ്.സി -നോര്‍ത്ത് ഈസ്റ്റ് യുണൈറ്റഡ് മത്സരത്തില്‍ ഇതിന്റെ എല്ലാ വീറും വാശിയും നിറഞ്ഞ് നിന്നിരുന്നു.
മത്സരത്തില്‍ നോര്‍ത്ത് ഈസ്റ്റിനെ എതിരില്ലാത്ത ഒരു ഗോളിനു തകര്‍ത്ത് ജംഷഡ്പൂര്‍ എഫ്.സി പ്ലേ ഓഫ് സാധ്യതകള്‍ നിലനിര്‍ത്തുകയും ചെയ്തു. മത്സരത്തിന്റെ 51 ാം മിനിറ്റില്‍ വെല്ലിംഗ്ടണ്‍ പ്രയോറി ബൈസിക്കിള്‍ കിക്കിലൂടെ നേടിയ ഗോളാണ് ജംഷഡ്പൂരിനെ വിജയത്തിലേക്ക് നയിച്ചത്. മത്സരത്തിലുട നീളം മികച്ച പ്രകടനം കാഴ്ചവെച്ച പ്രയോറിയാണ് കളിയിലെ താരവും.
നോര്‍ത്ത് ഈസ്റ്റ് താരങ്ങളെ മനോഹരമായ ഡ്രിബിള്‍ ചെയ്ത് മുന്നേറിയ താരം പലപ്പോഴും എതിരാളികളില്‍ നിന്നു പന്തു റാഞ്ചിയെടുക്കുകയും ചെയ്തു. ഇന്നലത്തെ മത്സരത്തോടെ 15 മത്സരങ്ങളില്‍ ഏഴു ജയങ്ങള്‍ക്കു പുറമെ നാലു സമനിലകളും നാലുതോല്‍വികളുമായി സ്റ്റീവ് കോപ്പലിന്റെ ടീം മുന്നേറിയത്.
അതേ സമയം സീസണിലെ ഒന്‍പതാം തോല്‍വിയായിരുന്നു നോര്‍ത്ത് ഈസ്റ്റ് യുണൈറ്റഡ് ഇന്നലത്തെ മത്സരത്തില്‍ ഏറ്റുവാങ്ങിയത്. 14 കളികളില്‍ നിന്നു മൂന്നു ജയവുമായി ഒന്‍പതാം സ്ഥാനത്താണ് നോര്‍ത്ത് ഈസ്റ്റ്.
പ്രയോറിയുടെ പ്രകടനത്തിന്റെ വീഡിയോ കാണാം: