റെഡ് ബോളില്‍ തനിക്ക് ഏറ്റവും ഇഷ്ടപ്പെട്ട ബൗളറെ കുറിച്ച് സംസാരിക്കുകയാണ് മുന്‍ പാകിസ്ഥാന്‍ താരം വസീം അക്രം. വെസ്റ്റ് ഇന്‍ഡീസിന്റെ മുന്‍ സ്റ്റാര്‍ ബൗളര്‍ മാല്‍ക്കം മാര്‍ഷലിനെയാണ് വസീം അക്രം തെരഞ്ഞെടുത്തത്.

‘ഞാന്‍ ഒരുപാട് മികച്ച ബൗളര്‍മാരെ കണ്ടിട്ടുണ്ട്, എന്റെ കാലത്ത് അവരില്‍ പലരും ക്രിക്കറ്റ് ലോകം ഭരിച്ചവരാണ്. എനിക്ക് ഏറ്റവും പ്രിയപ്പെട്ടത് മാല്‍ക്കം മാര്‍ഷല്‍ ആയിരുന്നു. എന്റെ കരിയറില്‍ ഞാന്‍ കണ്ട ഏറ്റവും മിടുക്കനായ ബൗളറായിരുന്നു അദ്ദേഹം. എല്ലായിടത്തും അദ്ദേഹം വിക്കറ്റുകള്‍ വീഴ്ത്തി. പിച്ചുകളില്‍ നിന്ന് പേസര്‍മാര്‍ക്ക് വേണ്ടത്ര സഹായം ലഭിക്കാത്ത ഏഷ്യയിലെ ബാറ്റര്‍മാരെ അദ്ദേഹം പുറത്താക്കി.

ഓസ്ട്രേലിയയിലും ഇംഗ്ലണ്ടിലും അദ്ദേഹം ഒരുപോലെ മിന്നും പ്രകടനമാണ് കാഴ്ചവെച്ചത്. ബോളിങ്ങില്‍ ആധിപത്യം പുലര്‍ത്താത്ത രാജ്യമില്ല. അദ്ദേഹത്തിന്റെ ടെസ്റ്റ് റെക്കോഡ് നോക്കൂ. 86 ടെസ്റ്റുകളില്‍ നിന്നായി അദ്ദേഹം 350 വിക്കറ്റോളം നേടിയിട്ടുണ്ടെന്ന് ഞാന്‍ കരുതുന്നു,’ വസീം അക്രം സ്റ്റാര്‍ സ്പോര്‍ട്സില്‍ പറഞ്ഞു.

ടെസ്റ്റില്‍ 81 മത്സരങ്ങളിലെ 151 ഇന്നിങ്‌സില്‍ നിന്ന് 376 വിക്കറ്റുകളാണ് താരം നേടിയത്. 7/22 മികച്ച ബൗളിംഗ് പ്രകടനവും താരത്തിനുണ്ട്. 2.69 എക്കണോമിയും 20.95 ആവറേജും ടെസ്റ്റില്‍ താരത്തിലുണ്ട്. 22 ഫൈഫര്‍ വിക്കറ്റുകളും നാല് 10 വിക്കറ്റുകളും ഫോര്‍മാറ്റില്‍ മാര്‍ഷല്‍ നേടിയിട്ടുണ്ട്.

വളരെ ചുരുങ്ങിയ കാലം കൊണ്ട് റെഡ് ബോളില്‍ മികച്ച പ്രകടനം കാഴ്ചവെച്ച താരമാണ് അദ്ദേഹം. 107 ഇന്നിങ്‌സില്‍ നിന്ന് 1810 റണ്‍സ് താരം നേടിയിട്ടുണ്ട്. ഏകദിനത്തില്‍ 136 മത്സരങ്ങളിലെ 83 ഇന്നിങ്‌സില്‍ നിന്നും 955 റണ്‍സാണ് താരം നേടിയത്.

Content highlight: Wasim Akram Selected His Favourite Bowler