ജോജു ജോര്‍ജിന്റെ പ്രതിഷേധത്തിന് പിന്നില്‍ ഗൂഢാലോചന? വി.ടി. ബല്‍റാം

കൊച്ചി: കോണ്‍ഗ്രസ് സമരത്തിനിടെയുണ്ടായ അക്രമ സംഭവത്തില്‍ നടന്‍ ജോജു ജോര്‍ജിനെതിരെ വിമര്‍ശനവുമായി മുന്‍ എം.എല്‍.എ വി.ടി. ബല്‍റാം. ജോജു ജോര്‍ജിന്റെ രാഷ്ട്രീയം തങ്ങള്‍ക്ക് കൃത്യമായി അറിയാമെന്നും ഇതിന്റെ പിന്നില്‍ എന്തെങ്കിലും ഗൂഢാലോചനയണ്ടോ എന്ന് സംശയിക്കന്നതായും അദ്ദേഹം പറഞ്ഞു. മനോരമ ന്യൂസിലെ കൗണ്ടര്‍ പോയിന്റ് ചര്‍ച്ചയിലായിരുന്നു വി.ടി. ബല്‍റാമിന്റെ പ്രതികരണം.

മെഡിക്കല്‍ എമര്‍ജന്‍സി അവിടെ ഉണ്ടായിരുന്നെങ്കില്‍ അത് സൗഹാര്‍ദപൂര്‍വം പരിഹരിക്കാമായിരുന്നു. എന്തിനാണ് ഇങ്ങനെയൊരു പ്രതികരണവുമായി ജോജു വന്നത്. മറ്റേതെങ്കിലും രാഷ്ട്രീയ പാര്‍ട്ടിയുടെ സമരമാണെങ്കില്‍ ഇങ്ങനെയുണ്ടാകുമായിരുന്നോ എന്നും അദ്ദേഹം ചോദിച്ചു.

‘ജോജു ജോര്‍ജിന്റെ രാഷ്ട്രീയം ഞങ്ങള്‍ക്ക് കൃത്യമായി അറിയാം. അദ്ദേഹം കഴിഞ്ഞ കാലങ്ങളില്‍ എങ്ങനെയാണ് നിലപാടെടുത്തതെന്ന് അറിയാം. നിയമസഭാ തെരഞ്ഞെടുപ്പിലൊക്കെ നിരന്തരം സി.പി.ഐ.എമ്മിന് വേണ്ടി പ്രചരണം നടത്തിയ ആളായിരുന്നു. അങ്ങനെയുള്ള ഒരാള്‍ കോണ്‍ഗ്രസ് സമരത്തില്‍ കയറി പ്രതിഷേധമുണ്ടാക്കുമ്പോള്‍ അത് സദുദ്ദേശപരമാണ് എന്ന് ആര്‍ക്കും തോന്നില്ല. അതുകൊണ്ടായിരിക്കും അവിടെ പ്രശ്‌നങ്ങളുണ്ടായത്,’ വി.ടി. ബല്‍റാം പറഞ്ഞു.

ദേശീയപാത ഉപരോധം എന്ന് പ്രത്യേകം പേരിട്ട് തന്നെയാണ് കോണ്‍ഗ്രസ് സമരം നടത്തിയത്. പൊലീസിന്റെ അംഗീകാരത്തോടെയായിരുന്നു സമരം. അവിടെ ജോജു ജോര്‍ജ് കടന്നുവന്ന് പ്രതികരിച്ചതും അദ്ദേഹത്തിന്റെ ശരീര ഭാഷയുമൊക്കെ മാന്യമല്ലാത്ത രീതിയിലായിരുന്നുവെന്നും അദ്ദേഹം പറഞ്ഞു.

നികുതി ഭീകരതയുടെ പ്രാധാന്യം ജനങ്ങളെ ഓര്‍മപ്പെടുത്തി പെട്രോള്‍ പമ്പ് വഴി കുറഞ്ഞ വിലക്ക് പെട്രോള്‍ നല്‍കിയവരാണ് കോണ്‍ഗ്രസെന്നും
ഇങ്ങനെ ഒരു സമരം നടന്നത് ഭരണകൂടത്തിനെതിരാണെന്നും ജോജുവിനെതിരല്ലെന്നും വി.ടി. ബല്‍റാം പറഞ്ഞു.

പെട്രോള്‍ വിലവര്‍ധനവില്‍ ദേശീയപാത സ്തംഭിപ്പിച്ചുകൊണ്ടുള്ള കോണ്‍ഗ്രസിന്റെ സമരത്തിനെതിരെ ജോജു ജോര്‍ജ് പ്രതിഷേധിച്ചിരുന്നു.

മണിക്കൂറുകളോളം നീണ്ടുനിന്ന സമരത്തില്‍ നൂറുകണക്കിന് വാഹനങ്ങളായിരുന്നു വഴിയില്‍ കുടുങ്ങിക്കിടങ്ങിയത്. ആറ് കിലോമീറ്ററില്‍ അധികമുള്ള ദേശീയപാത സ്തംഭിപ്പിച്ചുകൊണ്ടായിരുന്നു കോണ്‍ഗ്രസിന്റെ പ്രതിഷേധം.

ജോജുവിന്റെ പ്രതിഷേധത്തിന് പിന്നാലെ വാഹനം സമരക്കാര്‍ തകര്‍ക്കുകയും ജോജു മദ്യപിച്ചിരുന്നെന്ന ആരോപണവുമായി ഇവര്‍ രംഗത്തെത്തുകയും ചെയ്യുകയായിരുന്നു.

ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ 

ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും  ഫോളോ ചെയ്യാം

CONTENT HIGHLIGFHTS: VT Balram has criticized actor Jojo George for his alleged involvement in the violence during the Congress agitation