തൃശൂര്‍: ലോക്സഭാ തെരഞ്ഞെടുപ്പില്‍ കേരളത്തിലെ യു.ഡി.എഫ് തരംഗത്തില്‍ ആഹ്ലാദം പ്രകടിപ്പിച്ച് വി.ടി ബല്‍റാം എം.എല്‍.എ. ‘കേരളമെന്ന പേര്‍ കേട്ടാല്‍ അഭിമാനപൂരിതമാകണമന്തരംഗം യു.ഡി.എഫെന്ന് കേട്ടാലോ തിളക്കണം ചോര നമുക്ക് ഞരമ്പുകളില്‍’ എന്ന് ബല്‍റാം ഫേസ്ബുക്കില്‍ കുറിച്ചു.
നിലവില്‍ എ.എം ആരിഫ് സ്ഥാനാര്‍ത്ഥിയായ ആലപ്പുഴയില്‍ മാത്രമാണ് സി.പി.ഐ.എം നേതൃത്വം നല്‍കുന്ന എല്‍.ഡി.എഫിന് ലീഡുള്ളത്. 19 ഇടത്തും യു.ഡി.എഫാണ് മുന്നിട്ടുനില്‍ക്കുന്നത്.
മുഖ്യമന്ത്രി പിണറായി വിജയന്റെ മണ്ഡലത്തിലടക്കം സി.പി.ഐ.എം പിന്നിലാണ്.
ലോക്സഭാ തെരഞ്ഞെടുപ്പില്‍ കേരളത്തില്‍ മതസാമുദായിക ധ്രുവീകരണമുണ്ടായെന്ന് സി.പി.ഐ.എം പ്രതികരിച്ചിരുന്നു. വോട്ടെണ്ണല്‍ പുരോഗമിക്കവേ കേരളത്തില്‍ യു.ഡി.എഫ് തരംഗമാണെന്ന് പ്രകടമായതോടെയാണ് സി.പി.ഐ.എമ്മിന്റെ പ്രസ്താവന.
അതേസമയം തമിഴ്നാട്ടില്‍ സി.പി.ഐ.എമ്മും സി.പി.ഐയും രണ്ട് വീതം സീറ്റുകളില്‍ ലീഡ് ചെയ്യുന്നുണ്ട്. പശ്ചിമ ബംഗാളിലും ത്രിപുരയിലും ഒരു സീറ്റില്‍ പോലും സി.പി.ഐം.എം ലീഡ് ചെയ്യുന്നില്ല.