കൊല്‍ക്കത്ത: കൊവിഡ് വൈറസില്‍ നിന്ന് ആളുകളെ സംരക്ഷിക്കുമെന്നും രോഗം ബാധിച്ചവരെ സുഖപ്പെടുത്തുമെന്നും അവകാശപ്പെട്ട് കൊല്‍ക്കത്തയില്‍ ഗോമൂത്ര വിതരണ പരിപാടി സംഘടിപ്പിച്ചതിന് ബി.ജെ.പി പ്രവര്‍ത്തകനെ അറസ്റ്റ് ചെയ്തു. ഗോമൂത്രം കുടിച്ചതിനെത്തുടര്‍ന്ന് ഒരാള്‍ക്ക് അവശത അനുഭവപ്പെട്ടിരുന്നു. ഇയാളുടെ പരാതിയെത്തുടര്‍ന്നാണ് ബി.ജെ.പി പ്രവര്‍ത്തകനെ അറസ്റ്റ് ചെയ്തത്.
വടക്കന്‍ കൊല്‍ക്കത്തയിലെ ജോരസഖോ പ്രദേശത്തെ പ്രാദേശിക പാര്‍ട്ടി പ്രവര്‍ത്തകനായ 40 കാരനായ നാരായണ ചാറ്റര്‍ജി തിങ്കളാഴ്ച പശു ആരാധന പരിപാടി സംഘടിപ്പിച്ച് പശു മൂത്രം വിതരണം ചെയ്തതായി പോലീസ് ഉദ്യോഗസ്ഥര്‍ പറഞ്ഞു.
ഗോമൂത്രത്തിന് അത്ഭുതസിദ്ധിയുണ്ടെന്ന് പറഞ്ഞാണ് ഇയാള്‍ ഗോമൂത്രം മറ്റുള്ളവര്‍ക്ക് കൊടുത്തത്. ഗോമൂത്രം കുടിച്ചതിന് ശേഷം ഒരാള്‍ക്ക് അവശത അനുഭവപ്പെടുകയായിരുന്നു.
എന്നാല്‍ സംഭവത്തെ ന്യായീകരിച്ച് എത്തിയിരിക്കുകയാണ് ബി.ജെ.പി നേതൃത്വം. സംഭവത്തില്‍ സംസ്ഥാന സര്‍ക്കാറിനെയാണ് ബി.ജെ.പി കുറ്റപ്പെടുത്തുന്നത്. നാരായണ ചാറ്റര്‍ജി ഗോമൂത്രം വിതരണം ചെയതതുമാത്രമേയൂള്ളൂവെന്നും ആരോടും കുടിക്കാന്‍ ആവശ്യപ്പെട്ടിട്ടില്ലെന്നുമാണ് ബി.ജെ.പി നേതൃത്വത്തിന്റെ വിശദീകരണം.
