മലയാള സിനിമയില്‍ വേറിട്ട വഴിയിലൂടെ സഞ്ചരിച്ച ചിത്രമാണ് നിവിന്‍ പോളി-എബ്രിഡ് ഷൈന്‍ കൂട്ടുകെട്ടിലെത്തിയ മഹാവീര്യര്‍. ഒരു ചിത്രകഥയിലെന്ന പോലെയാണ് സിനിമ നടക്കുന്നത്. രണ്ട് കാലഘട്ടത്തില്‍ നടക്കുന്ന സംഭവങ്ങളേയും കഥാപാത്രങ്ങളേയും കൂട്ടിയിണക്കിയാണ് ചിത്രം മുമ്പോട്ട് പോകുന്നത്.
ചിത്രത്തിന്റെ കേന്ദ്രം എന്ന് പറയാവുന്ന കഥാപാത്രമാണ് സിദ്ധിഖ് അവതരിപ്പിച്ച വീരേന്ദ്രകുമാര്‍ എം.എം. കോര്‍ട്ട് റൂം ഡ്രാമയായി ഒരുങ്ങിയ ചിത്രത്തില്‍ ജഡ്ജായാണ് സിദ്ധിഖിന്റെ വീരേന്ദ്രകുമാര്‍ എത്തുന്നത്. അതിനാല്‍ തന്നെ ചിത്രത്തില്‍ ഏറ്റവുമധികം സ്‌ക്രീന്‍ സ്‌പേസ് ലഭിക്കുന്നത് സിദ്ധിഖിനാണ്.
സിനിമയിലെ വളരെ ഇന്‍ട്രസ്റ്റിങ്ങായിട്ടുള്ള കഥാപാത്രമാണ് വീരേന്ദ്രകുമാര്‍. കോടതിയില്‍ ഓരോ കേസിലും എത്തുന്ന കഥാപാത്രങ്ങളോട് അയാള്‍ ഇടപെടുന്നതും വിധി പറയുന്നതുമെല്ലാം കേള്‍ക്കാന്‍ രസകരമാണ്. ആദ്യപകുതിയില്‍ നിയമവശങ്ങള്‍ ശരിയായ രീതിയില്‍ പിന്തുടര്‍ന്ന് പോകുന്ന വീരേന്ദ്രകുമാര്‍ അധികാരത്തെ മുമ്പില്‍ നിയമത്തിന്റെ ദുര്‍വ്യാഖ്യാനിക്കാനും ഒപ്പം നില്‍ക്കുന്നുണ്ട്.
സാധാരണക്കാരന് മുമ്പില്‍ കര്‍ക്കശമാവുകയും അധികാരത്തിന്റെ മുമ്പില്‍ വളച്ചൊടിക്കപ്പെടുകയും ചെയ്യുന്ന നീതിന്യായ വ്യവസ്ഥയുടെ പ്രതീകമാണ് വീരേന്ദ്രകുമാര്‍. ഭരണകൂടങ്ങള്‍ക്ക് ജുഡീഷ്യറി കീഴ്‌പ്പെടുന്ന സമകാലിക കാഴ്ചയെ പ്രതിഫലിപ്പിക്കുന്നുണ്ട് മഹാവീര്യറിലെ കോടതി വ്യവഹാരങ്ങള്‍.
കോടതിയിലെ നിയമ വ്യവഹാരങ്ങളുടെ പശ്ചാത്തലത്തില്‍ കഥ പറയുന്ന ചിത്രത്തില്‍ ടൈം ട്രാവലും ഫാന്റസിയുമൊക്കെ കടന്നുവരുന്നുണ്ട്. നര്‍മ, വൈകാരിക മുഹൂര്‍ത്തങ്ങള്‍ക്കും പ്രാധാന്യം നല്‍കുന്ന ചിത്രമാണിത്. പ്രമുഖ എഴുത്തുകാരന്‍ എം. മുകുന്ദന്റെ കഥയെ ആസ്പദമാക്കിയാണ് എബ്രിഡ് ഷൈന്‍ തിരക്കഥയൊരുക്കിയിരിക്കുന്നത്.
പോളി ജൂനിയര്‍ പിക്‌ചേഴ്‌സ്, ഇന്ത്യന്‍ മൂവി മേക്കര്‍സ് എന്നീ ബാനറുകളില്‍ നിവിന്‍ പോളി, പി. എസ്. ഷംനാസ് എന്നിവര്‍ ചേര്‍ന്നാണ് നിര്‍മാണം.
Content Highlight: Virendra Kumar MM played by Siddique is the central character of the film mahaveeryar