ഇന്ത്യന്‍ ക്രിക്കറ്റിലെ എക്കാലത്തെയും മികച്ച താരങ്ങളിലൊരാളാണ് വിരാട് കോഹ്‌ലി. ഇന്ത്യന്‍ പ്രീമിയര്‍ ലീഗില്‍ ബെംഗളൂരു റോയല്‍ ചാലഞ്ചേഴ്‌സിന് വേണ്ടി കളിക്കുന്ന താരം നിലവില്‍ ഇന്ത്യയും ഓസ്‌ട്രേലിയയും തമ്മിലുള്ള ട്വന്റി ട്വന്റി സീരീസില്‍ കളിച്ചുകൊണ്ടിരിക്കുകയാണ്.
കഴിഞ്ഞ ദിവസമായിരുന്നു സീരീസിലെ രണ്ടാം മത്സരം മഹാരാഷ്ട്രയിലെ നാഗ്പൂരില്‍ വെച്ച് നടന്നത്. സീരിസിലെ ആദ്യ മത്സരത്തില്‍ ഓസ്‌ട്രേലിയയായിരുന്നു ജയിച്ചതെങ്കില്‍ ഇന്നലെ നടന്ന രണ്ടാം മത്സരം ഇന്ത്യ കൈപ്പിടിയിലൊതുക്കി.
മത്സരത്തിനിടെയുള്ള കോഹ്‌ലിയുടെ ചില ആക്ഷന്‍സാണ് ഇപ്പോള്‍ ശ്രദ്ധ നേടുന്നത്. നാഗ്പൂരിലെ വി.സി.ബി സ്റ്റേഡിയത്തില്‍ മത്സരത്തിന് തൊട്ടുമുമ്പായി ആരാധകര്‍ കോഹ്‌ലിയെ നോക്കി ആര്‍.സി.ബി, ആര്‍.സി.ബി എന്ന് ആര്‍പ്പുവിളിച്ചപ്പോള്‍ തന്റെ ജഴ്‌സിയിലെ ഇന്ത്യയുടെ ലോഗോ ചൂണ്ടിക്കാണിക്കുന്ന കോഹ്‌ലിയുടെ ദൃശ്യങ്ങളാണ് ഇപ്പോള്‍ വൈറലാകുന്നത്.
EXCLUSIVE: Virat’s reaction when the crowd chanted RCB..RCB in the second T20I at #Nagpur! #CricketWithYash #Kohli #INDvsAUS #NagpurT20I #KingKohli #cricket #CricketTwitter pic.twitter.com/JrcGrgHt1g
— Dr. Yash Kashikar (@yash_kashikar) September 24, 2022
ഡ്രസിങ് റൂമില്‍ മത്സരം തുടങ്ങാന്‍ വേണ്ടി കാത്തിരിക്കുകയായിരുന്ന കോഹ്‌ലിയെ, കണ്ട സ്റ്റേഡിയം തിങ്ങി നിറഞ്ഞ കാണികള്‍ ആര്‍.സി.ബി, ആര്‍.സി.ബി എന്ന് ആര്‍പ്പുവിളിക്കുകയായിരുന്നു. ഇത് കണ്ട കോഹ്‌ലി സ്റ്റേഡിയത്തെ നോക്കി ജഴ്‌സിയിലെ ഇന്ത്യന്‍ ലോഗോയിലേക്ക് വിരല്‍ ചൂണ്ടുകയായിരുന്നു. താന്‍ ഐ.പി.എല്ലിലല്ല, ഇന്ത്യന്‍ ടീമിന് വേണ്ടിയാണ് ഇപ്പോള്‍ കളിക്കുന്നതെന്ന് ആരാധകരെ ഓര്‍മിപ്പിക്കുകയായിരുന്നു കോഹ്‌ലി.
