മുംബൈ: ഇന്ത്യയിലെ ഏറ്റവും വലിയ താര ജോഡികള്‍ ആരെന്ന് ചോദിച്ചാല്‍ ഒരുപക്ഷെ അതിന് ഇന്ന് ഒരു ഉത്തരം മാത്രമേ ഉള്ളൂ, വിരാട് കോഹ് ലിയും അനുഷ്‌ക ശര്‍മ്മയും. ബോളിവുഡിന്റേയും ക്രിക്കറ്റിന്റേയും പ്രിയതാരങ്ങളുടെ പ്രണയം മാധ്യമങ്ങളിലും സോഷ്യല്‍ മീഡിയയിലുമെല്ലാം ഏറെ ആഘോഷിക്കപ്പെടുന്നതാണ്. വിരാടിന്റേയും അനുഷ്‌കയുടേയും ആരാധര്‍ക്ക് ഇതാ ഒരു സന്തോഷ വാര്‍ത്ത. വിരാടും അനുഷ്‌കയും വിവാഹിതരാകുന്നു.
ഈ മാസം തന്നെ ഇരുവരും വിവാഹിതരാവുമെന്നാണ് വിവരം. ഈ മാസം രണ്ടാം വാരം ഏതെങ്കിലും ദിവസമായിരിക്കും വിവാഹം നടക്കുക. ഇതിനായി അടുത്ത ദിവസം തന്നെ വിരാട് ഇറ്റലിയിലേക്ക് പുറപ്പെടും. ദേശീയ മാധ്യമമായ ഇന്ത്യാ ടുഡെയാണ് വാര്‍ത്ത റിപ്പോര്‍ട്ട് ചെയ്യുന്നത്. മിലാനായിരിക്കും വിവാഹ വേദിയെന്നാണ് റിപ്പോര്‍ട്ട്.
Also Read: ഗുര്‍പ്രീത് സിംഗ് സന്ധുവിന് രണ്ടു മത്സരങ്ങളില്‍ വിലക്ക്; ബംഗലൂരു എഫ്.സിയ്ക്ക് തിരിച്ചടി
അടുത്ത ബന്ധുക്കള്‍ മാത്രമായിരിക്കും വിവാഹത്തില്‍ പങ്കെടുക്കുകയെന്നും താരങ്ങള്‍ക്കും സുഹൃത്തുക്കള്‍ക്കുമായി ഇന്ത്യയില്‍ പിന്നീട് വിരുന്ന് ഒരുക്കുമെന്നാണ് കേള്‍ക്കുന്നത്. നേരത്തെ സമാന രീതിയില്‍ ഇന്ത്യന്‍ പേസര്‍ ഭുവനേശ്വര്‍ കുമാറും വിവാഹ വിരുന്ന് നടത്തിയിരുന്നു.
വര്‍ഷങ്ങളായി അടുപ്പത്തിലായിരുന്ന ഇരുവരും 2015 ല്‍ വേര്‍പിരിഞ്ഞുവെങ്കിലും വീണ്ടും ഒരുമിക്കുകയായിരുന്നു. വിരാടിന്റെ മോശം ഫോമിനെ തുടര്‍ന്ന് അനുഷ്‌കക്കെതിരെ വിമര്‍ശനങ്ങള്‍ ഉണ്ടായപ്പോള്‍ ഇന്ത്യന്‍ നായകന്‍ അനുഷ്‌ക്കയ്ക്ക് വേണ്ടി രംഗത്തെത്തിയതിന് പിന്നാലെ ഇരുവരും വീണ്ടും ഒരുമിക്കുന്നത്.