ചെന്നൈ: വിജയ് സേതുപതി ഇന്ന് തമിഴ്‌നാട്ടില്‍ മാത്രമല്ല കേരളത്തിലും ധാരാളം ആരാധകരുള്ള താരമാണ്. നിരവധി സിനിമകളില്‍ ജൂനിയര്‍ ആര്‍ട്ടിസ്റ്റ്് അടക്കമായതിന് ശേഷമാണ് വിജയ് ഇന്ന് കാണുന്ന നിലയില്‍ എത്തിയത്.
എന്നാല്‍ മക്കള്‍ സെല്‍വം എന്ന് ആരാധകര്‍ സ്‌നേഹത്തോടെ വിളിക്കുന്ന വിജയ് സേതുപതിയെ കുറിച്ചുള്ള സംവിധായകന്‍ കാര്‍ത്തിക് സുബ്ബരാജിന്റെ പോസ്റ്റാണ് ഇപ്പോള്‍ വൈറലാവുന്നത്.
എട്ടുവര്‍ഷം മുമ്പ് 2010 ല്‍ തെന്‍മേര്‍ക്ക് പറവകാട്ര് എന്ന ചിത്രത്തിലൂടെ വെള്ളിത്തിരയിലെത്തിയ വിജയ് സേതുപതിക്ക് ആശംസകള്‍ അറിയിച്ചുകൊണ്ടുള്ളതായിരുന്നു ആ പോസ്റ്റ്.
“”തെന്‍മെര്‍ക്ക് പറവ കാട്ര് നാളെ റിലീസ് ചെയ്യുകയാണ്. വിജയ് സേതുപതിയെ ബിഗ് സ്‌ക്രീനില്‍ കാണാന്‍ കാത്തിരിക്കുന്നു. ആശംസകള്‍ വിജയ്.”” തുടര്‍ന്ന് കാര്‍ത്തികിന്റെ പോസ്റ്റിന് താഴേ ആരാണീ വിജയ് സേതുപതി എന്നൊരാള്‍ കമന്റിട്ടു. അതിന് കാര്‍ത്തിക് നല്‍കിയ മറുപടി “”നിങ്ങളത് വൈകാതെ അറിയും”” എന്നായിരുന്നു. എട്ട് വര്‍ഷങ്ങള്‍ക്ക് ശേഷം ആ മറുപടി ഇപ്പോള്‍ വൈറലായിരിക്കുകയാണ്.
കാര്‍ത്തിക് സുബ്ബരാജിന്റെ പിസ്സയിലൂടെയാണ് വിജയ് സേതുപതി സിനിമയില്‍ ശ്രദ്ധിക്കപ്പെടുന്നത്. പിന്നീട് കാര്‍ത്തികും വിജയും ഒന്നിച്ച വലിയ ഇരൈവി, ജിഗര്‍തണ്ട എന്നീ ചിത്രങ്ങളും ഹിറ്റായിരുന്നു. സൂപ്പര്‍സ്റ്റാര്‍ രജനീകാന്തിനെ നായകാനക്കി കാര്‍ത്തിക്ക് ഒരുക്കുന്ന പേട്ടയില്‍ ഒരിടവേളക്ക് ശേഷം വിജയും കാര്‍ത്തിക്കും ഒന്നിക്കാനിരിക്കെയാണ് സോഷ്യല്‍ മീഡിയയില്‍ ആ പഴയ കമന്റ് വൈറലാകുന്നത്.