ദളപതി വിജയ്നെയും ലേഡി സൂപ്പര്‍സ്റ്റാര്‍ നയന്‍താരയെയും കേന്ദ്രകഥാപാത്രങ്ങളാക്കി അറ്റ്ലീ സംവിധാനം ചെയ്യുന്ന ചിത്രം ബിഗില്‍ കേരളത്തില്‍ പ്രദര്‍ശനത്തിനെത്തും. ദീപാവലിക്കാണ് ചിത്രം തിയ്യറ്ററിലെത്തുക.
പൃഥ്വിരാജ് പ്രൊഡക്ഷന്‍സും മാജിക് ഫ്രെയിംസും ചേര്‍ന്നാണ് ചിത്രത്തിന്റെ വിതരണാവകാശം സ്വന്തമാക്കിയിരിക്കുന്നത്. വിതരണത്തിനായി ചിത്രത്തിന്റെ അണിയറക്കാര്‍ ചോദിച്ച ഭീമമായ തുക നല്‍കാന്‍ പലരും തയ്യാറാവാതിരുന്ന സാഹചര്യത്തിലാണ് പൃഥ്വിരാജും സംഘവും വിതരണാവകാശം നേടിയെടുത്തത്.
ഈ ചിത്രം കേരളത്തില്‍ പ്രദര്‍ശിപ്പിക്കുന്ന കാര്യത്തില്‍ ആശങ്ക നിലനിന്നിരുന്നു. തെറി, മെര്‍സല്‍ തുടങ്ങിയ ഹിറ്റ് ചിത്രങ്ങള്‍ക്ക് ശേഷം അറ്റ്ലീ സംവിധാനം ചെയ്യുന്ന ചിത്രമാണിത്. സംഗീത സംവിധാനം എ.ആര്‍.റഹ്മാനാണ്. വിവേക് ആണ് ഗാനരചയിതാവ്.
നയന്‍താര നായികയാവുന്ന ചിത്രം ഒരു ഫുട്‌ബോള്‍ കോച്ചിന്റെ കഥയാണ് പറയുന്നത്. വിവേക്, കതിര്‍, യോഗി ബാബു, റോബോ ശങ്കര്‍ എന്നിവരും ചിത്രത്തില്‍ അണിനിരക്കുന്നു. വിജയ് രണ്ടു ഗെറ്റപ്പിലെത്തുന്ന ചിത്രമായിരിക്കും ബിഗില്‍. ഫസ്റ്റ്‌ലുക്ക് പോസ്റ്ററിലും വിജയിയെ രണ്ട് ഗെറ്റപ്പിലാണ് അവതരിപ്പിച്ചിരിക്കുന്നത്.
കെ.ജി വിഷ്ണുവാണ് ഛായാഗ്രഹണം. എ.ജി.എസ് എന്റര്‍ടെയ്‌മെന്റാണ് നിര്‍മ്മാണം. 2009 ല്‍ പുറത്തിറങ്ങിയ വില്ലിലാണ് നയന്‍താരയും വിജയിയും ഇതിന് മുമ്പ് ഒരുമിച്ചത്. ബിഗിലെന്നും മൈക്കിളെന്നുമാണ് വിജയിയുടെ കഥാപാത്രത്തിന്റെ പേര്. എയ്ഞ്ചലെന്നാണ് നയന്‍താരയുടെ കഥാപാത്രത്തിന്റെ പേര്.
