ബിഗിലിന്റെ വിജയത്തിന് ശേഷം വിജയ് ഇപ്പോള്‍ അഭിനയിച്ചു കൊണ്ടിരിക്കുന്നത് ലോകേഷ് കനകരാജ് സംവിധാനം ചെയ്യുന്ന മാസ്റ്റര്‍ എന്ന ചിത്രത്തിലാണ്. മാസ്റ്ററിന് ശേഷം വിജയ് അഭിനയിക്കുന്ന അടുത്ത ചിത്രമേതെന്ന അന്വേഷണത്തിലാണ് ആരാധകരും സിനിമാ പ്രേമികളും.
വിജയ് അടുത്തതായി അഭിനയിക്കാന്‍ പോവുന്നത് സുധ കൊംഗര പ്രസാദ് സംവിധാനം ചെയ്യുന്ന ചിത്രത്തിലായിരിക്കുമെന്നാണ് ഇപ്പോള്‍ പുറത്ത് വരുന്ന റിപ്പോര്‍ട്ടുകള്‍. ഇരുതി സുട്രു എന്ന സൂപ്പര്‍ ഹിറ്റ് ചിത്രത്തിന്റെ സംവിധായികയാണ് സുധ കൊംഗര പ്രസാദ്.
വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ
നിലവില്‍ സൂര്യ മുഖ്യകഥാപാത്രത്തെ അവതരിപ്പിക്കുന്ന സൂരൈ പോട്രു എന്ന ചിത്രമാണ് സുധ കൊംഗര പ്രസാദ് ഇപ്പോള്‍ സംവിധാനം ചെയ്യുന്നത്. ഈ ചിത്രം റിലീസ് ചെയ്തതിന് ശേഷമാണ് വിജയ് ചിത്രത്തിലേക്ക് കടക്കുക.
മാസ്റ്ററില്‍ വിജയിനെ കൂടാതെ വിജയ് സേതുപതി, രവിചന്ദര്‍ ശന്തനു ഭാഗ്യരാജ്, മാളവിക മോഹനന്‍, ആന്‍ഡ്രിയ ജെറീമിയ എന്നിവര്‍ പ്രധാന കഥാപാത്രങ്ങളെ അവതരിപ്പിക്കുന്നു. അനിരുദ്ധാണ് ചിത്രത്തിനായി സംഗീത സംവിധാനം നിര്‍വഹിക്കുന്നത്.
വിജയും വിജയ് സേതുപതിയും ആദ്യമായാണ് ഒരുമിച്ചഭിനയിക്കുന്നത്. വിജയ്യുടെ 64ാമത് ചിത്രമാണിത്. ‘ദളപതി 64’ എന്ന പേരിലാണ് ചിത്രം ആഘോഷിക്കപ്പെടുന്നത്.
ചിത്രത്തില്‍ കോളേജ് പ്രൊഫസറുടെ വേഷമാണ് വിജയ് ചെയ്യുന്നത്. ദല്‍ഹി, കര്‍ണ്ണാടക, ചെന്നൈ എന്നിവിടങ്ങളിലാണ് സിനിമയുടെ ചിത്രീകരണമുണ്ടായത്.