ബംഗളൂരു: കളിക്കളത്തിലും പുറത്തുമെല്ലാം ശാന്തനാണ് എം.എസ് ധോണി. അതുകൊണ്ടു തന്നെയാണ് ധോണിയ്ക്ക് ഇത്രയും ആരാധകരും. വികാരങ്ങളെ അടയ്ക്കി വെച്ച് ശാന്തനായിരിക്കാനുള്ള അസാമാന്യ കഴിവാണ് ധോണിയ്ക്ക് ക്യാപ്റ്റന്‍ കൂളെന്ന പേര് നേടിക്കൊടുത്തത്. എന്നാല്‍ ഇടയ്‌ക്കൊക്കെ ധോണിയുടെ ഭാവം മാറാറുണ്ട്.
അത്തരത്തിലൊരു സന്ദര്‍ഭം ഇന്ന് ഓസീസിന്റെ 45ാം ഓവറിലുമുണ്ടായി. ഫീല്‍ഡിംഗില്‍ ഉഴപ്പിയ അക്‌സര്‍ പട്ടേലിനെ നോക്കി ദഹിപ്പിക്കുകയായിരുന്നു മുന്‍ നായകന്‍. ആ നോട്ടം പട്ടേല്‍ ഒരിക്കലും മറക്കാന്‍ സാധ്യതയില്ല.
45ാം ഓവറില്‍ മുഹമ്മദ് ഷമിയുടെ പന്ത് ബാറ്റ്‌സ്മാനായ ട്രാവിസ് ഹീഡിന്റെ കാലില്‍ കൊണ്ടു. പക്ഷെ ഷമിയുടെ അപ്പില്‍ അവഗണിച്ച അമ്പയര്‍ എല്‍.ബി വിക്കറ്റ് നല്‍കിയില്ല. അതിനോടകം പന്ത് തേര്‍ഡ് മാനിലേക്ക് പറന്നിരുന്നു. ബാറ്റ്‌സ്മാന്മാര്‍ സിംഗിളിനായി ഓടുകയും ചെയ്തു.
ആ സമയം ഫില്‍ഡ് ചെയ്തിരുന്നു അക്‌സര്‍ പട്ടേല്‍ വളരെ അലസാനായാണ് പന്തിനരികിലെത്തിയതും പന്തെടുത്ത് എറിഞ്ഞതും. ഇത് ധോണിയെ ചൊടിപ്പിച്ചു. കുപിതനായി പട്ടേലിനെ നോക്കിയ ധോണി കൂടുതല്‍ ശ്രദ്ധിക്കാന്‍ അക്‌സറിനോട് ആവശ്യപ്പെടുകയും ചെയ്യുകയായിരുന്നു.
ധോണിയെ ഇതുപോലെ ദേഷ്യപ്പെട്ട് വളരെ അപൂര്‍വ്വമായേ കാണാറുള്ളു. അതിനാല്‍ സംഭവം നായകന്‍ വിരാട് കോഹ് ലിയെ വരെ അമ്പരപ്പിച്ചിട്ടുണ്ട്. സംഭവത്തിന്റെ വീഡിയോ സോഷ്യല്‍ മീഡിയയില്‍ വൈറലായിരിക്കുകയാണ്.