ബെംഗളൂരു: കോണ്‍ഗ്രസ് നേതാവ് രാഹുല്‍ ഗാന്ധിയെ പരിഹസിക്കുന്ന തരത്തില്‍ വീഡിയോ പ്രചരിപ്പിച്ചതില്‍ ബി.ജെ.പി ഐ.ടി സെല്‍ തലവന്‍ അമിത് മാളവ്യയ്ക്കെതിരെ കേസെടുത്ത് കര്‍ണാടക പൊലീസ്.
രാഹുല്‍ ഗാന്ധി അപകടകാരിയാണെന്നും വഞ്ചനാപരമായ കളികളാണ് കളിക്കുന്നതുമെന്ന ക്യാപ്ഷനോട് കൂടി ട്വിറ്ററിലൂടെ രാഹുല്‍ ഗാന്ധിയെ പരിഹസിക്കുന്ന വീഡിയോ പ്രചരിപ്പിച്ചതിനാണ് കേസ്.
രാഹുല്‍ ഗാന്ധിയുടെ മുഖമടക്കമുള്ള 3D അനിമേറ്റഡ് വീഡിയോ ആണ് മാളവ്യ പങ്കുവെച്ചത്. രാഹുല്‍ ഗാന്ധി ഇന്ത്യയെ വിഭജിക്കാന്‍ ശ്രമിക്കുന്നുവെന്നാണ് ഈ വീഡിയോയില്‍ പറഞ്ഞിരിക്കുന്നത്.
ഈ വീഡിയോക്കെതിരെ ബെംഗളൂരു സ്വദേശിയായ കോണ്‍ഗ്രസ് പ്രവര്‍ത്തകന്‍ രമേശ് ബാബു ബെംഗളൂരു ഹൈഗ്രൗണ്ട്സ് പൊലീസ് സ്റ്റേഷനില്‍ പരാതി നല്‍കുകയായിരുന്നു. ഐ.ടി. നിയമങ്ങളുടെ ലംഘനമാണെന്നും അപകീര്‍ത്തികരമായ ഉള്ളടക്കങ്ങളാണിതിലുള്ളതെന്നും ചൂണ്ടിക്കാട്ടിയാണ് പരാതി നല്‍കിയത്.
