തിരുവനന്തപുരം: ഗൗരിയമ്മ സി പി ഐയില്‍ വന്നാല്‍ സ്വീകരിക്കുമെന്ന് പാര്‍ട്ടി സെക്രട്ടറി വെളിയം ഭാര്‍ഗവന്‍. സി പി ഐയിലേക്ക് വരണമോ എന്ന് തീരുമാനിക്കേണ്ടത് ഗൗരിയമ്മയാണ്. ഗൗരിയമ്മയുടെ വരവ് ഇടതുമുന്നണിയില്‍ പ്രശ്‌നമുണ്ടാക്കുമെന്ന് കരുതുന്നില്ല. ഗൗരിയമല്ല നല്ല പോരാളിയാണെന്നും വെളിയം വ്യക്തമാക്കി. തിരുവനന്തപുരത്ത് മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
കോണ്‍ഗ്രസ് ജെ എസ് എസിനെ കാലുവാരുകയാണെന്ന് കഴിഞ്ഞ ദിവസം ഗൗരിയമ്മ പ്രഖ്യാപിച്ചിരുന്നു. കഴിഞ്ഞ കുറച്ചു കാലങ്ങളായി കോണ്‍ഗ്രസുമായി ഇടഞ്ഞു നില്‍ക്കുകയാണ് ഗൗരിയമ്മ. ഈ സാഹചര്യത്തിലാണ് വെളിയത്തിന്റെ പ്രസ്താവന.
ഗൗരിയമ്മക്ക് എപ്പോള്‍ വേണമെങ്കിലും പാര്‍ട്ടിയിലേക്ക് തിരിച്ചു വരാമെന്ന് വെളിയം വ്യക്തമാക്കി. സി പി ഐയിലേക്ക് വരാന്‍ ആഗ്രഹമറിയിച്ചാല്‍ പാര്‍ട്ടി അക്കാര്യം ചര്‍ച്ചചെയ്യും. സി പി ഐ ഗൗരിയമ്മയുടെ കുടുംബം തന്നെയാണ്. സി പി ഐ എം പുറത്താക്കിയപ്പോള്‍ തന്നെ ഗൗരിയമ്മയ്ക്ക് സി പി ഐയിലേക്ക് വരാമായിരുന്നു. ഗൗരിയമ്മയുടെ വരവ് ഇടതുമുന്നണിയില്‍ പ്രശ്‌നങ്ങളുണ്ടാക്കുമെന്ന് കരുതുന്നില്ലെന്നും വെളിയം ഭാര്‍ഗവന്‍ പറഞ്ഞു.
പാര്‍ട്ടി വിട്ട സമയത്ത് തന്നെ ഗൗരിയമ്മയെ സ്വീകരിക്കാന്‍ സി പി ഐ തയ്യാറായിരുന്നു. അന്ന് തന്നെയും പി കെ വിയെയും കാണണമെന്ന് ഗൗരിയമ്മ അറിയിച്ചിരുന്നു. പാര്‍ട്ടിയിലേക്ക് വരുന്നതിനെക്കുറിച്ച് ചര്‍ച്ച ചെയ്യാനായിരുന്നോ കൂടിക്കാഴ്ചക്ക് ക്ഷണിച്ചതെന്ന് സംശയമുണ്ടായിരുന്നു. അന്ന് ഗൗരിയമ്മക്ക് സി പി ഐയിലേക്ക് വരാന്‍ ആരുടെയും ശിപാര്‍ശ വേണ്ടായിരുന്നു. നേരിട്ട് വന്നാല്‍ ആരും ഗൗരിയമ്മയെ തടയില്ലായിരുന്നു. എന്തുകൊണ്ടാണ് ഗൗരിയമ്മ അതിന് തയ്യാറാകാതിരുന്നതെന്ന് തനിക്കറിയില്ലെന്നും വെളിയം പറഞ്ഞു.
എന്നാല്‍ ജെ എസ് എസിനെ മൊത്തമായി സ്വാഗതം ചെയ്യാന്‍ വെളിയം തയ്യാറായില്ല. കൂട്ടത്തിലുള്ളവരുടെ കാര്യം പറയാനാകില്ലെന്നും ഗൗരിയമ്മക്ക് എപ്പോള്‍ വേണമെങ്കിലും സി പി ഐയിലേക്ക് വരാമെന്നും വെളിയം വ്യക്തമാക്കി.