ആന്റണി വര്‍ഗീസിനെ നായകനാക്കി നവാഗതനായ അജിത് മാമ്പള്ളി സംവിധാനം ചെയ്ത സിനിമയാണ് ‘കൊണ്ടല്‍’. ചിത്രം നാളെ (സെപ്റ്റംബര്‍ 13ന്) ആഗോള റിലീസായി പ്രേക്ഷകരുടെ മുന്നിലെത്തുകയാണ്.
ഇപ്പോള്‍ കൊണ്ടലിലെ പ്രൊമോ സോങ്ങുമായി എത്തിയിരിക്കുകയാണ് അണിയറപ്രവര്‍ത്തകര്‍. വേടനാണ് ഈ പാട്ട് പാടിയിരിക്കുന്നത്. കടലിനെ പശ്ചാത്തലമാക്കി ‘കടലമ്മ കരഞ്ഞല്ലേ പെറ്റത്’ എന്ന് തുടങ്ങുന്ന പാട്ടാണ് കൊണ്ടലിന്റേതായി എത്തിയിരിക്കുന്നത്.
പാട്ട് പുറത്തിറങ്ങിയ കുറഞ്ഞ സമയം കൊണ്ട് തന്നെ മികച്ച അഭിപ്രായമാണ് നേടുന്നത്. കടലിന്റെയും തീരദേശ ജീവിതത്തിന്റെയും പശ്ചാത്തലത്തില്‍ ഒരുക്കിയ ഈ ചിത്രത്തിന്റെ ടീസറിനും ട്രെയ്ലറിനും സോഷ്യല്‍ മീഡിയയില്‍ മികച്ച സ്വീകരണം ലഭിച്ചിരുന്നു.
വലിയ ഹൈപ്പിനിടയില്‍ പുറത്ത് വരുന്ന ഈ ആക്ഷന്‍ ചിത്രം രചിച്ചിരിക്കുന്നത് അജിത് മാമ്പള്ളി, റോയലിന്‍ റോബര്‍ട്ട്, സതീഷ് തോന്നയ്ക്കല്‍ എന്നിവരാണ്. കഴിഞ്ഞ ദിവസം സെന്‍സറിങ് പൂര്‍ത്തിയായി ചിത്രത്തിന് യു/ എ സര്‍ട്ടിഫിക്കറ്റ് ലഭിച്ചിരുന്നു.
വീക്കെന്‍ഡ് ബ്ലോക്ക്ബസ്റ്റേഴ്സിന്റെ ബാനറില്‍ സോഫിയ പോളാണ് കൊണ്ടല്‍ നിര്‍മിച്ചത്. ആന്റണി വര്‍ഗീസ് പെപ്പെക്ക് പുറമെ കന്നഡ താരം രാജ് ബി. ഷെട്ടിയും ചിത്രത്തില്‍ ഒരു പ്രധാന വേഷത്തില്‍ എത്തുന്നുണ്ട്. പൂര്‍ണമായും കടലില്‍ ചിത്രീകരിച്ച ആക്ഷന്‍ രംഗങ്ങളാണ് ചിത്രത്തിന്റെ ഹൈലൈറ്റ്
ഷബീര്‍ കല്ലറക്കല്‍, നന്ദു, മണികണ്ഠന്‍ ആചാരി, പ്രമോദ് വലിയനാട്, ശരത് സഭ, അഭിറാം രാധാകൃഷ്ണന്‍, പി.എന്‍. സണ്ണി, സിറാജുദ്ദീന്‍ നാസര്‍, നെബിഷ് ബെന്‍സണ്‍, ആഷ്ലി, രാഹുല്‍ രാജഗോപാല്‍, അഫ്‌സല്‍ പി.എച്ച്, റാം കുമാര്‍, രാഹുല്‍ നായര്‍, ഉഷ, കനക കൊനശനദ്, ജയ കുറുപ്പ്, പുഷ്പ കുമാരി എന്നിവരും കൊണ്ടലില്‍ അഭിനയിച്ചിട്ടുണ്ട്.
