കൊച്ചി: വരാപ്പുഴ കസ്റ്റഡിമരണവുമായി ബന്ധപ്പെട്ട് പ്രത്യേക അന്വേഷണസംഘം അറസ്റ്റ് ചെയ്ത വരാപ്പുഴ എസ്.ഐ ജി.എസ്.ദീപകിനെ റിമാന്‍ഡ് ചെയ്തു. 14 ദിവസമാണ് റിമാന്‍ഡ് കാലാവധി. ശ്രീജിത്തിനെ എസ്.ഐ ദീപക് ദേഹോപദ്രവം ഏല്‍പ്പിച്ചതായി റിമാന്‍ഡ് റിപ്പോര്‍ട്ടിലുണ്ടായിരുന്നു.
കസ്റ്റഡി മരമവുമായി ബന്ധപ്പെട്ട് ആലുവ റൂറല്‍ എസ്.പി എ.വി ജോര്‍ജിനെ സ്ഥലം മാറ്റിയതിനു പിന്നാലെയാണ് എസ്.ഐയെ റിമാന്‍ഡ് ചെയ്ത വാര്‍ത്ത പുറത്തുവരുന്നത്. തൃശൂര്‍ പൊലീസ് അക്കാദമിയിലേക്കായിരുന്നു എസ്.പിയെ സ്ഥലംമാറ്റിയത്.
നേരത്തെ ശ്രീജിത്തിനെ എസ്.ഐ മര്‍ദ്ദിച്ചതായി റിമാന്‍ഡ് റിപ്പോര്‍ട്ടില്‍ പറഞ്ഞിരുന്നു. കസ്റ്റഡിയിലെടുത്ത സമയത്തെ മര്‍ദ്ദനത്തില്‍ പരിക്കേറ്റിട്ടും ശ്രീജിത്തിനെ സെല്ലില്‍ വച്ചും മര്‍ദ്ദിച്ചെന്ന് റിപ്പോര്‍ട്ടിലുണ്ട്. ജാമ്യം ലഭിച്ചാല്‍ ഉന്നത സ്വാധീനമുപയോഗിച്ച് ദിപക് തെളിവ് നശിപ്പിക്കാമെന്നും റിപ്പോര്‍ട്ടിലുണ്ടായിരുന്നു.
ആലുവ പൊലീസ് ക്ലബ്ബില്‍ വിളിച്ചുവരുത്തി മണിക്കൂറുകള്‍ നീണ്ട ചോദ്യം ചെയ്യലിന് ശേഷമാണ് ദീപകിനെ കഴിഞ്ഞ ദിവസം അറസ്റ്റ് ചെയ്തത്. ശ്രീജിത്തിനെ അറസ്റ്റ് ചെയ്ത ദിവസം ദീപക് അവധിയിലായിരുന്നു. എന്നാല്‍,അന്ന് രാത്രി സ്റ്റേഷനിലെത്തിയതായി അന്വേഷണസംഘം കണ്ടെത്തിയിരുന്നു.
അവധിദിവസം രാത്രി വൈകി സ്റ്റേഷനിലെത്തിയത് എന്തിനെന്ന പ്രത്യേക അന്വേഷണസംഘത്തിന്റെ ചോദ്യത്തിന് വ്യക്തമായ ഉത്തരം നല്‍കാനും ദീപകിന് കഴിഞ്ഞിരുന്നില്ല. ഈ സാഹചര്യത്തിലാണ് എസ്.ഐയെ റിമാന്‍ഡ് ചെയ്തത്.