വലിയ ചര്‍ച്ചകള്‍ക്കും നീണ്ട അന്വേഷണങ്ങള്‍ക്കുമൊടുവില്‍ പ്രതിപക്ഷ നേതാവായി വി.ഡി. സതീശനെ കോണ്‍ഗ്രസ് ഹൈക്കമാന്റ് തെരഞ്ഞടുത്തിരിക്കുകയാണ്. മികച്ച വിജയം നേടി ചരിത്രത്തിലാദ്യമായി തുടര്‍ ഭരണം നേടിയിട്ടും, വലിയ മാറ്റത്തോടെ പുതുമുഖങ്ങള്‍ക്ക് അവസരം നല്‍കിയായിരുന്നു ഇടതുമുന്നണി സര്‍ക്കാര്‍ രൂപീകരിച്ചത്. ഈ മാറ്റത്തെ നേരിടാന്‍ കൂടിയാണ് രമേശ് ചെന്നിത്തല അടക്കമുള്ള സീനിയര്‍ നേതാക്കളെ ഒഴിവാക്കി നിലവില്‍ എ.ഐ.സി.സി സെക്രട്ടറിയും കെ.പി.സി.സി വൈസ് പ്രസിഡന്റുമായ വി.ഡി. സതീശനെ കോണ്‍ഗ്രസ് നേതൃത്വം പ്രതിപക്ഷത്തിന്റെ തലവനാക്കുന്നത്.
2011ല്‍ യു.ഡി.എഫ് അധികാരത്തില്‍ എത്തിയപ്പോള്‍ വി.ഡി സതീശന് മന്ത്രിസഭയില്‍ ഇടം നേടാന്‍ കഴിഞ്ഞിരുന്നില്ല. എന്നാല്‍ 2011 മുതല്‍ ഇതുവരെ നിയമസഭാ സാമാജികന്‍ എന്ന നിലയില്‍ അദ്ദേഹം മികച്ച പ്രകടനം നടത്തിയിരുന്നു. വി.ഡി സതീശന്റെ ഈ പ്രകടനം തന്നെയാണ് കേരളത്തിലെ യു.ഡി.എഫും കോണ്‍ഗ്രസും വലിയൊരു മാറ്റം ആവശ്യപ്പെടുന്ന ഈ സമയത്ത് നായകനായി നേതൃസ്ഥാനത്തേക്ക് അദ്ദേഹത്തെ എത്തിച്ചത്.
കാര്യങ്ങള്‍ പഠിച്ച് വ്യക്തതയോടെ അവതരിപ്പിക്കാനുള്ള സതീശന്റെ മിടുക്ക് പ്രതിപക്ഷത്തിന് ഏറെ ഗുണം ചെയ്യുമെന്നാണ് വിലയിരുത്തപ്പെടുന്നത്. സി.പി.ഐ.എമ്മിലടക്കം രാഷ്ട്രീയത്തിനതീതമായി നിരവധി സൗഹൃദങ്ങളുള്ള ആളാണ് അദ്ദേഹം.
ആന്റണി, ആന്റണിക്ക് ശേഷം ഉമ്മന്‍ചാണ്ടി, ഉമ്മന്‍ ചാണ്ടിക്ക് ശേഷം രമേശ് ചെന്നിത്തല ഇങ്ങനെ അയിരുന്നു കരുണാകരനു ശേഷം കോണ്‍ഗ്രസിലെ നേതൃമാറ്റം. 1991ല്‍ കരുണാകരന്‍. 96ല്‍ ആന്റണി. 2006ലും 2011ലും ഉമ്മന്‍ചാണ്ടി, 2016ല്‍ രമേശ് ചെന്നിത്തല എന്നിങ്ങനെയായിരുന്നു ആ മാറ്റം.
ഈ നിരയിലേക്കാണിപ്പോള്‍ വി.ഡി സതീശന്റെ വരവ്. എന്നാല്‍ കാര്യശേഷിയുള്ള നേതാവിനെ പ്രതിപക്ഷത്തിനും കോണ്‍ഗ്രസിനും ആവശ്യമുള്ള സമയത്താണ് പുതിയമാറ്റം തന്നിലേക്ക് വരുന്നതെന്ന അധിക ഉത്തരവാദിത്തം ഇപ്പോള്‍ സതീശനുണ്ട്.
‘സര്‍ക്കാരിന്റെ പ്രവര്‍ത്തനങ്ങള്‍ക്ക് നിരുപാധിക പിന്തുണ, വര്‍ഗീയതയോട് വിട്ടുവീഴ്ച ഇല്ലാത്ത നിലപാട്’ എന്നാണ് ആദ്യത്തെ തന്റെ വാര്‍ത്താ സമ്മേളനത്തില്‍ വി.ഡി സതീശന് പറഞ്ഞത്.
നിലവില്‍ എ.ഐ.സി.സി സെക്രട്ടറിയും കെ.പി.സി.സി വൈസ് പ്രസിഡന്റുമായ വി.ഡി. സതീശന് പറവൂരില്‍ നിന്നുള്ള നിയുക്ത എം.എല്‍.എയാണ്. 2001ലെ കന്നി തെരഞ്ഞെടുപ്പില്‍ പറവൂരില്‍ നിന്ന് വിജയിച്ച് നിയമസഭയിലെത്തി. 2006ലും 2011ലും 2016ലും വിജയം ആവര്‍ത്തിച്ചു. ഈ തെരഞ്ഞെടുപ്പില്‍ ഇടതു തരംഗത്തെ അതിജീവിച്ച് മികച്ച വിജയം നേടിയാണ് അദ്ദേഹം നിയമസഭയിലെത്തിയത്.
പരേതനായ വടശ്ശേരി കെ. ദാമോദരന്റെയും വിലാസിനിയമ്മയുടെയും മകനായി 1963 മെയ് 31 ന് ജനിച്ച വി.ഡി. സതീശന് വിദ്യാര്‍ത്ഥി രാഷ്ട്രീയത്തിലൂടെയാണ് പൊതുരംഗത്തേക്ക് കടന്നുവരുന്നത്. സേക്രഡ് ഹാര്‍ട് കോളേജില്‍ നിന്ന് ബിരുദവും രാജഗിരി കോളേജ് ഓഫ് സോഷ്യല്‍ സയന്‍സില്‍ നിന്ന് ബിരുദാനന്തര ബിരുദവും പൂര്‍ത്തിയാക്കി. 1986 ല്‍ എം.ജി. സര്‍വകലാശാലാ യൂണിയന്‍ ചെയര്‍മാനായി തെരഞ്ഞെടുക്കപ്പെട്ടു. പിന്നീട് തിരുവനന്തപുരം ലോ അക്കാദമിയില്‍ നിന്ന് എല്‍.എല്‍.ബിയും തിരുവനന്തപുരം ഗവ. ലോ കോളേജില്‍ നിന്ന് എല്‍.എല്‍.എമ്മും നേടി. തുടര്‍ന്ന് കേരള ഹൈക്കോടതിയില്‍ അഭിഭാഷകനായി കുറച്ച് കാലം പ്രാക്ടീസ് ചെയ്യുകയും ചെയ്തു.
