ജോര്‍ജിയയും പിടിച്ചു; വിജയത്തിന് തൊട്ടരികെ ബൈഡന്‍

വാഷിംഗ്ടണ്‍: യു.എസ് പ്രസിഡന്റ് തെരഞ്ഞെടുപ്പ് ഫലം അവസാനഘട്ടത്തിലേക്ക് അടുക്കവെ ജോര്‍ജിയയിലും നേട്ടമുണ്ടാക്കി ഡെമോക്രാറ്റ് സ്ഥാനാര്‍ത്ഥി ജോ ബൈഡന്‍.

99.8 ശതമാനം വോട്ടുകളും എണ്ണിക്കഴിയുമ്പോള്‍ 917 വോട്ടുകള്‍ക്കാണ് ബൈഡന്‍ ലീഡ് ചെയ്യുന്നത്. 97.9 ശതമാനം വോട്ടു എണ്ണി തീരുമ്പോള്‍ നെവാഡയിലും ബൈഡന്‍ മുന്നിലാണ്.  11438 വോട്ടുകള്‍ക്കാണ് ബൈഡന്‍ നെവാഡയില്‍ ലീഡ് ചെയ്യുന്നത്.

99 ശതമാനം വോട്ടുകളും എണ്ണിക്കഴിഞ്ഞ ജോര്‍ജിയയില്‍ നേരത്തെ ബൈഡന്‍ 1500 വോട്ടുകള്‍ക്ക് പിന്നിലായിരുന്നെന്ന് റിപ്പോര്‍ട്ടുകളുണ്ടായിരുന്നു. അവസാന നിമിഷത്തില്‍ ബൈഡന് ലഭിച്ച ഭൂരിപക്ഷം കുറയില്ലെന്നാണ് പ്രതീക്ഷ.

ജോര്‍ജിയയില്‍ വിജയിക്കുകയാണെങ്കില്‍ 16 ഇലക്ട്രല്‍ വോട്ട് നേടി 270 എന്ന മാജിക് നമ്പര്‍ ബൈഡന്‍ മറികടക്കും.

റിപ്പബ്ലിക് പാര്‍ട്ടി അനുഭാവികള്‍ നേരിട്ട് ബൂത്തിലെത്തി വോട്ടുകള്‍ ചെയ്തപ്പോള്‍ ഡെമോക്രാറ്റ് അനുഭാവികള്‍ തപാല്‍ വോട്ടുകളാണ് കൂടുതലായി ചെയ്തത് എന്നതാണ് ഈ തെരഞ്ഞെടുപ്പിലുണ്ടായ മറ്റൊരു പ്രത്യേകത. ബൂത്തിലെ വോട്ടുകളെണ്ണി തപാല്‍ വോട്ടുകള്‍ എണ്ണി തുടങ്ങിയപ്പോള്‍ ചിത്രം മാറി മറിയാന്‍ കാരണവും ഇതാണ്.

ആദ്യദിനം മുന്നില്‍ നിന്ന പെന്‍സില്‍വാനിയയിലും ജോര്‍ജിയയിലും വോട്ടെണ്ണല്‍ പുരോഗമിക്കും തോറും ട്രംപിന്റെ ഭൂരിപക്ഷം ഇടിയുകയാണ്. ഇന്നലെ 6.75 ലക്ഷം വോട്ടിന് മുന്നില്‍ നിന്ന പെന്‍സില്‍വാനിയയില്‍ ട്രംപിന്റെ ലീഡ് നിലവില്‍ 18000 മാത്രമായി കുത്തനെ ഇടിഞ്ഞു.

ജോര്‍ജിയ, നെവാഡ സംസ്ഥാനങ്ങളില്‍ ഇന്നലെ തന്നെ ഫലം പ്രഖ്യാപിക്കും എന്നാണ് പ്രതീക്ഷിച്ചത്. തപാല്‍ വോട്ടുകള്‍ പിന്നെയും വരുന്നുണ്ടെന്നും ഇന്ന് തന്നെ വോട്ടെണ്ണല്‍ പൂര്‍ത്തിയാക്കി ഫലം പ്രഖ്യാപിക്കും എന്ന് അവിടുത്തെ തെരഞ്ഞെടുപ്പ് ഉദ്യോഗസ്ഥര്‍ അറിയിച്ചിട്ടുണ്ട്. നിലവില്‍ മുന്നില്‍ നില്‍ക്കുന്ന അരിസോണയ്ക്കൊപ്പം ജോര്‍ജിയയോ നെവാഡയോ ജയിച്ചാല്‍ ബൈഡന് വിജയം ഉറപ്പിക്കും.

11 ഇലക്ടറല്‍ വോട്ടുകള്‍ ഉള്ള അരിസോണ റിപ്പബ്ലിക്കന്‍ പാര്‍ട്ടിയുടെ ഉറച്ച കോട്ടയായാണ് വിലയിരുത്തപ്പെടുന്നതെങ്കിലും അവിടെ ആദ്യം മുതല്‍ ബൈഡനാണ് ലീഡ് ചെയ്തത്. റിപ്പബ്ളിക്കന്‍ പാര്‍ട്ടിയുടെ ശക്തി കേന്ദ്രങ്ങളില്‍ വോട്ടുകള്‍ എണ്ണി തുടങ്ങിയപ്പോള്‍ ബൈഡന്റെ ലീഡ് കുത്തനെ കുറയുകയും ഒരു ഘട്ടത്തില്‍ 7000 വരെ താഴുകയും ചെയ്തെങ്കിലും ഇവിടെ ബൈഡന്‍ ജയിക്കും എന്നാണ് വാര്‍ത്ത ഏജന്‍സിയായ അസോസിയേറ്റഡ് പ്രസ് ഉറപ്പിച്ചു പറയുന്നത്.

അതേസമയം പരാജയം മുന്‍കൂട്ടി കണ്ടതോടെ തെരഞ്ഞെടുപ്പിനെ ചോദ്യം ചെയ്ത് നിയമപോരാട്ടം നടത്താനുള്ള ശ്രമത്തിലാണ് ട്രംപ് ക്യാംപ്. എന്നാല്‍ വോട്ടെടുപ്പിനെ ചോദ്യം ചെയ്ത് ജോര്‍ജിയയിലും മിഷിഗണിലും ട്രംപ് ക്യാംപ് നല്‍കിയ ഹരജികള്‍ അവിടുത്തെ കോടതികള്‍ തള്ളിയിട്ടുണ്ട്.

ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും  ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക

ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ

Content Highlight: US Presidential election Joe Biden leads in Georgia too