സഞ്ജയ് ലീല ബന്‍സാലി ചിത്രം “പത്മാവത്” ലോകമെമ്പാടുമുള്ള ബോക്‌സ് ഓഫീസുകളെ കീഴടക്കി മുന്നേറുകയാണ്. ചിത്രത്തെ സംബന്ധിച്ച വാര്‍ത്തകള്‍ ഇല്ലാത്ത ഒരു ദിവസം പോലും ഇല്ലാത്ത അവസ്ഥയാണ് ഇപ്പോള്‍. അമേരിക്കയിലെ സാന്‍ഫ്രാന്‍സിസ്‌കോയില്‍ നിന്നാണ് പുതിയ വാര്‍ത്ത എത്തിയിരിക്കുന്നത്.
“പത്മാവത്” പ്രദര്‍ശിപ്പിക്കുന്ന തിയേറ്റര്‍ ഒന്നാകെ ബുക്ക് ചെയ്തിരിക്കുകയാണ് ഇവിടത്തെ ചില കുടുംബങ്ങള്‍. ഇതിന്റെ കാരണമാണ് അതിലുമേറെ വിചിത്രം. ചിത്രത്തിലേതു പോലുള്ള വേഷവിധാനങ്ങള്‍ അണിഞ്ഞ് കൊണ്ടു ചിത്രം കാണാനാണ് ഇവര്‍ തിയേറ്ററിലെ എല്ലാ സീറ്റുകളും ബുക്ക് ചെയ്തത്.
കാലിഫോര്‍ണിയയിലെ സണ്ണിവെയ്‌ലിലുള്ള തിയേറ്ററിലാണ് സംഭവം. തിയേറ്ററില്‍ ചിത്രത്തിന്റെ പ്രദര്‍ശനം ആരംഭിക്കുന്നതിനു മുന്‍പായി ഇവരുടെ നൃത്തവും ഉണ്ടായിരുന്നു. “പത്മാവതി”ലെ തന്നെ ഘൂമര്‍ എന്ന ഗാനത്തിനാണ് ഇവര്‍ ചുവടുവെച്ചത്. ഇതിന്റെ വീഡിയോ സമൂഹമാധ്യമങ്ങളില്‍ വൈറലായിട്ടുണ്ട്.
ചിത്രത്തിന് എതിരെ പ്രതിഷേധം നടത്തിയ കര്‍ണ്ണിസേനക്കാരെ പ്രകോപിപ്പിച്ച കാര്യങ്ങളില്‍ ഒന്ന് ഈ ഗാനമായിരുന്നു. ഈ ഗാനം റാണി പത്മാവതിയെ അവഹേളിക്കുന്നതാണെന്നായിരുന്നു അവര്‍ പറഞ്ഞത്.
വീഡിയോ കാണാം: