നടിയും അസിസ്റ്റന്റ് ഡയറക്ടറുമായ ഉണ്ണിമായ പ്രസാദിന്റെ ഒരു ഇന്‍സ്റ്റഗ്രാം വീഡിയോ ആണ് ഇപ്പോള്‍ സോഷ്യല്‍ മീഡിയയില്‍ ചിരി പടര്‍ത്തുന്നത്. ഉണ്ണിമായ കുതിരപ്പുറത്തിരുന്ന് വരുന്നതാണ് വീഡിയോ, ബാക്ക്ഗ്രൗണ്ടില്‍ വിജയ്‌യുടെ മാസ്റ്ററിലെ വാത്തി റെയ്ഡ് എന്ന പാട്ടുമുണ്ട്. ജോജി സിനിമയുടെ സെറ്റില്‍ നിന്നുള്ളതാണ് ഈ വീഡിയോ.
ദിലീഷ് പോത്തന്‍ സംവിധാനം ചെയ്ത ജോജിയില്‍ പ്രധാന കഥാപാത്രങ്ങളിലൊരാളായ ബിന്‍സിയായിട്ടാണ് ഉണ്ണിമായ എത്തുന്നത്. ചിത്രത്തില്‍ ഫഹദ് ഫാസില്‍ അവതരിപ്പിച്ച ജോജി എന്ന കഥാപാത്രത്തിന് വായു എന്ന് വിളിക്കുന്ന ഒരു കുതിരയുണ്ട്. ആ കുതിരയുടെ പുറത്തിരുന്നുകൊണ്ടുള്ള വീഡിയോയാണ് ഇപ്പോള്‍ ഉണ്ണിമായ പങ്കുവെച്ചിരിക്കുന്നത്.
മാക്ബത്തിന്റെ സ്വതന്ത്രാവിഷ്‌കാരമായ ജോജിയിലെ ലേഡി മാക്ബത്തിനോട് സാമ്യമുള്ള കഥാപാത്രമാണ് ബിന്‍സി. ബിന്‍സിയായി മികച്ച പ്രകടനമാണ് ഉണ്ണിമായ നടത്തുന്നത്. സൂക്ഷ്മവും സ്വാഭാവികവുമായ ഉണ്ണിമായയുടെ അഭിനയത്തെ അഭിനന്ദിച്ച് നിരവധി പേര്‍ രംഗത്തെത്തിയിരുന്നു.
മഹേഷിന്റെ പ്രതികാരത്തിനും തൊണ്ടിമുതലും ദൃക്സാക്ഷിയ്ക്കും ശേഷമുള്ള ദിലീഷ് പോത്തന്റെ ജോജി ഏപ്രില്‍ ഏഴിനാണ് ആമസോണ്‍ പ്രൈമില്‍ റിലീസ് ചെയ്തത്. മികച്ച നിരൂപക ശ്രദ്ധയും പ്രേക്ഷകപ്രീതിയും ചിത്രം നേടിയിരുന്നു. ശ്യാം പുഷ്‌കരനാണ് ചിത്രത്തിന് തിരക്കഥയൊരുക്കിയിരിക്കുന്നത്.
ഫഹദ് ഫാസില്‍, ബാബുരാജ്, ഉണ്ണിമായ, ജോജി മുണ്ടക്കയം, സണ്ണി പി.എന്‍, ബേസില്‍ ജോസഫ്, ഷമ്മി തിലകന്‍, അലിസ്റ്റര്‍ അലക്സ് എന്നിവരാണ് ചിത്രത്തില്‍ പ്രധാന കഥാപാത്രങ്ങളായെത്തുന്നത്.
മാക്ബത്തിന്റെ സ്വതന്ത്ര ആവിഷ്‌കാരമാണ് ജോജിയെന്നും മാക്ബത്ത് വായിക്കുമ്പോഴും കാണുമ്പോഴും ഉണ്ടാകുന്ന അനുഭവത്തെയാണ് ജോജി ആവിഷ്‌കരിക്കാന്‍ ശ്രമിക്കുന്നതെന്നും ദിലീഷ് പോത്തന്‍ പറഞ്ഞിരുന്നു. തന്റെ മുന്‍ സിനിമകളുടെ പാറ്റേണല്ല, ജോജിയില്‍ പിന്തുടര്‍ന്നിട്ടുള്ളതെന്നും സംവിധായകന്‍ പറഞ്ഞിരുന്നു.
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
