സ്ത്രീകള്‍ക്കും പുരുഷന്മാര്‍ക്കും ഒരുപോലെ ധരിക്കാവുന്ന ഹിജാബ്; ഇറ്റാലിയന്‍ ഫാഷന്‍ ബ്രാന്‍ഡിന്റെ പുതിയ ശിരോവസ്ത്രം ചര്‍ച്ചയാവുന്നു
ഡൂള്‍ന്യൂസ് ഡെസ്‌ക്
Friday, 12th November 2021, 10:35 am
റോം: സ്ത്രീകള്‍ക്കും പുരുഷന്മാര്‍ക്കും ഒരുപോലെ ധരിക്കാവുന്ന ഹിജാബ് പുറത്തിറക്കി ഇറ്റാലിയന്‍ ഫാഷന്‍ ബ്രാന്‍ഡായ യുണൈറ്റഡ് കളേഴ്‌സ് ഓഫ് ബെനറ്റന്‍.
പരമ്പരാഗത ഇസ്‌ലാമിക് ശിരോവസ്ത്രമായ ഹിജാബ് ഇറ്റാലിയന്‍ റാപ്പറായ ഖാലി അംഡൗനിയുടെ സഹകരണത്തോടെ ബ്രാന്‍ഡ് പുതിയ മോഡലില്‍ പുറത്തിറക്കുകയാണുണ്ടായത്.
കറുപ്പ്, മഞ്ഞ, ചുവപ്പ്, പച്ച എന്നീ നിറങ്ങളിലാണ് ഹിജാബ് പുറത്തിറക്കിയിരിക്കുന്നത്. 3000 രൂപയാണ് ഒരു ശിരോവസ്ത്രത്തിന്റെ വില.
ശിരോവസ്ത്രം ധരിച്ച് കൊണ്ട് നില്‍ക്കുന്ന ചിത്രങ്ങള്‍ ഖാലി അംഡൗനി ട്വിറ്ററിലൂടെ പങ്കുവെച്ചിട്ടുണ്ട്. കഴിഞ്ഞ മിലാന്‍ ഫാഷന്‍ വീക്കിലായിരുന്നു വസ്ത്രം ലോഞ്ച് ചെയ്തത്.
അതേസമയം, വസ്ത്രത്തെ പ്രകീര്‍ത്തിച്ചും വിമര്‍ശിച്ചുമുള്ള പ്രതികരണങ്ങള്‍ സോഷ്യല്‍ മീഡിയയില്‍ വ്യാപകമായി വരുന്നുണ്ട്.
