ചെന്നൈ: ഹിന്ദി ഭാഷയെ ചൊല്ലിയുള്ള വിവാദം അവസാനിപ്പിക്കാതെ കേന്ദ്ര സര്‍ക്കാരും ഡി.എം.കെയും. ട്രെയിനിലെ ഭക്ഷണ ശുചിത്വം, ഗുണനിലവാരം എന്നീ വിഷയങ്ങളുമായി ബന്ധപ്പെട്ട് ചോദ്യം ചോദിച്ച തമിഴ്‌നാട് പുതുക്കോട്ടയില്‍ നിന്നുള്ള ലോക്‌സഭ അംഗമായ എം.എം അബദുല്ലയ്ക്കാണ് കേന്ദ്ര റെയില്‍വെ സഹമന്ത്രി ഹിന്ദിയില്‍ മറുപടിക്കത്ത് അയച്ചത്.
എന്നാല്‍ കത്ത് കൈപ്പെറ്റിയ അബ്ദുല്ല ഹിന്ദിയിലായതിനാല്‍ തനിക്ക് ഒന്നും മനസിലായില്ലെന്നും ഇംഗ്ലീഷില്‍ മറുപടി നല്‍കണമെന്നും പറഞ്ഞ് റെയില്‍വേ സഹമന്ത്രി രവ്നീത് സിങിന് തമിഴില്‍ മറുപടി അയക്കുകയായിരുന്നു.
അതേസമയം തനിക്ക് ഹിന്ദി അറിയില്ലെന്ന് പല തവണ കേന്ദ്ര മന്ത്രിയുടെ ഓഫീസിലെ ഉദ്യോഗസ്ഥരെ അറിയിച്ചതാണെന്നും എന്നിട്ടും അവര് ഹിന്ദിയില്‍ തന്നെ ആശയ വിനിമയം തുടരുകയായിരുന്നെന്നും എക്‌സില്‍ പങ്കുവെച്ച കുറിപ്പില്‍ അബ്ദുല്ല അഭിപ്രായപ്പെട്ടു.
അടുത്തിടെ നടന്ന പാര്‍ലമെന്റ് സമ്മേളനത്തില്‍ താന്‍ പ്രത്യേക ശ്രദ്ധാ പ്രമേയം അവതരിപ്പിച്ചെന്നും ട്രെയിനുകളില്‍ വിളമ്പുന്ന ഭക്ഷണത്തിന്റെ ഗുണനിലവാരം മോശമാണന്ന കാര്യമാണ് പ്രമേയത്തില്‍ ഉന്നയിച്ചതെന്നും പോസ്റ്റില്‍ പറയുന്നു.
1976ലെ ഔദ്യോഗിക ഭാഷാ ചട്ടങ്ങള്‍ അനുസരിച്ച്, തമിഴ്‌നാട് ഇ കാറ്റഗറിക്ക് കീഴിലാണ്, അതിനാല്‍ കേന്ദ്രസര്‍ക്കാര്‍ ഇംഗ്ലീഷിലൂടെ മാത്രമേ ആശയവിനിമയം നടത്താവൂവെന്നും എം.പി പറഞ്ഞു. എന്നാല്‍ കേന്ദ്രസര്‍ക്കാര്‍ സ്വന്തം ചട്ടങ്ങള്‍ക്ക് വിരുദ്ധമായാണ് പ്രവര്‍ത്തിക്കുന്നതെന്നും അബ്ദുല്ല പോസ്റ്റില്‍ ചൂണ്ടിക്കാട്ടി.
തനിക്ക് വേണമെങ്കില്‍ ഗൂഗിള്‍ ലെന്‍സ് പോലുള്ള സാങ്കേതിക വിദ്യകള്‍ ഉപയോഗിച്ച് കത്തിലെ ഉള്ളടക്കം മനസിലാക്കാന്‍ സാധിക്കുമെങ്കിലും അത് ശരിയായ നടപടി അല്ലെന്നും കേന്ദ്രസര്‍ക്കാര്‍ ഇങ്ങനെയല്ല പ്രവര്‍ത്തിക്കേണ്ടതെന്നും എം.പി പറയുന്നു.
Content Highlight: Union Minister sent a letter in Hindi; DMK MP replied that he did not understand anything