ന്യൂദൽഹി:  ഉമർ ഖാലിദിന് ഇടക്കാല ജാമ്യം. 2020ലെ ദൽഹി കലാപവുമായി ബന്ധപ്പെട്ട് ഗൂഢാലോചന ആരോപിച്ച് യു.എ.പി.എ ചുമത്തപ്പെട്ട് ജയിലിൽ കഴിയുകയായിരുന്നു  മുൻ ജെ.എൻ.യു വിദ്യാർത്ഥി നേതാവ് ഉമർ ഖാലിദ്. കുടുംബത്തിലെ ഒരു വിവാഹത്തിൽ പങ്കെടുക്കാൻ വേണ്ടിയാണ് ഉമർ ഖാലിദിന് ഇടക്കാല ജാമ്യം അനുവദിച്ചിരിക്കുന്നത്.

കർകർദൂമ കോടതിയിലെ അഡീഷണൽ സെഷൻസ് ജഡ്ജി സമീർ ബാജ്പേയ് ആണ് ജാമ്യം അനുവദിച്ചത്. ഡിസംബർ 28 മുതൽ ജനുവരി 3 വരെയുള്ള ഏഴ് ദിവസത്തേക്കാണ് ഇടക്കാല ജാമ്യം അനുവദിച്ചിരിക്കുന്നത്.

കേസുമായി ബന്ധപ്പെട്ട് ഒരു സാക്ഷിയുമായോ വ്യക്തിയുമായോ ഉമർ ഖാലിദ് ബന്ധപ്പെടരുത് എന്നതാണ് ഇടക്കാല ജാമ്യ വ്യവസ്ഥകൾ. ഇടക്കാല ജാമ്യ കാലയളവിൽ സോഷ്യൽ മീഡിയ ഉപയോഗിക്കരുതെന്നും ഉമർ ഖാലിദിനോട് കോടതി നിർദേശിച്ചിട്ടുണ്ട് .

കുടുംബാംഗങ്ങളെയും ബന്ധുക്കളെയും സുഹൃത്തുക്കളെയും മാത്രമേ കാണാൻ പാടുള്ളു, സ്വന്തം വീട്ടിലോ വീട്ടിലോ വിവാഹ ചടങ്ങുകൾ നടക്കുന്ന സ്ഥലങ്ങളിലോ മാത്രമേ താമസിക്കാൻ പാടുള്ളു , 2025 ജനുവരി മൂന്നിന് വൈകുന്നേരം ബന്ധപ്പെട്ട ജയിൽ സൂപ്രണ്ടിന് മുന്നിൽ ഉമർ ഖാലിദ് സ്വയം കീഴടങ്ങണം എന്നിവയാണ് മറ്റ് ഇടക്കാല ജാമ്യ വ്യവസ്ഥകൾ.

4 വർഷവും മൂന്ന് മാസത്തിന് ശേഷമാണ് ഉമർ ഖാ​ലിദിന് ജാമ്യം ലഭിച്ചത്. നിരവധി തവണ ജാമ്യാപേക്ഷ സമർപ്പിച്ചിരുന്നുവെങ്കിലും തള്ളുകയായിരുന്നു.

2022 ഒക്ടോബറിൽ ദൽഹി ഹൈക്കോടതി ഖാലിദിന് ജാമ്യം നിഷേധിച്ചിരുന്നു. തുടർന്ന് അദ്ദേഹം സുപ്രീം കോടതിയെ സമീപിച്ചെങ്കിലും പിന്നീട് തൻ്റെ പ്രത്യേക അവധി ഹരജി (SLP) പിൻവലിച്ചു. ഈ വർഷം ആദ്യം, വിചാരണ കോടതി അദ്ദേഹത്തിൻ്റെ രണ്ടാമത്തെ ജാമ്യാപേക്ഷയും തള്ളിയിരുന്നു. രണ്ടാം ജാമ്യാപേക്ഷ തള്ളിയതിനെ ചോദ്യം ചെയ്ത് അദ്ദേഹം നൽകിയ അപ്പീൽ ദൽഹി ഹൈക്കോടതിയുടെ പരിഗണനയിലാണ്.

കലാപത്തിന് ഗൂഢാലോചന നടത്തിയെന്ന് ആരോപിച്ച് യു.എ.പി.എ ചുമത്തിയായിരുന്നു ഉമർഖാലിദിൻ്റെ അറസ്റ്റ്. കലാപവുമായി ബന്ധപ്പെട്ട് കുറ്റാരോപിതനായ മുൻ ആം ആദ്മി പാർട്ടി കൗൺസിലർ താഹിർ ഹുസൈനുമായി ഉമറിന് ബന്ധമുണ്ടെന്നും കലാപം നടക്കുന്നതിന് ഒരു മാസം മുൻപ് ഇവർ രണ്ട് പേരും, ഷഹീൻ ബാഗിലെ സി.എ.എ വിരുദ്ധ പ്രക്ഷോഭത്തിന്‌ പിന്നിൽ പ്രവർത്തിച്ച യുണൈറ്റ് എഗെൻസ്റ്റ് ഹെയ്റ്റ് സ്ഥാപകനായ ഖാലിദ് സൈഫിയുമായി കൂടിക്കാഴ്ച നടത്തിയിരുന്നുവെന്നുമാണ് പൊലീസ് പറയുന്നത്.

updating…

Content Highlight: Umar Khalid granted bail