കോഹ്‌ലിക്കും സച്ചിനും ശേഷം പെട്രോള്‍ സെഞ്ച്വറി അടിക്കുന്നത് കാണേണ്ട അവസ്ഥയാണ്; ഇന്ധനവില വര്‍ധനവില്‍ ഉദ്ദവ് താക്കറെ
ഡൂള്‍ന്യൂസ് ഡെസ്‌ക്
Sunday, 28th February 2021, 11:20 pm
മുംബൈ: ഇന്ധനവില നൂറു കടന്നതില്‍ കേന്ദ്ര സര്‍ക്കാരിനെതിരെ വിമര്‍ശനവുമായി മഹാരാഷ്ട്ര മുഖ്യമന്ത്രി ഉദ്ദവ് താക്കറെ. ക്രിക്കറ്റ് താരങ്ങള്‍ സെഞ്ച്വറി അടിക്കുന്നത് കണ്ട നമ്മള്‍ ഇപ്പോള്‍ പെട്രോളും ഡീസലും സെഞ്ച്വറി കടക്കുന്നതാണ് കാണുന്നതെന്നാണ് ഉദ്ദവ് താക്കറെ പറഞ്ഞത്.
‘പെട്രോളിന്റെയും ഡീസലിന്റെയും വില കുത്തനെ കൂടിയിരിക്കുകയാണ്. നമ്മള്‍ വീരാട് കോഹ്‌ലിയുടെയും സച്ചിന്‍ തെണ്ടുല്‍ക്കറിന്റെയുമൊക്കെ സെഞ്ച്വറികള്‍ കണ്ടിട്ടുണ്ട്. ഇപ്പോള്‍ നമ്മള്‍ കാണുന്നത് പെട്രോളും ഡീസലും സെഞ്ച്വറിയടിക്കുന്നതാണ്,’ ഉദ്ദവ് താക്കറെ പറഞ്ഞു.
ഉത്തരേന്ത്യയിലെ വിവിധ പ്രദേശങ്ങളില്‍ പെട്രോളിന് നൂറ് രൂപ കടന്നിട്ടുണ്ട്. അന്താരാഷ്ട്ര വിപണിയില്‍ ക്രൂഡ് ഓയിലിന് വില താഴ്ന്ന് നില്‍ക്കുന്ന സമയത്താണ് രാജ്യത്ത് ഇന്ധനവിലയില്‍ വര്‍ധനവുണ്ടാകുന്നത്.
