മുംബൈ: യഥാര്‍ത്ഥ ശിവസേന പട്ടം തെരഞ്ഞെടുപ്പ് കമ്മീഷന്‍ ഷിന്‍ഡെ വിഭാഗത്തിന് നല്‍കിയതിന് പിന്നാലെ ഉദ്ധവ് താക്കറെ വിഭാഗം ശിവസേനക്ക് ട്വിറ്റര്‍ വെരിഫിക്കേഷന്‍ മാര്‍ക്കും നഷ്ടമായി. തെരഞ്ഞെടുപ്പ് കമ്മീഷന്റെ ഉത്തരവിന് പിന്നാലെ ട്വിറ്ററിലെ പേര് @shivsena എന്നത് @shivsenaUBT എന്നാക്കി മാറ്റിയിരുന്നു. ഇതിന് പിന്നാലെയാണ് വെരിഫിക്കേഷന്‍ മാര്‍ക്ക് നഷ്ടമായത്.
നിലവില്‍ ശിവസേനയക്ക് ട്വിറ്ററില്‍ വെരിഫൈഡ് പേജില്ല. ഫേസ്ബുക്കില്‍ താക്കറെ വിഭാഗം ശിവസേന ഇപ്പോഴും ‘ശിവസേന’ എന്ന പേരിലുള്ള പ്രൊഫൈല്‍ തന്നെയാണ് ഉപയോഗിക്കുന്നത്. അതേസമയം പാര്‍ട്ടിയുടെ ഔദ്യോഗിക വെബ്‌സൈറ്റ് പ്രവര്‍ത്തനരഹിതമാണ്.
യൂട്യൂബ് ചാനലിന്റെ പേരും ശിവസേനയില്‍ നിന്നും SHIVSENAUBT എന്നാക്കി മാറ്റിയിട്ടുണ്ട്.
ദിവസങ്ങള്‍ക്ക് മുന്‍പാണ് യഥാര്‍ത്ഥ ശിവസേന ഷിന്‍ഡെ വിഭാഗമാണെന്ന് ചൂണ്ടിക്കാട്ടി തെരഞ്ഞെടുപ്പ് കമ്മീഷന്‍ രംഗത്തെത്തിയത്. ശിവസേനയുടെ ഔദ്യോഗിക ചിഹ്നമായ അമ്പും വില്ലും ഷിന്‍ഡെ വിഭാഗത്തിനാണെന്നും തെരഞ്ഞെടുപ്പ് കമ്മീഷന്‍ വ്യക്തമാക്കി.
ഉത്തരവ് പുറത്തുവന്നതിന് പിന്നാലെ തെരഞ്ഞെടുപ്പ് കമ്മീഷനെതിരെ വിമര്‍ശനവുമായി ഉദ്ധവ് താക്കറെ രംഗത്തെത്തിയിരുന്നു. രാജ്യത്ത് ജനാധിപത്യത്തിന്റെ അംശം അവശേഷിക്കുന്നില്ലെന്നും ഉത്തരവ് ജനാധിപത്യത്തിന് ആപത്താണെന്നും താക്കറെ ചൂണ്ടിക്കാട്ടി.
അതേസമയം ശിവസേനയുടെ പേര് ഷിന്‍ഡെ വിഭാഗത്തിന് നല്‍കിയതിന് പിന്നില്‍ 2000കോടിയുടെ ഇടപാട് നടന്നിട്ടുണ്ടെന്ന് സഞ്ജയ് റാവത്ത് പറഞ്ഞു.
നേരിന്റെ മാര്‍ഗത്തിലല്ല ഷിന്‍ഡെ വിഭാഗത്തിന് യഥാര്‍ത്ഥ ശിവസേന പട്ടം ലഭിച്ചത്. മറിച്ച് കച്ചവടത്തിലൂടെയാണ്. എം.എല്‍.എയേയും, എം.പിയേയും, സാധാരണ പ്രവര്‍ത്തകനേയും വരെ കോടികള്‍ കൊടുത്ത് വാങ്ങാന്‍ മടിയില്ലാത്ത പാര്‍ട്ടി ശിവസേനയുടെ പേര് വാങ്ങാന്‍ എത്ര കോടി ചിലവാക്കിയിട്ടുണ്ടാകുമെന്നത് ഊഹിക്കാവുന്നതാണെന്നും റാവത്ത് പറഞ്ഞു.
ഇടപാടുമായി ബന്ധപ്പെട്ട രേഖകള്‍ തന്റെ പക്കലുണ്ടെന്നും വെളിപ്പെടുത്തുമെന്നും റാവത്ത് പറഞ്ഞിരുന്നു.
Content Highlight: Uddhav sena losses twitter blue tick after EC’s order