ദുബായ്: റഷ്യന്‍ അധിനിവേശം ഒരാഴ്ച പിന്നിടുമ്പോള്‍ ഉക്രൈന്‍ പൗരന്മാര്‍ക്ക് യു.എ.ഇ നേരത്തെ അനുവദിച്ച വിസ ഇളവ് നിര്‍ത്തിവെച്ചു. യുദ്ധത്തില്‍ നിന്ന് ആയിരക്കണക്കിന് ഉക്രൈനികള്‍ വിവിധ രാജ്യങ്ങളിലേക്ക് പലായനം ചെയ്യുന്ന സമയത്താണ് യു.എ.ഇയുടെ നടപടി.
യു.എ.ഇ തീരുമാനം കഴിഞ്ഞ ചൊവ്വാഴ്ച മുതല്‍ പ്രാബല്യത്തില്‍ വന്നിട്ടുണ്ട്. കാരണം വ്യക്തമാക്കാതെയാണ് യു.എ.ഇ ഇതുസംബന്ധിച്ച് ഉത്തരവ് പുറപ്പെടുവിച്ചത്. യു.എ.ഇയുടെ ഔദ്യോഗിക വിശദീകരണവും ഇതുസംബന്ധിച്ച് വന്നിട്ടില്ല.
ഉക്രൈനിനെതിരായ യുദ്ധത്തില്‍ ആഗോള തലത്തില്‍ റഷ്യയെ നയതന്ത്രപരമായി ഒറ്റപ്പെടുത്താന്‍ പാശ്ചാത്യ ലോകം നീങ്ങുമ്പോഴാണ് ഇതില്‍ നിന്ന് യു.എ.ഇ മാറിനില്‍ക്കുന്നത്. റഷ്യയുടെ നിലപാടിനെ പിന്തുണക്കുന്ന ചുരുക്കം ചില രാജ്യങ്ങളില്‍ ഒന്നായി യു.എ.ഇ മാറുന്നു എന്നാണ് ഇതിലൂടെ വിലയിരുത്തലുകള്‍ വരുന്നുണ്ട്.
കഴിഞ്ഞ ദിവസം അബുദാബി കിരീടാവകാശി ഷെയ്ഖ് മുഹമ്മദ് ബിന്‍ സയ്യിദ് അല്‍ നഹ്യാനുമായി റഷ്യന്‍ പ്രസിഡന്റ് വ്‌ളാഡിമിര്‍ പുടിന്‍ ടെലിഫോണ്‍ സംഭാഷണം നടത്തിയതും യു.എ.ഇ റഷ്യന്‍ പക്ഷത്താണെന്നാണ് സൂചിപ്പിക്കുന്നത്. കഴിഞ്ഞ വെള്ളിയാഴ്ച റഷ്യ- ഉക്രൈന്‍ വിഷയത്തില്‍ നടന്ന യു.എന്‍ സുരക്ഷാ കൗണ്‍സില്‍ വോട്ടെടുപ്പില്‍ നിന്നും യു.എ.ഇ വിട്ടുനിന്നിരുന്നു.
