യു.എ.ഇ സര്‍ക്കാര്‍ ജനാധിപത്യപരമായ നവീകരണങ്ങള്‍ നടപ്പാക്കണമെന്ന് ആവശ്യപ്പെട്ട് 94 പ്രതികളും സര്‍ക്കാരിന് കത്തയച്ചിരുന്നു. ആഗോളതലത്തില്‍ അംഗീകാരമുള്ള ജനാധിപത്യപരമായി വോട്ടെടുപ്പിലൂടെ തെരഞ്ഞെടുക്കപ്പെടാന്‍ അധികാരമുള്ള ഒരു ഫെഡറല്‍ നാഷണല്‍ കൗണ്‍സില്‍ വേണമെന്നും, ഭരണഘടനാ ചട്ടക്കൂടിലൊതുങ്ങി നില്‍ക്കുന്ന മനുഷ്യാവകാശങ്ങള്‍ സംരക്ഷിക്കുന്നൊരു ഭരണ സംവിധാനം വേണമെന്നുമായിരുന്നു ഇവരുടെ പ്രധാന ആവശ്യം.
കേസില്‍ പ്രതികളെന്ന് കണ്ട് ശിക്ഷിക്കപ്പെട്ടത് 69 പേരായിരുന്നു. ഇതില്‍ മിക്കവര്‍ക്കും 15 വര്‍ഷത്തെ തടവു ശിക്ഷയാണ് ലഭിച്ചത്. ഭൂരിഭാഗം പേരും ഇതിനോടകം ശിക്ഷാ കാലാവധി പൂര്‍ത്തിയാക്കിയിട്ടും ജയിലില്‍ തന്നെ തുടരേണ്ട അവസ്ഥയിലാണ്. ഈ അനീതിക്കെതിരെയാണ് തടവുകാരുടെ ബന്ധുക്കള്‍ യു.എ.ഇ ഭരണകൂടത്തെ സമീപിച്ചതെന്ന് മിഡില്‍ ഈസ്റ്റ് ഐ റിപ്പോര്‍ട്ട് ചെയ്തു.
‘എന്റെ സഹോദരനെ 2023 മാര്‍ച്ചില്‍ പുറത്തുവിടേണ്ടതായിരുന്നു. ഞങ്ങളുടെ ആളുകള്‍ക്കെതിരായ ഈ അനീതി അംഗീകരിക്കാനാകില്ല. തടവുകാരെ ഉടന്‍ പുറത്തുവിടണം,’ തടവുകാരില്‍ ഒരാളുടെ സഹോദരനായ അഹമ്മദ് അല്‍ നുഐമി റോയിട്ടേഴ്‌സിനോട് പറഞ്ഞു. പത്തു വര്‍ഷത്തെ തടവുശിക്ഷ പൂര്‍ത്തിയാക്കിയിട്ടും തന്റെ പിതാവിനെ ജയിലില്‍ നിന്ന് വിട്ടയച്ചിട്ടില്ലെന്ന് ജെനാന്‍ അല്‍ മര്‍സൂക്കിയും പരാതിപ്പെട്ടു.
സമാധാനമായി പ്രതിഷേധിക്കുന്നവരെ പോലും യു.എ.ഇ ഭരണകൂടം ശിക്ഷിക്കുകയാണെന്നും അവരെ ബന്ധുക്കളെ പോലും മാനസികമായി പീഡിപ്പിക്കുകയാണെന്നും ഇവര്‍ ആരോപിക്കുന്നു. തടവുപുള്ളികള്‍ക്കെതിരായ യു.എ.ഇ ഭരണകൂടത്തിന്റെ പ്രതികാര നടപടിയെക്കുറിച്ച് തിങ്കളാഴ്ച ഐക്യരാഷ്ട്ര സഭയുടെ മനുഷ്യാവകാശ കൗണ്‍സിലില്‍ അമേരിക്ക ഉള്‍പ്പെടെ ഏതാനും രാജ്യങ്ങള്‍ പരാതി ഉന്നയിച്ചിരുന്നു.
യു.എ.ഇ തടവുകാരുടെ മനുഷ്യാവകാശങ്ങള്‍ മാനിച്ചുകൊണ്ട് അവരെ ജയില്‍ മോചിതരാക്കണമെന്നും അമേരിക്കന്‍ പ്രതിനിധി ആവശ്യപ്പെട്ടു. കഴിഞ്ഞ ആഴ്ച 42ഓളം രാഷ്ട്രീയ സംഘടനകളും മനുഷ്യാവകാശ പ്രവര്‍ത്തകരും ഇതേ ആവശ്യവുമായി രംഗത്തെത്തിയിരുന്നു. നവംബറില്‍ യു.എ.ഇയില്‍ വെച്ച് നടക്കാനിരിക്കുന്ന കോപ് 28 യു.എന്‍ ക്ലൈമറ്റ് ചേഞ്ച് കോണ്‍ഫറന്‍സിന് മുന്നോടിയായാണ് സംഘടനകള്‍ ഈ ആവശ്യം ഉന്നയിച്ചിരിക്കുന്നത്.
CONTENT HIGHLIGHTS: ‘UAE 94’: Release 51 detainees held past jail terms, families demands
