ന്യൂയോര്‍ക്ക്: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ ട്വിറ്റര്‍ അക്കൗണ്ട് 11 മിനുട്ട് നേരത്തേക്ക് പ്രവര്‍ത്തനരഹിതമായി. വ്യാഴ്ചയായിരുന്നു സംഭവം. തങ്ങളുടെ ജീവനക്കാരന്റെ കൈപ്പിഴ കൊണ്ട് സംഭവിച്ചതാണെന്നും പെട്ടെന്ന് തന്നെ ശരിയാക്കിയെന്നും ട്വിറ്റര്‍ പറഞ്ഞു. സംഭവത്തില്‍ അന്വേഷണം നടത്തുകയാണെന്നും ആവര്‍ത്തിക്കില്ലെന്നും ട്വിറ്റര്‍ അറിയിച്ചു.
“ക്ഷമിക്കണം ഈ പേജ് നിലവില്ല” എന്നാണ് 11 മിനുട്ട് നേരത്തേക്ക് ട്രംപിന്റെ അക്കൗണ്ടില്‍ കയറിയവര്‍ക്ക് കാണാനായത്. അതേ സമയം പ്രസിഡന്റിന്റെ അക്കൗണ്ട് ഡീആക്ടിവേറ്റ് ആയിപ്പോയ സംഭവത്തില്‍ വൈറ്റ്ഹൗസ് പ്രതികരിച്ചിട്ടില്ല.
സംഭവം സോഷ്യല്‍മീഡിയയില്‍ ചര്‍ച്ചയായിട്ടുണ്ട്. ലോകം സമാധാനം അനുഭവിച്ച 11 മിനുട്ടുകളായിരുന്നു ആ സമയമെന്നും ട്വിറ്ററിന് നന്ദിയെന്നാണ് ഇതിലൊരു പ്രതികരണം. ട്രംപിന്റെ അക്കൗണ്ട് തിരിച്ചുകിട്ടിയത് ദൗര്‍ഭാഗ്യകരമെന്നാണ് മറ്റൊരു പ്രതികരണം.
ട്രംപ് തന്റെ ഈ പെഴ്‌സണല്‍ അക്കൗണ്ട് വഴിയാണ് അമേരിക്കയിലെ ജനങ്ങളുമായി സംവദിക്കുന്നതും സര്‍ക്കാരിന്റെ നയങ്ങള്‍ പ്രഖ്യാപിക്കാറുള്ളതും. 2009ലാണ് ട്രംപ് ട്വിറ്ററിലെത്തിയത്. പ്രസിഡന്റ് തെരഞ്ഞെടുപ്പ് സമയത്തും ട്വിറ്റര്‍വഴി ട്രംപ് പ്രചാരണം നടത്തിയിരുന്നു. ഇപ്പോള്‍ 41 മില്ല്യണിലധികം ഫോളോവേഴ്‌സ് ട്രംപിനുണ്ട്.