കുരങ്ങന്റെ കയ്യില്‍ കിട്ടിയ പൂമാല പോലെ; ട്വിറ്ററില്‍ നിന്ന് പക്ഷിയെ പറപ്പിച്ച് മസ്‌ക്
ഡൂള്‍ന്യൂസ് ഡെസ്‌ക്
Tuesday, 4th April 2023, 11:00 am
വാഷിങ്ടണ്‍: ട്വിറ്ററിന്റെ വെബ് വെര്‍ഷനില്‍ ലോഗോ മാറ്റം വരുത്തി ഇലോണ്‍ മസ്‌ക്. തന്റെ ട്വിറ്റര്‍ അക്കൗണ്ടിലൂടെ മസ്‌ക് തന്നെയാണ് ഇക്കാര്യം അറിയിച്ചത്. ഇനി മുതല്‍ വെബില്‍ ട്വിറ്റര്‍ തുറക്കുമ്പോള്‍ ഹോം ബട്ടണില്‍ നീല പക്ഷിക്ക് പകരം ഡോജ്‌കോയിന്‍ ക്രിപ്‌റ്റോകറന്‍സിയിലെ ഡോജ് മീം ആയിരിക്കും കാണാനാവുക. എന്നാല്‍ മൊബൈല്‍ വെര്‍ഷനില്‍ പഴയ ലോഗോ തന്നെ നിലനിര്‍ത്തും.
2022ല്‍ ഒരു ഉപഭോക്താവ് മസ്‌കിനോട് ട്വിറ്ററിന്റെ ലോഗോ ഡോജ് മീമാക്കി മാറ്റണമെന്ന് ആവശ്യപ്പെടുന്ന ട്വീറ്റും മസ്‌ക് തന്റെ അക്കൗണ്ടില്‍ പങ്ക് വെച്ചിട്ടുണ്ട്. ‘വാഗ്ദാനം ചെയ്ത പോലെ’ എന്ന ക്യാപ്ഷനിലാണ് മസ്‌ക് പോസ്റ്റ് ഷെയര്‍ ചെയ്തിരിക്കുന്നത്.
