ഭിന്നശേഷിക്കാരെ ബൂത്തിലേക്ക് പാര്‍ട്ടി പ്രവര്‍ത്തകര്‍ എടുത്തുകൊണ്ടുവരേണ്ട; സര്‍ക്കാര്‍ ചിലവില്‍ ബൂത്തിലെത്തിക്കുമെന്ന് തെരഞ്ഞെടുപ്പ് കമ്മീഷന്‍
ഡൂള്‍ന്യൂസ് ഡെസ്‌ക്
Friday, 19th April 2019, 12:42 pm
തിരുവനന്തപുരം: ഭിന്നശേഷിയുള്ളവരെ വോട്ടു രേഖപ്പെടുത്താനായി പാര്‍ട്ടി പ്രവര്‍ത്തകര്‍ ബൂത്തിലെത്തിക്കുന്ന രീതി ഇനി വേണ്ടെന്ന് തെരഞ്ഞെടുപ്പ് കമ്മീഷന്‍. ഇതിനായി സര്‍ക്കാര്‍ ചിലവില്‍ സംവിധാനമൊരുക്കുമെന്നും തെരഞ്ഞെടുപ്പു കമ്മീഷന്‍ വ്യക്തമാക്കി.
രാഷ്ട്രീയ പ്രവര്‍ത്തകരുടെ സഹായത്താല്‍ ബൂത്തിലെത്തുന്നവര്‍ക്ക് സ്വന്തം ഇഷ്ടപ്രകാരം വോട്ടു ചെയ്യാന്‍ കഴിയില്ല. കൂടാതെ വോട്ടു രേഖപ്പെടുത്തിയശേഷം പാര്‍ട്ടി പ്രവര്‍ത്തകര്‍ ചിലരെ വഴിയില്‍ ഉപേക്ഷിക്കുന്ന സമീപനവുമുണ്ട്. ഇക്കാരണങ്ങള്‍ കൊണ്ടാണ് ഭിന്നശേഷിക്കാര്‍ക്ക് വോട്ടു രേഖപ്പെടുത്താന്‍ സര്‍ക്കാര്‍ സംവിധാനമൊരുക്കുന്നത്.
ഇവരെ സര്‍ക്കാര്‍ ചിലവില്‍ ബൂത്തിലെത്തിച്ച് വോട്ടു രേഖപ്പെടുത്തിയശേഷം തിരിച്ചു വീട്ടിലെത്തിക്കും. ഇതിനായി വാഹനങ്ങള്‍ ഉള്‍പ്പെടെ ക്രമീകരിക്കാനുള്ള നടപടികള്‍ പുരോഗമിക്കുകയാണ്.
