തിരുവനന്തപുരം: എ.ഡി.ജി.പി ടോമിന്‍ തച്ചങ്കരിക്കെതിരെ രൂക്ഷ വിമര്‍ശനവുമായി ഡി.ജി.പി ടി.പി സെന്‍കുമാര്‍. പൊലീസ് ആസ്ഥാനത്ത് നിന്ന് രഹസ്യ വിവരങ്ങള്‍ ചോര്‍ത്തിയെന്ന റിപ്പോര്‍ട്ടാണ് സെന്‍കുമാര്‍ സര്‍ക്കാരിന് നല്‍കിയിരിക്കുന്നത്. ആഭ്യന്തര സെക്രട്ടറിക്ക് നല്‍കിയ റിപ്പോര്‍ട്ടിലാണ് എ.ഡി.ജി.പിക്കെതിരായ ഗുരുതരമായ ആരോപണങ്ങള്‍.
അതേസമയം തച്ചങ്കരി കഴിഞ്ഞ ദിവസം നല്‍കിയ പരാതിയിലെ ആരോപണം സെന്‍കുമാര്‍ നിഷേധിച്ചു. ഓഫീസില്‍വച്ച് കൈയ്യേറ്റം ചെയ്യാന്‍ ശ്രമിച്ചുവെന്നും ജോലിയില്‍നിന്ന് പിരിച്ചുവിടുമെന്ന് ഭീഷണിപ്പെടുത്തിയെന്നുമായിരുന്നു തച്ചങ്കരിയുടെ പരാതി.
അതീവരഹസ്യ വിഭാഗമായ ടി സെക്ഷന്‍ തന്റെ നേരിട്ടുള്ള നിയന്ത്രണത്തിലാക്കണമെന്നും ഫയലുകള്‍ ഉടന്‍ കൈമാറണമെന്നും ആവശ്യപ്പെട്ട് സെന്‍കുമാര്‍ നേരത്തെ ഉത്തരവിട്ടിരുന്നു. ഇതിന് പിന്നാലെയാണ് ബ്രാഞ്ചില്‍ നിന്ന് എ.ഡി.ജി.പി വിവരങ്ങള്‍ ചോര്‍ത്തിയെന്ന പരാതിയുമായി സെന്‍കുമാര്‍ രംഗത്തെത്തിയത്.