പാറ്റ്‌ന: പുലിത്തോലണിഞ്ഞ് ശംഖൂതി ശിവ ഭഗവാന്റെ വേഷത്തില്‍ നില്‍ക്കുന്ന ലാലു പ്രസാദ് യാദവിന്റെ മകന്‍ തേജ് പ്രതാപ് യാദവിന്റെ വീഡിയോ വൈറലാകുന്നു.
പാറ്റ്‌നയിലെ ശിവ ക്ഷേത്രത്തിനുള്ളില്‍ നടക്കുന്ന പൂജയിലാണ് ശിവന്‍ ധരിക്കുന്നതിന് സമാനമായ പുലിത്തോല്‍ അണിഞ്ഞ് തേജ്പ്രതാപ് ശംഖൂതിയത്. സമീപത്ത് തന്നെ ക്ഷേത്ര പൂജാരി ശിവവിഗ്രഹത്തില്‍ ആരതിയുഴിയുന്നതും വീഡിയോയില്‍ കാണാം.
എന്നാല്‍ പൂജ കഴിഞ്ഞ് പുറത്തിറങ്ങിയ തേജ് പ്രതാപിന്റെ രംഗങ്ങളാണ് സോഷ്യല്‍ മീഡിയയില്‍ ചിരി പടര്‍ത്തുന്നത്. ശിവവേഷത്തില്‍ ഒരു കയ്യില്‍ തൃശൂലവും മറുകൈയില്‍ ഉടുക്കുമായി ഇറങ്ങിയ തേജ് പ്രതാപ് ഷൂ ധരിച്ച് കാറിന് സമീപത്തേക്ക് നടന്ന് കാറില്‍ കയറാന്‍ പോകുന്ന രംഗങ്ങളുമാണ് സോഷ്യല്‍മീഡിയയില്‍ ചിരി പടര്‍ത്തിയത്.
ഇതാദ്യമായിട്ടില്ല ശിവഭഗവാന്റെ അവതാരത്തില്‍ തേജ് പ്രതാപ് യാദവ് പ്രത്യക്ഷപ്പെടുന്നത്. മെയ് 12 ന് തേജ് പ്രതാപിന്റെ വിവാഹത്തിന് മുന്‍പ് വധുവാന്‍ പോകുന്ന ഐശ്വര്യ റായിയെ പാര്‍വതിയാക്കിയാക്കിയും തേജ് പ്രതാപിനെ ശിവനാക്കിയുമുള്ള കട്ടൗട്ടുകളും പാര്‍ട്ടിക്കാര്‍ പുറത്തിറക്കിയിരുന്നു.
2017 ല്‍ പശുത്തൊഴുത്തില്‍ നിന്ന് തലയില്‍ മയില്‍പ്പീലി ചൂടി ഓടക്കുഴല്‍ വായിക്കുന്ന തേജ് പ്രതാപിന്റെ ചിത്രങ്ങളും സോഷ്യല്‍ മീഡിയയില്‍ പ്രചരിച്ചിരുന്നു.
ഇതിനിടെ സിനിമയിലും തേജ് പ്രതാപ് ഒരു പരീക്ഷണം നടത്തി. താന്‍ നായകനാകുന്ന രുദ്ര എന്ന ചിത്രത്തിന്റെ പ്രൊമോഷന്‍ പോസ്റ്റര്‍ അടുത്തിടെ ഇദ്ദേഹം ഇന്‍സ്റ്റഗ്രാമില്‍ പുറത്തുവിട്ടിരുന്നു.