മലയാളികള്‍ക്ക് ഏറെ പരിചിതനായ നടനാണ് ടിനി ടോം. മിമിക്രിയില്‍ നിന്നാണ് അദ്ദേഹം സിനിമയിലേക്ക് വരുന്നത്. 1998ല്‍ പുറത്തിറങ്ങിയ പഞ്ചപാണ്ഡവര്‍ ആയിരുന്നു ടിനി ടോമിന്റെ ആദ്യ സിനിമ. മമ്മൂട്ടി നായകനായ പട്ടാളം എന്ന ചിത്രത്തിലൂടെയാണ് ടിനി സിനിമയില്‍ ഏറെ ശ്രദ്ധിക്കപ്പെട്ടത്.
മമ്മൂട്ടി നായകനായ രഞ്ജിത്തിന്റെ പ്രാഞ്ചിയേട്ടന്‍ ആന്റ് ദി സെയിന്റ് എന്ന ചിത്രത്തിലൂടെയാണ് അദ്ദേഹത്തിന് കരിയര്‍ ബ്രേക്ക് ലഭിക്കുന്നത്. ടിനി ടോമിന്റെ കരിയറിലെ മികച്ച സിനിമകളില്‍ ഇന്നും ആളുകള്‍ ഓര്‍ക്കുന്ന സിനിമയാണ് ഇന്ത്യന്‍ റുപ്പി.
2011ല്‍ പൃഥിരാജ് സുകുമാരനെ നായകനാക്കി രഞ്ജിത്തായിരുന്നു ഈ സിനിമ സംവിധാനം ചെയ്തത്. ചിത്രത്തില്‍ തിലകനും ഒരു പ്രധാനവേഷത്തില്‍ എത്തിയിരുന്നു. ഇപ്പോള്‍ കാന്‍ ചാനല്‍ മീഡിയക്ക് നല്‍കിയ അഭിമുഖത്തില്‍ തിലകനെ കുറിച്ച് പറയുകയാണ് ടിനി ടോം.
‘തിലകന്‍ ചേട്ടന്‍ വളരെ രസികനായ നടനാണ്. അദ്ദേഹം അദ്ദേഹത്തിന്റെ ഉള്ളില്‍ ഒന്നും വെയ്ക്കില്ല എന്നതാണ് സത്യം. തനിക്ക് എന്താണോ പറയാനുള്ളത്, അത് ഒറ്റയടിക്ക് പറയും. മമ്മൂട്ടിയേക്കാള്‍ ഇഷ്ടം ദുല്‍ഖറിനെയാണെന്ന് പറയാന്‍ ഒരു മടിയും അദ്ദേഹത്തിനില്ല എന്നതാണ് മറ്റൊരു കാര്യം.
ആരെയെങ്കിലും പേടിക്കാനോ ആരുടെയെങ്കിലും ചൊല്‍പടിയില്‍ നില്‍ക്കാനോ തിലകന്‍ ചേട്ടനെ കിട്ടില്ല. ഇന്ത്യന്‍ റുപ്പിയുടെ സമയത്ത് ഒരു മാസത്തോളം ഞാന്‍ അദ്ദേഹത്തിന്റെ കൂടെ നിന്നിരുന്നു. അപ്പോള്‍ അദ്ദേഹത്തെ കുറിച്ച് നന്നായി മനസിലായിരുന്നു. തിലകന്‍ ചേട്ടന്‍ ഒരുപാട് തെറ്റിദ്ധരിക്കപ്പെട്ട ആളാണ്. അദ്ദേഹം എല്ലാ കാര്യം തുറന്നു പറയുമെന്ന് മാത്രമേയുള്ളൂ,’ ടിനി ടോം പറഞ്ഞു.
Content Highlight: Tini Tom Talks About Character Of Actor Thilakan
