സിനിമാലോകം ഏറെ ആകാംക്ഷയോടെ കാത്തിരിക്കുന്ന സിനിമകളിലൊന്നാണ് തഗ് ലൈഫ്. 37 വര്‍ഷത്തിന് ശേഷം മണിരത്‌നവും കമല്‍ ഹാസനും ഒന്നിക്കുന്ന ചിത്രമെന്ന നിലയില്‍ അനൗണ്‍സ്‌മെന്റ് മുതല്‍ക്കു തന്നെ വന്‍ ഹൈപ്പാണ് തഗ് ലൈഫിന് ലഭിച്ചത്. 10 വര്‍ഷത്തിന് ശേഷം കമല്‍ ഹാസന്‍ തിരക്കഥയെഴുതുന്ന ചിത്രം കൂടിയാണ് തഗ് ലൈഫ്. ചിത്രത്തിന്റെ ടൈറ്റില്‍ ടീസര്‍ സോഷ്യല്‍ മീഡിയയില്‍ ചര്‍ച്ചയായിരുന്നു. രംഗരായ ശക്തിവേല്‍ നായ്ക്കര്‍ എന്ന ഗ്യാങ്സ്റ്ററായാണ് കമല്‍ തഗ് ലൈഫില്‍ പ്രത്യക്ഷപ്പെടുന്നത്.
ഇപ്പോഴിതാ ചിത്രത്തിന്റെ റിലീസ് ഡേറ്റ് പ്രഖ്യാപിച്ചുകൊണ്ടുള്ള ടീസര്‍ പുറത്തുവന്നിരിക്കുകയാണ്. കമല്‍ ഹാസന്റെ പിറന്നാളിനോടനുബന്ധിച്ചാണ് അണിയറപ്രവര്‍ത്തകര്‍ പുറത്തുവിട്ടത്. ചിത്രത്തിന്റെ കഥയെപ്പറ്റി യാതൊരു സൂചനയും ടീസറില്‍ ലഭിച്ചിട്ടില്ല. തീപാറുന്ന ആക്ഷന്‍ ബ്ലോക്കുകള്‍ ചിത്രത്തിലുണ്ടെന്നുള്ള സൂചനയും ടീസര്‍ തരുന്നുണ്ട്.
ടീസറിന്റെ ഒടുവില്‍ ചെറുപ്പമായിട്ടുള്ള ലുക്കിലും ഉലകനായകന്‍ പ്രത്യക്ഷപ്പെടുന്നുണ്ട്. 2025 ജൂണ്‍ അഞ്ചിന് തഗ് ലൈഫ് തിയേറ്ററുകളിലെത്തും. തമിഴിന് പുറമെ തെലുങ്ക്, ഹിന്ദി, കന്നഡ, മലയാളം ഭാഷകളില്‍ ചിത്രം പുറത്തിറങ്ങും.
കമല്‍ ഹാസനൊപ്പം സിലമ്പരസനും ചിത്രത്തില്‍ പ്രധാനവേഷത്തിലെത്തുന്നുണ്ട്. ഇരുവരും തമ്മിലുള്ള കോമ്പിനേഷന്‍ സീനുകള്‍ക്കാണ് ആരാധകര്‍ കാത്തിരിക്കുന്നത്. ചിത്രത്തില്‍ കമല്‍ ഹാസന്റെ മകനായാണ് എസ്.ടി.ആര്‍. എത്തുന്നത്. ഈ വേഷത്തിലേക്ക് ആദ്യം പരിഗണിച്ചത് ദുല്‍ഖര്‍ സല്‍മാനെയായിരുന്നു. എന്നാല്‍ ദുല്‍ഖറിന് പല കാരണങ്ങള്‍ കൊണ്ട് ചിത്രത്തിന്റെ ഭാഗമാകാന്‍ സാധിക്കാതെ വന്നു.
കമല്‍ ഹാസനും എസ്.ടി.ആറിനും പുറമെ വന്‍ താരനിര തഗ് ലൈഫില്‍ അണിനിരക്കുന്നുണ്ട്. അശോക് സെല്വന്, ജോജു ജോര്‍ജ്, അഭിരാമി, നാസര്‍, തൃഷ, ഐശ്വര്യ ലക്ഷ്മി, സന്താനഭാരതി തുടങ്ങിയവര്‍ തഗ് ലൈഫിന്റെ ഭാഗമാകുന്നുണ്ട്. പൊന്നിയിന്‍ സെല്വന് ശേഷം മണിരത്‌നം അണിയിച്ചൊരുക്കുന്ന ചിത്രം കൂടിയാണ് തഗ് ലൈഫ്. രണ്ട് ഭാഗങ്ങളായി ഒരുങ്ങിയ പൊന്നിയിന്‍ സെല്വന് തമിഴില്‍ ഇന്‍ഡസ്ട്രി ഹിറ്റായി മാറിയിരുന്നു.
24 വര്‍ഷത്തിന് ശേഷം എ.ആര്‍. റഹ്‌മാനും കമല്‍ ഹാസനും ഒന്നിക്കുന്നുവെന്ന പ്രത്യേകതയും തഗ് ലൈഫിനുണ്ട്. 2000ത്തില്‍ പുറത്തിറങ്ങിയ തെനാലിയിലാണ് ഇരുവരും അവസാനമായി ഒന്നിച്ചത്. രവി കെ. ചന്ദ്രനാണ് തഗ് ലൈഫിന് വേണ്ടി ക്യാമറ ചലിപ്പിക്കുന്നത്. അന്‍പറിവ് ഡ്യൂയോ ഒരുക്കുന്ന ആക്ഷന്‍ രംഗങ്ങളും ചിത്രത്തിന്റ മാറ്റ് കൂട്ടുമെന്ന് ഉറപ്പാണ്. കമല്‍ ഹാസന്റെ ഉടമസ്ഥതയിലുള്ള രാജ്കമല്‍ ഫിലിംസും മണിരത്‌നത്തിന്റെ മദ്രാസ് ടാക്കീസും ചേര്‍ന്നാണ് ചിത്രം നിര്‍മിക്കുന്നത്.
Content Highlight: Thug Life release date teaser out