കോയമ്പത്തൂര്‍: തമിഴ്‌നാട്ടില്‍ വാഹനാപകടത്തില്‍ മൂന്ന് മലയാളികള്‍ മരിച്ചു. കോയമ്പത്തൂരിനടുത്ത് മഥുക്കരയിലാണ് അപകടമുണ്ടായത്.
പത്തനംതിട്ട ഇരവിപേരൂര്‍ സ്വദേശികളായ ജേക്കബ് എബ്രഹാം, ഷീബ ജേക്കബ്, ഇവരുടെ കൊച്ചുമകന്‍ രണ്ട് മാസം പ്രായമുള്ള ആരോണ്‍ ജേക്കബ് എന്നിവരാണ് അപകടത്തില്‍ മരിച്ചത്.
കേരളത്തില്‍ നിന്ന് ബെംഗളൂരുവിലേക്ക് പോവുന്ന യാത്രാ മധ്യേയാണ് അപകടമുണ്ടായതെന്നാണ് റിപ്പോര്‍ട്ടുകള്‍.
എതിര്‍ദിശയില്‍ നിന്നും വന്ന ലോറി ഇവര്‍ സഞ്ചരിച്ചിരുന്ന വാഹനവുമായി ഇടിച്ചാണ് അപകടം. വാഹനത്തിന്റെ മുന്‍ സീറ്റിലായിരുന്നു മരിച്ച ദമ്പതികള്‍.
അപകടത്തില്‍ കാറിന്റെ മുന്‍വശം പൂര്‍ണമായി തകര്‍ന്നതായും സംഭവ സ്ഥലത്തുതന്നെ മൂന്ന് പേരും മരണപ്പെടുകയായിരുന്നുവെന്നും മാധ്യമങ്ങള്‍ റിപ്പോര്‍ട്ട് ചെയ്യുന്നു.
വാഹനത്തില്‍ ഇവര്‍ക്കൊപ്പം സഞ്ചരിച്ചിരുന്ന മരുമകളായ അലീനയെ ഗുരുതര പരിക്കുകളോടെ ആശുപത്രിയില്‍ പ്രവേശിപ്പിച്ചിട്ടുണ്ട്. കോയമ്പത്തൂരിന് സമീപത്തുള്ള സുന്ദരപുരത്തെ അഭിരാമി ആശുപത്രിയിലാണ് അലീനയെ പ്രവേശിപ്പിച്ചിട്ടുള്ളതെന്നാണ് റിപ്പോര്‍ട്ട്.
ലോറി ഡ്രൈവറെ കസ്റ്റഡിയിലെടുത്തതായും മാധ്യമങ്ങള്‍ റിപ്പോര്‍ട്ട് ചെയ്തു.
Content Highlight: Three Malayalees died in a car accident in Tamil Nadu