ലോകകപ്പില്‍ ഗ്രൂപ്പ് സിയില്‍ അര്‍ജന്റീനക്ക് കാര്യങ്ങള്‍ കൂടുതല്‍ കടുപ്പമാകും. പോളണ്ടിനെതിരായ മത്സരത്തില്‍ സൗദി അറേബ്യ പരാജയപ്പെട്ടതോടെയാണ് ഇനിയുള്ള രണ്ട് മത്സരങ്ങളും വിജയിക്കാന്‍ മെസിയുടെ അര്‍ജന്റീന നിര്‍ബന്ധിതരായത്. ഒരു മത്സരം സമനില വഴങ്ങിയാലും ടീം പ്രയാസപ്പെടും.
ആദ്യ മത്സരത്തില്‍ അര്‍ജന്റീനയെ അട്ടിമറിച്ചതിന്റെ ആത്മവിശ്വാസത്തില്‍ പോളണ്ടിനെ നേരിടാനെത്തിയ
സൗദി അറേബ്യ രണ്ട് ഗോളിന്റെ പരാജയാണ് ഏറ്റുവാങ്ങിയത്. 39ാം മിനിറ്റില്‍ പിയോറ്റര്‍ സിയെലിന്‍സ്‌കിയും 82ാം മിനിറ്റില്‍ റോബര്‍ട്ട് ലെവന്‍ഡോസ്‌കിയുമാണ് പോളണ്ടിനായി വലകുലുക്കിയത്.
മത്സരത്തില്‍ സൗദി നല്ല കളി കാഴ്ചവെച്ചെങ്കിലും പോളണ്ട് ഗോള്‍കീപ്പര്‍ വോയ്സിയെച്ച് സെസ്നിയുടെ മികച്ച പ്രകടനം തിരിച്ചടിയായി. സൂപ്പര്‍ താരം റോബര്‍ട്ട് ലെവന്‍ഡോസ്‌കിയുടെ ആദ്യ ലോകകപ്പ് ഗോളിനും മത്സരം സാക്ഷിയായി.
ഇതോടെ കളിച്ച രണ്ട് മത്സരങ്ങളില്‍ ഒരു വിജയവും ഒരു സമനിലയുമായി പോളണ്ട് ഗ്രൂപ്പില്‍ ഒന്നാമതാണ്. പോളണ്ടിനോട് തോറ്റെങ്കിലും ആദ്യ മത്സരത്തില്‍ അര്‍ജന്റീനയെ പരാജപ്പെടുത്തിയതിന്റെ മികവില്‍ മൂന്ന് പോയിന്റുള്ള സൗദി ഇപ്പോഴും രണ്ടാമതുണ്ട്. ഞായറാഴ്ച നടക്കുന്ന മെക്‌സിക്കോ- അര്‍ജന്റീന മത്സരം പൂര്‍ത്തിയാകുന്നതോടെ ഈ ഗ്രൂപ്പിന്റെ ഏകദേശ ചിത്രം തെളിയും.
LEWAND⚽️WSKI #FIFAWorldCup | #POL pic.twitter.com/RLXD0rNcg8
— FIFA World Cup (@FIFAWorldCup) November 26, 2022
