വിവാദം കത്തിപ്പടര്‍ന്ന കഥ
മലയാള സിനിമയില്‍ നടന്‍ തിലകനെ വിലക്കിയതുമായി ബന്ധപ്പെട്ടുണ്ടായ വിവാദം കത്തിക്കയറുകയാണ്. ഇടപെടുന്നവരെല്ലാം വിവാദക്കുരുക്കില്‍പ്പെടുന്നു. സിനിമയിലെ കത്തി ഡയലോഗുകളെ വെല്ലുന്ന വാക് പോരുകളാണ് ചാനല്‍ മുറികളില്‍ നടക്കുന്നത്. തിലകനും ഉണ്ണികൃഷ്ണനും മമ്മൂട്ടിയും മോഹന്‍ലാലും കടന്ന് ഇപ്പോഴത് സുകുമാര്‍ അഴീക്കോടിലും ടി പദ്മനാഭനിലുമെത്തി നില്‍ക്കുന്നു.
പലരുടെയും മേക്കപ്പുകള്‍ പൊളിഞ്ഞു വീണു, മുഖം മൂടികള്‍ അഴിഞ്ഞു. ഒരു നടന്റെ ആത്മരോദനം കേട്ടില്ലെന്ന് നടിച്ചവര്‍ക്ക് ഒടുവില്‍ പ്രതികരിക്കേണ്ടി വന്നു. തിലകന് വിവാദത്തിന്റെ നാള്‍വഴികളിലേക്ക് ഒരു അന്വേഷണം
തിലകനെ മലയാള സിനിമയില്‍ നിന്ന് വിലക്കിയതായി ആദ്യമായി ഒരു വാര്‍ത്ത വരുന്നു. കേരളഫഌഷ് ന്യൂസ് ഉള്‍പ്പെടെയുള്ള മാധ്യമങ്ങള്‍ ആ വാര്‍ത്ത പ്രസിദ്ധീകരിച്ചു.
വിനയന്റെ “യക്ഷിയും ഞാനും” എന്ന സിനിമയില്‍ അഭിനയിച്ചതിന് ഫെഫ്ക, അമ്മ, പ്രൊഡ്യൂസേഴ്സ് അസോസിയേഷന്‍ എന്നീ സംഘടനകള്‍ രഹസ്യ യോഗം ചേര്‍ന്ന് തിലകനെ വിലക്കിയെന്നായിരുന്നു ആ വാര്‍ത്ത., മാള അരവിന്ദന്‍ , സ്ഫടികം ജോര്‍ജ് എന്നിവര്‍ക്കും വിലക്കുണ്ടെന്നും റിപ്പോര്‍ട്ടില്‍ പറയുന്നു. ഇതിന്റെ ഭാഗമായി തിലകനുമായി കരാറിലേര്‍പ്പെട്ട ജോഷിയുടെ ക്രിസ്ത്യന്‍ ബ്രദേഴ്സ്ലില്‍ നിന്ന് തിലകനെ ഒഴിവാക്കി.
മാഫിയ സംഘങ്ങള്‍
അമ്മയും ഫെഫ്കയുടെയും നീക്കത്തിനെതിരെ രൂക്ഷമായ പ്രതികരണവുമായാണ് തിലകന് രംഗത്തെത്തിയത്. ഈ സംഘടനകള്‍ മാഫിയ സംഘങ്ങളാണെന്ന് തിലകന് തുറന്നടിച്ചു. ക്രിസ്ത്യന്‍ ബ്രദേഴ്‌സില്‍ നിന്നും തന്നെ ഒഴിവാക്കിയതിന് പിന്നില്‍ ഒരു സൂപ്പര്‍ താരത്തിനും പങ്കുണ്ടെന്ന് തിലകന് വ്യക്തമാക്കി. “ക്രിസ്ത്യന്‍ ബ്രദേഴ്‌സ് നിര്‍മ്മാതാവ് കഴിഞ്ഞ നവംബറില്‍ തന്റെയടുത്ത് നേരിട്ടെത്തിയാണ് സിനിമയിലേക്ക് ഡേറ്റ് വാങ്ങിയത്. ഇതിനായി അഡ്വാന്‍സും തന്നിരുന്നു. എന്നാല്‍ പിന്നീട് നിര്‍മ്മാതാവ് സുബൈര്‍ തന്നെ ഫോണില്‍ വിളിച്ച് പറഞ്ഞത് തന്നെ അഭിനയിപ്പിക്കാന്‍ ഫെഫ്ക അനുവദിക്കുന്നില്ലെന്നാണ്. അമ്മക്ക് ഇതില്‍ പങ്കില്ലെന്നും പുറഞ്ഞു. എന്നാല്‍ അമ്മയാണ് മുഖ്യ പ്രതിയെന്ന് തനിക്ക് വ്യക്തമായിട്ടുണ്ട്. തന്നെ അഭിനയിപ്പിച്ചാല്‍ ഒരു സൂപ്പര്‍ സ്റ്റാറിന്റെ ഇമേജ് തകരുമെന്നാണ് പറഞ്ഞത്. ആ സൂപ്പര്‍ സ്റ്റാറിന്റെ അഭിമാനം നോക്കിയേ മലയാള സിനിമ വളരൂവെന്നതാണ് സ്ഥിതി”- എന്നിങ്ങനെയായിരുന്നു തിലകന്റെ പ്രസ്താവന.
കൂളിങ് ഗ്ലാസ്
അടുത്ത ദിവസങ്ങളില്‍ ചാനല്‍ ചര്‍ച്ചകളില്‍ തിലകന് പ്രധാന അഥിതിയായെത്തി. കിട്ടിയ അവസരം തിലകന് ഏറെക്കുറെ ഫലപ്രദമായി ഉപയോഗിച്ചു. നാനൂറോ അഞ്ഞൂറോ കൂളിംഗ് ഗ്ലാസ് വാങ്ങിവെച്ചതുകൊണ്ട് നല്ല കലാകാരനാകില്ലെന്ന് തിലകന് വെച്ചടിച്ചു. ( മലയാളം സൂപ്പര്‍ സ്റ്റാറുകളില്‍ കൂളിഗ് ഗ്ലാസ് കൂടുതലായി ഉപയോഗിക്കുന്നത് മമ്മൂട്ടിയായതിനാല്‍ തിലകന്റെ ഉന്നം മമ്മൂട്ടിയാണെന്ന് ആദ്ദേഹത്തിന്റെ ആരാധകര്‍ക്കും ചില മാധ്യമങ്ങള്‍ക്കും തോന്നി. നടന്‍ ആരെന്ന് തിലകനെ കൊണ്ട് പറയിക്കാന്‍ ചാനല്‍ ചോദ്യ വിദഗ്ധര്‍ പഠിച്ച പണി പതിനെട്ടുമെടുത്തെങ്കിലും അക്കാര്യം മാത്രം തിലകന് മിണ്ടിയില്ല- ഏത്, അച്ഛന്‍ പത്തായത്തില്‍ കൂടിയില്ലെന്ന്.)
ധര്‍ണയും പ്രകടനവും
തിലകന് വേണ്ടി തിലകന് മാത്രമായിരുന്നു ഇതുവരെ. ആദ്യമായി പുറത്ത് നിന്ന് ഇടപെടലുണ്ടായി. തിലകന് പിന്തുണയുമായി മലയാള വേദിയുടെ നേതൃത്വത്തില്‍ തൃശൂര്‍ കോര്‍പറേഷന്‍ ഓഫിസിനു മുന്നില്‍ ധര്‍ണ നടന്നു. വികാര നിര്‍ഭരമായിരുന്നു പരിപാടിയില്‍ പങ്കെടുത്ത് തിലകന്റെ പ്രസംഗം. “ക്യാമറക്കു മുന്നില്‍ നിന്നു മരിക്കണമെന്നാണ് ആഗ്രഹം. ആസിഡ് ബള്‍ബിനു മുന്‍പില്‍ നിന്നു നാടകം കളിച്ചയാളാണു ഞാന്‍. എന്നെ ഗുണ്ടായിസം കൊണ്ടു തടയാനാവില്ല. നോട്ടീസ് പോലും നല്‍കാതെ വിലക്കേര്‍പ്പെടുത്തിയതു തന്തയില്ലായ്മയാണ്. തീയില്‍ കൊരുത്ത ഞാനീ പൊരിവെയിലത്തു വാടില്ല”- തിലകന് പറഞ്ഞു വെച്ചു.
കമ്യൂണിസ്റ്റുകാരന്‍
താനൊരു കമ്യൂണിസ്റ്റ്കാരനായിട്ടും പാര്‍ട്ടിയും ചാനലും തന്നെ സഹായിച്ചില്ലെന്ന് തിലകന് പറഞ്ഞു. ഇത് പ്രമുഖ താരത്തിന്റെ സമ്മര്‍ദം കൊണ്ടാണെന്നും അദ്ദേഹം ആലപ്പുഴയില്‍ പറഞ്ഞു. മാക്ടയും എ ഐ ടി യു സിയും തിലകന് പിന്നില്‍ പാറ പോലെ ഉറച്ച് നിന്നു. തിലകന് വിവാദത്തില്‍ ഇടപെടില്ലെന്നും സി പി ഐക്ക് മാക്ടയും ഫെഫ്കയും ഒരു പോലെയാണെന്നുമുള്ള വാദവുമായി ഇസ്മയില്‍ സഖാവ് സൂപ്പര്‍ സ്റ്റാര്‍ ഭക്തി പ്രകടിപ്പിച്ചു. എന്നാല്‍ കാനത്തിന് അതിലെ ന്യായം മനസിലായില്ല. മാക്ട എ ഐ ടി യുസിയില്‍ അംഗത്വമുള്ള സംഘടനയാണെന്നും പിന്നെങ്ങിനെ ഇടപെടാതിരിക്കുന്നതെന്നുമായി കാനം. തൊഴിലാളി പ്രശ്‌നത്തിലിടപെടുന്നില്ലെങ്കില്‍ പിന്നെന്ത് കമ്യൂണിസ്റ്റ് പാര്‍ട്ടിയെന്ന് തിലകന് സി പി ഐ വേദിയില്‍ കയറിച്ചെന്ന് ചോദിച്ചു.
രാജി വാഗ്ദാനവുമായി ഉണ്ണികൃഷ്ണന്‍
തിലകന്റെ ആരോപണം കൈവിടുമെന്ന ഘട്ടമെത്തിയപ്പോള്‍ ഫെഫ്ക ജനറല്‍ സെക്രട്ടറി ബി ഉണ്ണികൃഷ്ണന്‍ രംഗത്തെത്തി. ക്രിസ്ത്യന്‍ ബ്രദേഴ്‌സ് സിനിമയില്‍ നിന്ന് തിലകനെ ഒഴിവാക്കണമെന്നാവശ്യപ്പെട്ട് താന്‍ കത്തെഴുതിയെന്ന് തെളിയിച്ചാല്‍ ഫെഫ്ക ജനറല്‍ സെക്രട്ടറി സ്ഥാനത്ത് നിന്ന് രാജിവെക്കാമെന്ന് ഉണ്ണികൃഷ്ണന്‍ പറഞ്ഞു.
അമ്മയും രംഗത്ത്
അമ്മ അംഗങ്ങളെ പരസ്യമായി അധിക്ഷേപിച്ചതിന് നടന്‍ തിലകന് ഖേദം പ്രകടിപ്പിക്കണമെന്ന് അമ്മ പ്രസിഡന്റ് ഇന്നസെന്റ്. അല്ലാത്തപക്ഷം തിലകനെതിരെ അച്ചടക്ക നടപടിയെടുക്കുമെന്നും ഇന്നസെന്റ് വാര്‍ത്താ സമ്മേളനത്തില്‍ പറഞ്ഞു. തിലകന്റെ ആരോപണങ്ങളെക്കുറിച്ച് ചര്‍ച്ച ചെയ്യാന്‍ ചേര്‍ന്ന അമ്മയുടെ എക്‌സിക്യൂട്ടിവ് കമ്മിറ്റിക്കുശേഷമായിരുന്നു ഇന്നസെന്റിന്റെ പ്രസ്താവന.
തിലകന് പരാതിയുണ്ടെങ്കില്‍ അത് അമ്മക്കാണ് നല്‍കേണ്ടത്. മറിച്ച് ടി വി ചാനലുകളിലൂടെ അമ്മ മാഫിയ സംഘമാണെന്ന് വിളിച്ചു പറയുകയല്ല. അങ്ങിനെയെങ്കില്‍ അമ്മയില്‍ നിന്ന് പെന്‍ഷനായി ലഭിക്കുന്ന തുക അദ്ദേഹം സ്വീകരിക്കുന്നതെന്തിനാണെന്ന് വ്യക്തമാക്കണം. രാഷ്ട്രീയത്തെയും ജാതിയെയും കൂട്ട് പിടിച്ചാണ് തിലകന് കളിക്കുന്നതെന്നും ഇന്നസെന്റ് പറഞ്ഞു. ( അവശ കലാകരന്‍മാര്‍ക്ക് അമ്മ നല്‍കുന്ന 2000 രൂപ തന്നെ അവശനായി പ്രഖ്യാപിക്കുന്നതിനുള്ള അമ്മയുടെ നീക്കമാണെന്ന് തിലകന് തിരിച്ചറിഞ്ഞിരുന്നു. അതിനാല്‍ ആദ്യം തിലകന് സഹായം നിരസിച്ചുവെന്നാണ് വിവരം. പിന്നെ നിര്‍ബന്ധിച്ചപ്പോള്‍ അതങ്ങ് വാങ്ങി.)
വധ ഭീഷണിയും സാംസ്കാരിക വകുപ്പും
തനിക്ക് നേരെ വധ ഭീഷണിയുണ്ടായെന്ന് നടന്‍ തിലകന് മാധ്യമങ്ങളോട് വെളിപ്പെടുത്തി. നടന്‍ തിലകന് നേരെ വധ ഭീഷണിയുണ്ടെങ്കില്‍ അത് അന്വേഷിക്കുമെന്ന് മന്ത്രി എം എ ബേബി പറഞ്ഞു. അനുഗ്രഹീത നടനാണ് തിലകന് . മലയാള സിനിമയിലെ പ്രതിസന്ധി സിനിമാ ലോകത്തിന് തന്നെ പരിഹരിക്കാന്‍ കഴിയുമെന്നാണ് കരുതുന്നത്. അല്ലാത്ത പക്ഷം സര്‍ക്കാര്‍ ഇടപെടുമെന്നും ബേബി വ്യക്തമാക്കി.( കൈവിട്ട് പറയാന്‍ ബേബി തയ്യാറായില്ല. ഒരു തിലകന് വേണ്ടി തന്റെ “സാംസ്കാരിക” സൗഹൃദങ്ങളെ കുരുതി കൊടുക്കാന്‍ ബേബി തയ്യാറല്ലായിരുന്നു. സൂപ്പറുകളെ വെറുപ്പിച്ചാല്‍ വൈകീട്ടത്തെ പരിപാടിയെല്ലാം പൊളിയും. പരമാവധി കളി കണ്ട് നില്‍ക്കാം അടിയായല്‍ പിടിക്കാം. അത്ര തന്നെ).
ആര് ഖേദിക്കണം
തിലകന് നിരുപാധികം പ്രസ്താവന പിന്‍വലിച്ച് ഖേദം പ്രകടിപ്പിക്കണമെന്ന് ഫെഫ്ക ഭാകവാഹികള്‍ ആവശ്യപ്പെട്ടു. ഫെഫ്കക്കെതിരെ ഉന്നയിച്ച ആരോപണങ്ങള്‍ പിന്‍വലിക്കുന്നതുവരെ തിലകനുമായി സഹകരിക്കേണ്ടതില്ലെന്ന് ഫെഫ്ക ജനറല്‍ കൗണ്‍സില്‍ യോഗ തീരുമാനം.
എന്നാല്‍ താന്‍ ഖേദം പ്രകടിപ്പിക്കില്ലെന്നും ഖേദിക്കേണ്ടത് ഫെഫ്ക ജനറല്‍ സെക്രട്ടറിയാണെന്നും തിലകന് തിരിച്ചടിച്ചു. പഴയ മാഫിയ ആരോപണത്തില്‍ ഉറച്ച് നില്‍ക്കുന്നതായും തിലകന് പറഞ്ഞു.
അച്ചടക്ക സമിതി
തിലകനെതിരെ താരസംഘടനയായ അമ്മ അച്ചടക്കസമിതി രൂപീകരിക്കുന്നു. അമ്മ പ്രസിഡന്റ് നടന്‍ ഇന്നസെന്റിന്റെ അധ്യക്ഷതയില്‍ അഞ്ചംഗ അച്ചടക്ക സമിതി നിലവില്‍ വന്നു. അമ്മ സെക്രട്ടറി ഇടവേള ബാബു, നടന്‍മാരായ കുഞ്ചന്‍ , ടി.പി.മാധവന്‍ , ജനാര്‍ധനന്‍ എന്നിവര്‍ സമിതിയിലെ അംഗങ്ങള്‍ .
(ഇതിനിടെ വിവാദം ഫാന്‍സ് അസോസിയേഷനുകള്‍ (തിലകന്റെ ഭാഷയില്‍ ഗുണ്ടാസംഘങ്ങള്‍ ) ഏറ്റെടുത്തിരുന്നു. തിയേറ്ററില്‍ നിന്ന് കൂക്കുന്ന അതേ ആവശത്തോടെ അവര്‍ തിലകനെതിരെ രംഗത്ത് വന്നു. കോലം കത്തിക്കലായി, വധ ഭീഷണിയായി, തിലകനെ കണ്ടാല്‍ തട്ടുമെന്നായി ഫാന്‍സുകാര്‍ ).
മമ്മൂക്കക്ക് വേണ്ടി സ്വന്തം ലാലേട്ടന്‍
കൂളിങ് ഗ്ലാസ്, രസതന്ത്രം തുടങ്ങി തിലകന് നല്‍കിയ സൂചന വെച്ച് മമ്മൂട്ടി ആരാധകര്‍ രംഗത്തിറങ്ങിയപ്പോള്‍ ലാലിന് തോന്നി തന്റെ ആരാധകരെയും രംഗത്തിറക്കണമെന്ന്. അങ്ങിനെയദ്ദേഹം മമ്മൂട്ടിക്ക് വേണ്ടി രംഗത്തെത്തി. മമ്മൂട്ടിയെ ഒറ്റപ്പെടുത്തി ആക്രമിക്കാന്‍ ആരു ശ്രമിച്ചാലും അമ്മ ഒറ്റക്കെട്ടായി നേരിടുമെന്നായിരുന്നു അമ്മ ജനറല്‍ സെക്രട്ടറി കൂടിയായ ലാലിന്റെ പ്രസ്താവന. അടിസ്ഥാനമില്ലാത്ത ആരോപണങ്ങള്‍ കേള്‍ക്കുമ്പോള്‍ മമ്മൂട്ടിക്കുണ്ടായ വേദന സംഘടനയിലെ ഓരോരുത്തരുടേയും വേദനയാണെന്നും മോഹന്‍ലാല്‍ വ്യക്തമാക്കി.
അമ്മയും മമ്മൂട്ടിയും ഇത്രയും കാലം പ്രതികരിക്കാതിരുന്നതു ഭീരുത്വമായി കാരണരുത്. മുതിര്‍ന്ന ഒരാളോടു കാണിക്കേണ്ട മര്യാദ മാത്രമാണ് തിലകനോട് കാണിച്ചത്. സൂപ്പര്‍ സ്റ്റാറുകള്‍ വന്നതോടെ സിനിമയിലെ നന്മപോയെന്നാണു തിലകന് പറയുന്നത്. ഞങ്ങളോടൊപ്പം നിരവധി സിനിമകളിലഭിനയിച്ച തിലകന് അപ്പോഴൊന്നും ഇതു പറഞ്ഞിട്ടില്ല. തിലകന്റെ റോള്‍ തട്ടിപ്പറിക്കാന്‍മാത്രം ചെറിയ മനസാണ് മമ്മൂട്ടിയുടെതെന്ന് കേരളം വിശ്വസിക്കില്ല. മമ്മൂട്ടി എന്ന മനുഷ്യന്റെ നന്മ ഒരിക്കലെങ്കിലും അനുഭവിച്ചവരാകും മലയാള സിനിമയിലെ ഓരോരുത്തരും- ഇങ്ങിനെ പോകുന്നു ലാലിന്റെ മമ്മൂട്ടി സ്തുതി ഗീതങ്ങള്‍ .
അഴീക്കോടിന്റെ വേദന
തി ലകനും ഫെഫ്ക്കയും തമ്മില്‍ നടക്കുന്ന പോര് കേരളം കണ്ട് നില്‍ക്കുമ്പോള്‍ അഴീക്കോടിന് നോക്കി നില്‍ക്കാന്‍ കഴിഞ്ഞില്ല. താരങ്ങള്‍ക്ക് മിന്നാന്‍ ആകാശമൊരുക്കിയ നടനാണ് തിലകനെന്ന അഴീക്കോടിന്റെ പ്രസ്താവന തിലകനെ പോലും ഞെട്ടിച്ചു. അഞ്ച് കോടി രൂപ വാങ്ങിയാണ് മമ്മൂട്ടി അഭിനയിക്കുന്നത്. തിലകന് വിലക്കേര്‍പ്പെടുത്തിയത് കലാകേരളത്തെ വിലക്കുന്നതിന് തുല്യമാണെന്നും താര സംഘടന തന്നെ അദ്ദേഹത്തെ വിലക്കുന്നത് ഉപ്പിന്റെ ഉപ്പ് നഷ്ടപ്പെടുന്നതിന് തുല്യമാണെന്നും അഴീ ക്കോട് പറഞ്ഞു. മോഹന്‍ലാല്‍ സിനിമയിലൂടെ ലഭിച്ച പ്രശസ്തി പരസ്യത്തിലൂടെ വില്‍ക്കുകയാണെന്നും അഴീക്കോട് ആവര്‍ത്തിച്ചു.
കഞ്ഞിയില്‍ മണ്ണിടരുത്; ലാല്‍ അഴീക്കോടിനെ വിളിക്കുന്നു
വിവാദം നിര്‍ണായകമായ വഴിത്തിരിവിലെത്തുന്നത് ഈ വിളിയോടെയാണ്. തന്റെ പരസ്യ അഭിനയത്തോടുള്ള വിമര്‍ശനത്തിനെതിരെ പരാതി പറയാന്‍ മോഹന്‍ലാല്‍ അഴീക്കോടിനെ വിളിച്ചു. വിളിച്ചത് തിരുവനന്തപുരത്ത് നിന്നാണോ ദുബൈയില്‍ നിന്നാണോ എന്നുള്ള സംശയം അവിടെ നില്‍ക്കട്ടെ. അഴീക്കോടിന്റെ വാക്കുകള്‍ തന്നെ വല്ലാതെ വേദനിപ്പിച്ചതായി ലാല്‍ ഫോണിലൂടെ പരാതിപ്പെട്ടു.
സംസാരം സിനിമയിലെ തര്‍ക്കങ്ങളിലേക്ക് വഴുതി മാറി. ഇരുവരും പറഞ്ഞതെന്താണെന്ന് ഇരുവര്‍ക്കും മാത്രമേ അറിയൂ. തിലകനും അമ്മയും ഒരു മേശക്കു ചുറ്റുമിരിക്കാമെന്നും താന്‍ മധ്യസ്ഥം വഹിക്കണമെന്നും പറഞ്ഞതായി അഴീക്കോട് പറഞ്ഞു. എന്നാല്‍ ഞാനങ്ങിനെ പറഞ്ഞിട്ടില്ലെന്നും അഴീക്കോടിന് മതിഭ്രമമാണെന്നുമായി മോഹന്‍ലാല്‍ . മതിഭ്രമം എനിക്കല്ല ലാലിനാണെന്ന് അഴീക്കോടും.
പറയുമ്പോള്‍ പിന്നെ അഴീക്കോടിന് ഒരു സ്വഭാവമുണ്ട് എല്ലാമങ്ങ് പറഞ്ഞ് കളയും ലാലിന്റെ മേക്കപ്പിനെക്കുറിച്ചും പാട്ട് സീനിനെക്കുറിച്ചുമെല്ലാം പറഞ്ഞ് അഴീക്കോട് അപ്രിയ സത്യങ്ങള്‍ തുറന്നടിച്ചു.
എന്നാല്‍ അഴീക്കോടിന്റെ പഴയ ശത്രുക്കളെല്ലാം സട കുഞ്ഞെണീറ്റിരിക്കയാണിപ്പോള്‍. അഴീക്കോടിന് കുറച്ച് കാലമായി മാനസിക പ്രശ്‌നമുണ്ടെന്ന പ്രസ്താവനയുമായി ടി പദ്മനാഭന്‍ രംഗത്ത് വന്നു. ശത്രുവിന്റെ ശത്രു മിത്രം. സിനിമ തിയേറ്ററിലല്ല ചാനലിലാണ് ഇടിപൊട്ടുന്ന ഡയലോഗുകള്‍ , തെറിവളികള്‍ . സങ്കടങ്ങള്‍ …
ശേഷം സ്ക്രീനില്‍ ….