ന്യൂദൽഹി: ഇന്ത്യക്കുള്ള യു.എസ് സഹായം നിർത്തലാക്കിയതിനെ ന്യായീകരിച്ച് അമേരിക്കൻ പ്രസിഡന്റ് ഡൊണാൾഡ് ട്രംപ്. ശതകോടീശ്വരനായ എലോൺ മസ്‌കിന്റെ നേതൃത്വത്തിലുള്ള യു.എസ് ഗവൺമെന്റ് എഫിഷ്യൻസി വകുപ്പ് , ഇന്ത്യയിലെ വോട്ടർമാരുടെ വോട്ടെടുപ്പിനായി അനുവദിച്ചിരുന്ന 21 മില്യൺ ഡോളർ സഹായം വെട്ടിച്ചുരുക്കിയിരുന്നു. ഈ നീക്കത്തെ പിന്തുണച്ചാണ് ട്രംപ് ഇപ്പോൾ രംഗത്തെത്തിയിരിക്കുന്നത്.

വോട്ടർമാരുടെ പങ്കാളിത്തത്തിനായി ഇന്ത്യയ്ക്ക് 21 മില്യൺ ഡോളർ നൽകേണ്ട ആവശ്യകത എന്താണെന്ന് ട്രംപ് ചോദിച്ചു. ലോകത്തിലെ ഏറ്റവും ഉയർന്ന നികുതി ചുമത്തുന്ന രാജ്യങ്ങളിലൊന്നാണ് ഇന്ത്യ എന്നും അവർക്ക് തങ്ങൾ പണം നൽകേണ്ട ആവശ്യകതയില്ലെന്നും ട്രംപ് പറഞ്ഞു. വളർന്നുവരുന്ന സമ്പദ്‌വ്യവസ്ഥയും ഉയർന്ന നികുതി നിരക്കും ഉള്ള ഇന്ത്യയ്ക്ക് അത്തരം സാമ്പത്തിക സഹായം ആവശ്യമില്ലെന്ന് ട്രംപ് കൂട്ടിച്ചേർത്തു.

‘നമ്മൾ എന്തിനാണ് ഇന്ത്യയ്ക്ക് 21 മില്യൺ ഡോളർ നൽകുന്നത്? അവർക്ക് കൂടുതൽ പണമുണ്ട്. നമ്മളെ അപേക്ഷിച്ച് ലോകത്തിലെ ഏറ്റവും ഉയർന്ന നികുതി ചുമത്തുന്ന രാജ്യങ്ങളിലൊന്നാണ് അവർ. അവരുടെ താരിഫ് വളരെ ഉയർന്നതിനാൽ ഞങ്ങൾക്ക് അവിടെ എത്താൻ പ്രയാസമാണ്. ഇന്ത്യയെയും അവരുടെ പ്രധാനമന്ത്രിയെയും ഞാൻ വളരെയധികം ബഹുമാനിക്കുന്നു, പക്ഷേ വോട്ടർമാരുടെ വോട്ടിനായി 21 മില്യൺ ഡോളർ എന്തിന് നൽകണം?,’ ട്രംപ് പറഞ്ഞു.

ഫെബ്രുവരി 16 ന് എലോൺ മസ്‌കിന്റെ നേതൃത്വത്തിലുള്ള ഡോഗ് ഇന്ത്യയിലെ വോട്ടർമാരുടെ പങ്കാളിത്തത്തിനായി നൽകി വന്നിരുന്ന 21 മില്യൺ യു.എസ് ഡോളർ ധനസഹായം റദ്ദാക്കുന്നതായി പ്രഖ്യാപിച്ചു.

എക്‌സിലെ ഒരു പോസ്റ്റിൽ ഡോഗ് റദ്ദാക്കിയ യു.എസ് നികുതിദായകരുടെ ചെലവുകളുടെ തുക പട്ടികപ്പെടുത്തിയിരുന്നു. അതിൽ ഇന്ത്യയിലെ വോട്ടർമാരുടെ വോട്ടെടുപ്പിന് നൽകിയിരുന്ന 21 മില്യൺ യുഎസ് ഡോളർ നിർത്തലാക്കുന്നതായി പ്രസിദ്ധീകരിച്ചു.

‘യു.എസ് നികുതിദായകരുടെ ഡോളർ താഴെപ്പറയുന്ന ഇനങ്ങൾക്കായി ചെലവഴിച്ചിരുന്നു. എന്നാൽ അവയെല്ലാം റദ്ദാക്കിയിരിക്കുകയാണ്,’ മസ്‌കിന്റെ നേതൃത്വത്തിലുള്ള വകുപ്പ് എക്‌സിൽ പ്രഖ്യാപിച്ചു.

ഈ വെട്ടിക്കുറയ്ക്കൽ, ഇരു രാജ്യങ്ങളിലെയും തെരഞ്ഞെടുപ്പ് പ്രക്രിയകളും രാഷ്ട്രീയ സ്ഥിരതയും മെച്ചപ്പെടുത്തുന്നതിന് ലക്ഷ്യമിട്ടുള്ള പ്രധാന സംരംഭങ്ങളെ ബാധിക്കും. യു.എസ് വിദേശ സഹായ മുൻഗണനകളുടെ പുനർമൂല്യനിർണയത്തെയും അന്താരാഷ്ട്ര വികസന പദ്ധതികൾക്കുള്ള ചെലവ് കുറയ്ക്കുന്നതിനുള്ള വിശാലമായ നീക്കത്തെയും ഈ വെട്ടിക്കുറവുകൾ പ്രതിഫലിപ്പിക്കുന്നു.

Content Highlight:  They have a lot of money’: Donald Trump defends move to cancel $21 million fund on ‘voter turnout in India