'ചാഹലിന് കോഹ്‌ലി വെറും ചങ്കല്ല, ചങ്കിടിപ്പാണ്'; കാരണം ചാഹലിന്റെ വീടിന്റെ ചുമരില്‍ തൂങ്ങുന്ന ഈ ചിത്രം പറയും
മുംബൈ: ഇന്ത്യന്‍ യുവതാരങ്ങളില്‍ ഏറ്റവും ശ്രദ്ധേയനാണ് യുസ്‌വേന്ദ്ര ചാഹല്‍. കഴിഞ്ഞ രണ്ട് വര്‍ഷത്തിനിടെ ചാഹല്‍ ഒരുപാട് വളര്‍ന്നിട്ടുണ്ട്. അമിത് മിശ്രയുടെ പകരക്കാരനായി ടീമിന്റെ ലെഗ് സ്പിന്‍ ആശ്രമായി ചാഹല്‍ മാറുകയായിരുന്നു.
ട്വന്റി-20യില്‍ വിരാട് കോഹ്‌ലിയുടെ വിശ്വസ്തനായി ചാഹല്‍ മാറിക്കഴിഞ്ഞു. ഒരിക്കല്‍ അശ്വിനും ധോണിയും തീര്‍ത്ത മാജിക്കാണ് ചാഹലും കോഹ് ലിയും ആവര്‍ത്തിക്കാന്‍ ശ്രമിക്കുന്നത്. ജീവിതത്തിലും കോഹ്‌ലിയും ചാഹലും കട്ട ടീമാണ്. ഇതിന്റെ തെളിവാണ് ചാഹലിന്റെ വീടിന്റെ ചുമരില്‍ തൂങ്ങുന്ന ചിത്രം.
വളരെ ലളിതമായി അലങ്കരിച്ചിരിക്കുന്ന ചാഹലിന്റെ വീടിലുള്ള ഒരേയൊരു താരത്തിന്റെ ചിത്രം വിരാടിന്റേതാണ്. ചാഹലുമൊത്തുള്ളതാണ് ചിത്രം. ബാംഗ്ലൂര്‍ റോയല്‍ ചലഞ്ചേഴ്‌സിന്റെ ജേഴ്‌സിയും ചുമരില്‍ തൂക്കിയിട്ടിട്ടുണ്ട്.
ചാഹലിന്റെ ക്രിക്കറ്റ് കരിയറില്‍ വിരാടിനോട് ഒരുപാട് കടപ്പാടുണ്ട്. അതിനേക്കാള്‍ ചാഹല്‍ കടപ്പെട്ടിരിക്കുന്നത് അച്ഛനോടാണ്. മകന്റെ കഴിവ് കണ്ടെത്തി അവനെ വളര്‍ത്തിയെടുത്തത് അദ്ദേഹമായിരുന്നു.