മുംബൈ: രാജ്യം മുഴുവനുമുള്ള സിനിമാ പ്രേമികള്‍ കാത്തിരിക്കുന്ന ചിത്രമാണ് ബാഹുബലി 2. ചിത്രത്തിന്റെ പോസ്റ്ററുകള്‍ക്കും ടീസറിനും ട്രെയിലറിനുമൊക്കെ ലഭിക്കുന്നത് സമാനതകളില്ലാത്ത സ്വീകരണമാണ്. ചിത്രത്തെ കുറിച്ചുള്ള നുറുങ്ങ് വാര്‍ത്തകള്‍ പോലും സൃഷ്ടിക്കുന്നത് വലിയ കൊടുങ്കാറ്റു തന്നെയാണ്.
ചിത്രത്തിന്റെ ചിത്രീകരണ വിശേഷങ്ങള്‍ രഹസ്യമാക്കി വയ്ക്കുമ്പോഴും ചിത്രത്തിന്റെ അണിയറയിലെ കാഴ്ച്ചകള്‍ ആരാധകര്‍ക്ക് സമ്മാനിക്കുകയാണ് ചിത്രത്തില്‍ വില്ലനായെത്തുന്ന റാണാ ദഗുബതി. നായകന്‍ പ്രഭാസും സംവിധായകന്‍ എസ് എസ് രാജമൗലിയും തമ്മില്‍ സംസാരിച്ച് നില്‍ക്കുന്നതിന്റെ അടക്കമുള്ള ചിത്രങ്ങളാണ് ദഗുബതി പുറത്തു വിട്ടിരിക്കുന്നത്.
ബ്രഹ്മാണ്ഡ സെറ്റില്‍ ഒരുങ്ങുന്ന ബാഹുബലി ദ കണ്‍ക്ലൂഷന്റെ കലാസംവിധായകന്‍ സാബു സിറിലിനേയും ചിത്രങ്ങളില്‍ കാണാം. ചിത്രീകരണ വേള ആസ്വദിച്ച് ചിരിച്ചു കൊണ്ട് സംസാരിക്കുന്ന താരങ്ങളുടെ മുഖങ്ങളാണ് ചിത്രങ്ങളില്‍ നിറഞ്ഞു നില്‍ക്കുന്നത്. രമ്യാകൃഷ്ണന്‍, സത്യരാജ് എന്നിവരുടെയും ചിത്രങ്ങള്‍ പുറത്തുവന്നിട്ടുണ്ട്.
അനുഷ്‌ക ഷെട്ടി, തമന്ന, തുടങ്ങിയവര്‍ അഭിനയിക്കുന്ന ചിത്രം എപ്രില്‍ 28 നാണ് തിയ്യറ്ററുകളിലെത്തുക.
