തിരുവനന്തപുരം: നടി അഹാനക്കെതിരായ വിമര്‍ശനങ്ങളിലും വിവാദങ്ങളിലും പ്രതികരണവുമായി നടനും അഹാനയുടെ പിതാവുമായ കൃഷ്ണകുമാര്‍.താന്‍ എല്ലാം പോസിറ്റീവായാണ് കാണുന്നതെന്നും കൊടുങ്കാറ്റുണ്ടാകുമ്പോള്‍ അതിനെ അതിജീവിക്കണമെന്നും കൃഷ്ണകുമാര്‍ പറഞ്ഞു.
തന്റെ യൂട്യൂബ് ചാനലിലൂടെയായിരുന്നു കൃഷ്ണകുമാറിന്റെ പ്രതികരണം. അതിജീവിക്കുമ്പോള്‍ മാത്രമാണ് കൂടുതല്‍ കരുത്ത് ലഭിക്കുക. എല്ലാവരുടെയും ജീവിതത്തില്‍ കല്ലേറുണ്ടാകും, റോസാപുഷ്പങ്ങള്‍ മാത്രം പോരല്ലോയെന്നും കൃഷ്ണകുമാര്‍ ചോദിച്ചു.
മക്കള്‍ ഓരോരുത്തര്‍ക്കും അവരുടേതായ രീതികളും അഭിപ്രായങ്ങളുമുണ്ടാവാം. വീട്ടില്‍ എല്ലാം വളരെ ലൈറ്റായിട്ടാണ് ഞങ്ങളെടുക്കാറുള്ളത്. അഭിപ്രായ സ്വാതന്ത്ര്യമുള്ള രാജ്യമാണല്ലോ. ഓരോ വ്യക്തിക്കും അഭിപ്രായമുണ്ട്. പക്ഷേ, ഒരാള്‍ പറയുമ്പോള്‍ മാത്രം വിവാദമാകുക. മറ്റു ചിലര്‍ പറയുമ്പോള്‍ സ്വീകാര്യമാവുക എന്നത് ശരിയല്ലല്ലോ. നമുക്കെതിരെ എന്തും വരാം. കൊടുങ്കാറ്റ് വരുമ്പോള്‍ ഒഴിഞ്ഞ് മാറേണ്ട. അതിനെ നമ്മള്‍ അതിജീവിക്കണം – കൃഷ്ണകുമാര്‍ പറഞ്ഞു.
മക്കളുടെ ഇന്‍സ്റ്റഗ്രാം അക്കൗണ്ടുകള്‍ അവരവര്‍ തന്നെയാണ് കൈകാര്യം ചെയ്യുന്നത്. അതിനെ കുറിച്ച് അവര്‍ക്ക് നല്ല ഗ്രാഹ്യമുണ്ട്. ചില സന്ദര്‍ഭങ്ങളില്‍ അവരുടെ സഹായം താന്‍ തേടാറുണ്ടെന്നും കൃഷ്ണകുമാര്‍ പറഞ്ഞു.
മുഖ്യമന്ത്രിയായിരുന്ന സമയത്ത് കരുണാകരനെതിരെ പത്രങ്ങളില്‍ മിക്ക ദിവസങ്ങളിലും കാര്‍ട്ടൂണുകളുണ്ടാവും. അന്ന് ഇതുപോലെ ട്രോളുകളില്ലല്ലോ. ഒരിക്കല്‍ ആരോ അദ്ദേഹത്തോട് ഈ പത്രക്കാരെ നിയന്ത്രിച്ചൂകൂടെ എന്നു ചോദിച്ചു. അന്ന് അദ്ദേഹം ചിരിച്ചു കൊണ്ട് പറഞ്ഞത് ഞാനോര്‍ക്കാറുണ്ട്. എന്നെകുറിച്ച് നല്ലതും മോശവും എഴുതും. പ്രസിദ്ധിയും കുപ്രസിദ്ധിയുമുണ്ടാകും. കു മറച്ചുവെച്ചാല്‍ അത് പ്രസിദ്ധി ആകും. അത്രയേയുള്ളെന്നും കൃഷ്ണകുമാര്‍ പറഞ്ഞു.