ദുല്‍ഖറിന്റെ പിറന്നാള്‍ ആഘോഷമാക്കി സിനിമാലോകം; ആശംസകള്‍ അറിയിച്ച് നിവിനും നസ്രിയയും ഉള്‍പ്പടെയുള്ളവര്‍

നടന്‍ ദുല്‍ഖര്‍ സല്‍മാന്‍ ഇന്ന് പിറന്നാള്‍ ആഘോഷിക്കുകയാണ്. നടന്റെ ജന്മദിനം ആഘോഷിക്കുകയാണ് മലയാള സിനിമാലോകവും. നിവിന്‍ പോളി, പൃഥ്വിരാജ്, കുഞ്ചാക്കോ ബോബന്‍ ഉള്‍പ്പടെ നിരവധിപ്പേരാണ് ദുല്‍ഖറിന് ആശംസയുമായി എത്തിയിരിക്കുന്നത്.

‘ജന്മദിനാശംസകള്‍ സഹോദരാ. സീതാരാമത്തിനും വരാനിരിക്കുന്ന വര്‍ഷങ്ങള്‍ക്കും എല്ലാ ആശംസകളും നിങ്ങള്‍ എന്നും ഉയരത്തില്‍ പറക്കുന്നത് കാണാന്‍ കാത്തിരിക്കുകയാണ് എന്നാണ് പൃഥ്വിരാജ് കുറിച്ചത്. ഒരുമിച്ച് അരങ്ങേറ്റം കുറിച്ച സണ്ണി വെയിനും ദുല്‍ഖറിന് ആശംസകള്‍ അറിയിച്ചിട്ടുണ്ട്.

നിന്റെ വാപ്പച്ചിയുടെ ഒരു കടുത്ത ആരാധകനാണെന്നും നിന്നില്‍ നിന്നും പുതിയ കാര്യങ്ങള്‍ പഠിക്കുകയാണെന്നുമായിരുന്നു കുഞ്ചാക്കോ ബോബന്‍ ഫേസ്ബുക്കിലെഴുതിയ ആശംസ കുറിപ്പില്‍ പറഞ്ഞത്.

‘ഡി.ക്യൂ. ബോയ്, നീ എനിക്ക് ആരാണെന്ന് പറയാന്‍ വാക്കുകളില്ല. നിന്റെ വാപ്പച്ചിയുടെ ഒരു ഫാന്‍ബോയ് ആണ് ഞാന്‍. ഇനി അങ്ങോട്ടും അങ്ങനെ തന്നെയായിരിക്കും. ഒരു വ്യക്തി എന്ന നിലയിലും നടന്‍ എന്ന നിലയിലും അദ്ദേഹത്തില്‍ നിന്നും ഒരുപാട് പഠിച്ചിട്ടുണ്ട്. ഇപ്പോള്‍ നിന്നില്‍ നിന്നും പുതിയ കാര്യങ്ങള്‍ പഠിക്കുകയാണ്. ഒരു സുഹൃത്തെന്ന നിലയില്‍, നല്ല മനുഷ്യന്‍ എന്ന നിലയില്‍, എന്താണ് അല്ലാത്തത്.

സുഹൃത്ബന്ധത്തിലും സിനിമയിലും കുടുംബത്തിലും എനിക്ക് നീ ടോപ്പ് ലിസ്റ്റിലാണ്. പൊളിക്കെടാ. ലോകത്തെവിടെ പോയാലും നീ ആ സ്വാഗ് കൈകാര്യം ചെയ്യുന്നതിനെ ഞാന്‍ ആരാധിക്കുന്നു. നിനക്ക് ജീവിതത്തില്‍ ദൈവം നല്ലത് മാത്രം വരുത്തട്ടെ.

പിറന്നാള്‍ ആശംസകള്‍ ഡി.ക്യൂ. ബോയ്. നിന്റെ സ്വന്തം ചാക്കോ മാഷില്‍ നിന്നും ഒരുപാട് സ്നേഹം. അത്ഭുതപ്പെടുത്തുന്ന ഈ നടന് ന്നാ താന്‍ കേസ് കൊട് ടീം പിറന്നാള്‍ ആശംസകള്‍ നേരുന്നു,’ കുഞ്ചാക്കോ ബോബന്‍ കുറിച്ചു.

ഷൈന്‍ ടോം ചാക്കോ, സൗബിന്‍ ഷാഹിര്‍, രമേശ് പിഷാരടി , കിച്ചാ സുധീപ് അടക്കമുള്ള താരങ്ങളും ദുല്‍ഖറിന് പിറന്നാള്‍ ആശംസകള്‍ നേര്‍ന്നിരുന്നു.

ബാംഗ്ലൂര്‍ ഡെയ്‌സിലെ ചിത്രത്തിനൊപ്പമായിരുന്നു നിവിന്റെ പിറന്നാള്‍ ആശംസകള്‍. നസ്രിയയും ദുല്‍ഖറിന്‍ പിറന്നാള്‍ ആശംസകള്‍ അറിയിച്ച് എത്തിയിട്ടുണ്ട്. ദുല്‍ഖറും ഭാര്യ ആമാലും ഒപ്പം ഫഹദ് ഫാസിലും നില്‍ക്കുന്ന ചിത്രം പങ്കുവെച്ചാണ് നസ്രിയ പിറന്നാള്‍ ആശംസകള്‍ അറിയിച്ചത്.

അതേസമയം ദുല്‍ഖര്‍ സല്‍മാന്‍ നായകനായി എത്തുന്ന ഏറ്റവും പുതിയ ചിത്രം സീതാരാമം ആഗസ്റ്റ് അഞ്ചിനാണ് തിയേറ്ററുകളില്‍ എത്തുന്നത്.

1965ലെ ഇന്‍ഡോ- പാക് യുദ്ധത്തിന്റെ പശ്ചാത്തലത്തില്‍ നടക്കുന്ന കഥയാണ് സീതാരാമം പറയുന്നത്. ഹനു രാഘവപ്പുടിയാണ് ചിത്രം സംവിധാനം ചെയ്യുന്നത്.

സീതാരാമം ഒരു ഹിസ്റ്റോറിക്കല്‍ ഫിക്ഷനും അതേസമയം ഒരു പ്രണയകഥയുമാണെന്ന് ചിത്രത്തിന്റെ സംവിധായകന്‍ ഹനു രാഘവപ്പുടി വ്യക്തമാക്കിയിരുന്നു. ദുല്‍ഖറിനുവേണ്ടി എഴുതപ്പെട്ട കഥാപാത്രമാണ് റാം എന്നും മറ്റൊരു നടനെയും ആലോചിച്ചില്ലെന്നും അദ്ദേഹം നേരത്തെ പറഞ്ഞിരുന്നു. രശ്മിക മന്ദാനയും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. അഫ്രീന്‍ എന്നാണ് രശ്മികയുടെ കഥാപാത്രത്തിന്റെ പേര്.

സ്വപ്ന സിനിമയുടെ ബാനറില്‍ നിര്‍മിച്ച ചിത്രം അവതരിപ്പിക്കുന്നത് വൈജയന്തി മൂവീസ് ആണ്. ദുല്‍ഖറിന്റെ തെലുങ്ക് അരങ്ങേറ്റ ചിത്രമായിരുന്ന മഹാനടിയും നിര്‍മിച്ചത് ഇതേ ബാനര്‍ ആയിരുന്നു.

എഡിറ്റിങ് കോതഗിരി വെങ്കടേശ്വര റാവു, ഛായാഗ്രഹണം പി.എസ്. വിനോദ്, ശ്രേയസ് കൃഷ്ണ, പ്രൊഡക്ഷന്‍ ഡിസൈനര്‍ സുനില്‍ ബാബു. ഹനു രാഘവപുടിക്കൊപ്പം ജയ് കൃഷ്ണയും രാജ്കുമാര്‍ കണ്ടമുഡിയും ചേര്‍ന്നാണ് സംഭാഷണങ്ങള്‍ ഒരുക്കിയിരിക്കുന്നത്.

Content Highlight : The whole Malayalam cinema Industry  birthday wishes for Dulquer Salmaan