സ്പോര്‍ട്സ് ഡെസ്‌ക്1 hour ago
സംഗീതത്തിന് ഭാഷയില്ലെന്ന് പറയാറുണ്ട്. നമ്മള്‍ പലപ്പോഴും ഭാഷ ഏതെന്ന് നോക്കാതെ പാട്ടുകള്‍ ആസ്വദിക്കാറുണ്ട്. അത്തരത്തില്‍ മലയാളികളില്‍ ഇപ്പോള്‍ കെ-പോപ്പിനെ ഇഷ്ടപ്പെടുന്നവര്‍ ഏറെയാണ്. ബി.ടി.എസും ബ്ലാക്പിങ്കും എക്‌സോയും ന്യൂജീന്‍സും തുടങ്ങി നിരവധി കെ-പോപ്പ് ഗ്രൂപ്പുകള്‍ക്ക് ഇന്ന് മലയാളികള്‍ക്കിടയില്‍ ആരാധകരുണ്ട്. എന്നാല്‍ ഇപ്പോള്‍ സൗത്ത് കൊറിയക്കാര്‍ ഒരു മലയാളം പാട്ടും പാടി നടക്കുകയാണെന്ന് പറഞ്ഞാല്‍ വിശ്വസിക്കാനാകുമോ?
മലയാളികളുടെ ‘തിത്തിത്താരാ’ എന്ന പാട്ടാണ് കൊറിയക്കാര്‍ക്കിടയില്‍ ഇപ്പോള്‍ ട്രെന്‍ഡിങ്. അതിന് കാരണം ഒരു കെ-പോപ്പ് ഗായകനും. ഇന്ത്യന്‍ റിയാലിറ്റി ഷോ ആയ ബിഗ് ബോസിലൂടെ ഇന്ത്യക്കാര്‍ക്ക് പരിചിതനായ അൗറ(Aoora)യാണ് ആ ഗായകന്‍. ഹിന്ദി ബിഗ് ബോസ് 17ല്‍ വൈല്‍ഡ്കാര്‍ഡ് എന്‍ട്രിയായി എത്തിയ കെ-പോപ്പ് ഗായകനായിരുന്നു അൗറ എന്നറിയപ്പെടുന്ന പാര്‍ക്ക് മിന്‍-ജുന്‍.
ഇന്ത്യന്‍ സംസ്‌ക്കാരത്തോട് തനിക്ക് ഏറെ ഇഷ്ടമാണെന്ന് അൗറ തന്നെ പലപ്പോഴും തുറന്നു പറഞ്ഞിരുന്നു. അദ്ദേഹത്തിന്റെ ഏറ്റവും പുതിയ ഗാനമാണ് ‘തിത്തിത്താരാ’ (കുട്ടനാടന്‍ ഡ്രീംസ്). ജൂലൈ 29നായിരുന്നു ഈ ഗാനം പുറത്തിറങ്ങിയത്. യൂട്യൂബില്‍ 2.3മില്യണില്‍ അധികം കാഴ്ചക്കാരെയാണ് ആ മ്യൂസിക്ക് വീഡിയോ നേടിയത്.
കുട്ടനാടന്‍ പുഞ്ചയിലെ എന്ന് തുടങ്ങുന്ന മലയാളികളുടെ പാട്ട് ഒരു കൊറിയക്കാരന്‍ പാടിയതോടെ വലിയ ശ്രദ്ധനേടി. അൗറ ഈയിടെ കൊറിയയിലെ ഒരു സ്‌റ്റേജില്‍ ഈ പാട്ട് പാടുകയും അത് വൈറലാകുകയും ചെയ്തിരുന്നു. ആ വീഡിയോക്ക് താഴെ നിരവധി കെ-പോപ്പ് ആരാധകരാണ് കമന്റുമായി എത്തിയത്.
View this post on Instagram
കൊറിയയിലെ തന്റെ സുഹൃത്തായ മെല്ലോ കിച്ചന്റെയും ഇന്ത്യന്‍ ഗായികയായ സിരീഷ ഭാഗവതുലയുടെയും സഹായത്തോടെയാണ് അൗറ ഈ ഗാനം ആലപിച്ചത്. ‘തിത്തിത്താരാ’യുടെ വീഡിയോ ഷൂട്ട് ചെയ്യാനായി അൗറ 2024 മെയ് മാസത്തില്‍ കേരളത്തില്‍ എത്തിയിരുന്നു. ഫോര്‍ട്ട് കൊച്ചിയിലാണ് ഭൂരിഭാഗവും ഷൂട്ട് ചെയ്തത്. ഏകദേശം ഒന്നര മാസത്തോളം സമയമെടുത്താണ് താന്‍ മലയാളം പഠിച്ചതെന്ന് അൗറ ഈയിടെ ഒരു അഭിമുഖത്തില്‍ പറഞ്ഞിരുന്നു.
View this post on Instagram
Content Highlight: The Thi Thi Thara Song Became A Trend In South Korea Through The K-pop Singer Aoora
