മുംബൈ: തെന്നിന്ത്യയില്‍ നിന്നും ബോളിവുഡിലേക്ക് ചുവടുമാറ്റി കൊണ്ടിരിക്കുന്ന തമന്നയുടേയും പാക് ക്രിക്കറ്റ് താരം അബ്ദുള്‍ റസാക്കിന്റേയും ചിത്രമാണ് ഇപ്പോള്‍ സോഷ്യല്‍ മീഡിയയിലെ ചര്‍ച്ചാ വിഷയം. സ്വര്‍ണാഭാരണങ്ങള്‍ പരിശോധിക്കുന്ന ഇരുവരുടേയും ചിത്രമാണ് വൈറലായിരിക്കുന്നത്.
തമന്നയും റസാഖും വിവാഹിതരാകുന്നുവെന്നായിരുന്നു മിക്ക ഗോസിപ്പ് കോളങ്ങളും പ്രചരിപ്പിച്ചത്. അഭ്യൂഹങ്ങള്‍ക്ക് വിരാമമിട്ട് ചിത്രത്തിന് പിന്നിലെ യാഥാര്‍ത്ഥ്യം പുറത്ത് വന്നിരിക്കുകയാണ്.
ഇരുവരും വിവാഹിതരാകുന്നില്ലെന്ന് മാത്രമല്ല ഇപ്പോള്‍ പ്രചരിക്കുന്ന ചിത്രം വളരെ പഴയ ചിത്രമാണ്. പണ്ട് ഒരു ജ്വല്ലറിയുടെ ഉദ്ഘാടനത്തിന് ഇരുവരും എത്തിയപ്പോള്‍ പകര്‍ത്തിയ ചിത്രമാണിത്.
പാക് താരമായ റസാഖിനെ വിവാഹം ചെയ്യുന്നുവെന്ന് പറഞ്ഞ് തമന്നയ്‌ക്കെതിരെ നിരവധി ആരാധകര്‍ രംഗത്ത് വന്നു കൊണ്ടിരിക്കെയാണ് ചിത്രത്തിന് പിന്നിലെ രഹസ്യം പുറത്തു വന്നിരിക്കുന്നത്. മറ്റൊരു സത്യമെന്തെന്നാല്‍ റസാഖ് നേരത്തെ തന്നെ വിവാഹിതനാണെന്നതാണ്.
ഇത്തരത്തില്‍ വ്യാജ വിവാഹ വാര്‍ത്തയുടെ പേരില്‍ തമന്ന സോഷ്യല്‍ മീഡിയയുടെ ഗോസിപ്പുകളില്‍ നിറയുന്നത് ഇതാദ്യമായല്ല. നേരത്തെ എഞ്ചിനീയറായ യുവാവുമായി തമന്നയുടെ വിവാഹം ഉറപ്പിച്ചതായും വാര്‍ത്തകള്‍ പരന്നിരുന്നു. എന്നാല്‍ പിന്നീട് ഇത് വെറും ഗോസിപ്പ് മാത്രമാണെന്ന് വ്യക്തമായിരുന്നു.