ഐ.പി.എല്ലില്‍ ഏറ്റവും നിര്‍ണായകമായ മത്സരത്തിനാണ് രാജസ്ഥാന്‍ റോയല്‍സ് കളത്തിലിറങ്ങുന്നത്. ഇന്ന് കൊല്‍ക്കത്ത നൈറ്റ് റൈഡേഴ്‌സിനെതിരെ പരാജയപ്പെട്ടാല്‍ തങ്ങളുടെ ഐപി.എല്‍ യാത്രയ്ക്ക് തിരശീല വീഴുമെന്ന ഉത്തമ ബോധ്യവും സഞ്ജുവിനും സംഘത്തിനുമുണ്ടാകും.
സണ്‍റൈസേഴ്‌സ് ഹൈദരാബാദിനെതിരായ മത്സരത്തില്‍ മികച്ച ടോട്ടല്‍ പടുത്തുയര്‍ത്തിയ ശേഷമായിരുന്നു രാജസ്ഥാന്റെ പരാജയം. എന്നാല്‍ മത്സരത്തില്‍ ജോസ് ബട്‌ലറും സഞ്ജു സാംസണും മികച്ച സ്‌കോര്‍ സ്വന്തമാക്കി ഫോമിലേക്ക് മടങ്ങിയെത്തിയത് ആരാധകരെ ആവേശത്തിലാക്കുന്നുണ്ട്. മികച്ച ഫോമില്‍ തുടരുന്ന ജെയ്‌സ്വാളിനൊപ്പം ബട്‌ലറും സഞ്ജുവും ഫോമിലേക്കുയര്‍ന്നാല്‍ ബാറ്റിങ്ങിന് അനുകൂലമായ പിച്ചില്‍ രാജസ്ഥാന്‍ റണ്‍ മഴ പെയ്യിക്കുമെന്നുറപ്പാണ്.
എന്നാല്‍ സഞ്ജുവിനെതിരെ കൃത്യമായ പ്ലാനിങ്ങുമായിട്ടായിരിക്കും നിതീഷ് റാണ തന്റെ ടീമിനെ കളത്തില്‍ വിന്യസിക്കുക. ഇതില്‍ പ്രധാനം സഞ്ജുവിനെ സ്‌കോര്‍ ചെയ്യാതെ തടഞ്ഞു നിര്‍ത്തുക എന്നതുതന്നെയായിരിക്കും. നിതീഷ് ഈ ചുമതലയേല്‍പ്പിക്കുക സുനില്‍ നരെയ്‌നെയായിരിക്കും.
നരെയ്‌നെതിരെ മികച്ച റെക്കോഡല്ല സഞ്ജുവിനുള്ളത്. ടി-20യില്‍ 12 തവണ ഇരുവരും പരസ്പരം ഏറ്റുമുട്ടിയപ്പോള്‍ മൂന്ന് തവണ സഞ്ജു നരെയ്‌ന്റെ കൈകൊണ്ട് പുറത്തായിട്ടുണ്ട്. എന്നാല്‍ ഇതിനേക്കാള്‍ ഭയപ്പെടുത്തുന്ന വസ്തുതയെന്തെന്നാല്‍ തന്റെ പന്തുകളില്‍ സഞ്ജുവിനെ സ്‌കോര്‍ ചെയ്യാന്‍ നരെയ്ന്‍ അനുവദിക്കാറില്ല എന്നതാണ്.
നരെയ്‌നെതിരെ കളിച്ച 78 പന്തില്‍ വെറും 64 റണ്‍സ് മാത്രമാണ് സഞ്ജുവിന് നേടാന്‍ സാധിച്ചത്. 82.05 എന്ന മോശം സ്‌ട്രൈക്ക് റേറ്റാണ് നരെയ്‌നെതിരെ സഞ്ജുവിനുള്ളത്. സഞ്ജുവിന്റെ ഈ ഡിസ് അഡ്വാന്റേജ് മുതലാക്കാന്‍ തന്നെയായിരിക്കും നിതീഷും നരെയ്‌നും ശ്രമിക്കുക.
എന്നാല്‍ ഈ സീസണില്‍ നരെയ്ന്‍ കാര്യമായ ഫോമിലല്ല എന്നതും ശ്രദ്ധിക്കേണ്ടതാണ്. 11 മത്സരത്തില്‍ നിന്നും 327 റണ്‍സ് വഴങ്ങി ഏഴ് വിക്കറ്റാണ് നരെയ്ന്‍ തന്റെ പേരിലാക്കിയത്. 46.71 എന്ന ആവറേജിലും 8.60 എന്ന എക്കോണമിയിലുമാണ് താരം പന്തെറിയുന്നത്. നിലവില്‍ വിക്കറ്റ് വേട്ടക്കാരുടെ പട്ടികയില്‍ 35ാം സ്ഥാനത്താണ് നരെയ്ന്‍.
നരെയ്‌ന്റെ ഈ തപ്പിത്തടയല്‍ മുതലാക്കാന്‍ സാധിച്ചാല്‍ സഞ്ജുവിന് സ്വയവും ടീമിനും വമ്പന്‍ നേട്ടമായിരിക്കും ഈഡന്‍ ഗാര്‍ഡന്‍സില്‍ നേടാന്‍ സാധിക്കുക.
Content Highlight: The Rajasthan Royals -Kolkata Knight Riders match will witness a battle between Sanju Samson and Sunil Narine.