മാര്‍വലിന്റെ ചരിത്രത്തിലെ ഏറ്റവും മോശം കളക്ഷനുമായി ദ മാര്‍വല്‍സ്
എന്റര്‍ടെയിന്‍മെന്റ് ഡെസ്‌ക്
Wednesday, 15th November 2023, 4:45 pm
മാര്‍വല്‍ ഫ്രാഞ്ചൈസിയുടെ 15 വര്‍ഷത്തെ ചരിത്രത്തില്‍ ആദ്യ ആഴ്ച്ചയില്‍ ഏറ്റവും കുറവ് കളക്ഷന്‍ നേടുന്ന സിനിമയായി ദ മാര്‍വല്‍സ്. ആദ്യ ആഴ്ച്ചയില്‍ വെറും 47 മില്യണ്‍ ഡോളര്‍ മാത്രമാണ് ദ മാര്‍വല്‍സ് നേടിയത്. കഴിഞ്ഞ ആഴ്ച്ചയായിരുന്നു സിനിമ തിയേറ്ററില്‍ എത്തിയിരുന്നത്.
മാര്‍വല്‍ സിനിമകളില്‍ ഇത്രനാള്‍ ആദ്യ ആഴ്ച്ചയില്‍ ഏറ്റവും കുറവ് കളക്ഷന്‍ നേടിയ സിനിമ ദി ഇന്‍ക്രെഡിബിള്‍ ഹള്‍ക്ക് ആയിരുന്നു. ദ മാര്‍വല്‍സിന്റെ ആദ്യ ആഴ്ച്ചയിലെ കളക്ഷന്‍ ദി ഇന്‍ക്രെഡിബിള്‍ ഹള്‍ക്കിനേക്കാള്‍ കുറവാണെന്നാണ് റിപ്പോര്‍ട്ടുകള്‍.
ആദ്യകാല മാര്‍വല്‍ സിനിമാറ്റിക് യൂണിവേഴ്‌സിലെ (എം.സി.യു) ചിത്രങ്ങളിലൊന്നായ ദി ഇന്‍ക്രെഡിബിള്‍ ഹള്‍ക്ക് ഫ്രാഞ്ചൈസി ആരംഭിച്ച അതേവര്‍ഷം (2008ല്‍) തന്നെയായിരുന്നു റിലീസ് ചെയ്തിരുന്നത്. ആദ്യ ആഴ്ച്ചയില്‍ ആ സിനിമ 55 മില്യണ്‍ ഡോളറായിരുന്നു നേടിയത്.
എന്തുകൊണ്ടാകും ദ മാര്‍വല്‍സിന്റെ ആദ്യ ആഴ്ച്ചയിലെ കളക്ഷന്‍ ഇത്രയും മോശമായത് എന്ന ചോദ്യം ഉയരുന്നുണ്ട്. ബോക്സ് ഓഫീസിലെ സൂപ്പര്‍ഹീറോ ചിത്രങ്ങളുടെ കളക്ഷന്‍ പ്രതീക്ഷിച്ച അത്രയും ഉയരാത്തത് സൂപ്പര്‍ഹീറോ ചിത്രങ്ങളോടുള്ള പ്രേക്ഷകരുടെ താത്പര്യം കുറഞ്ഞതാണോ എന്ന ചോദ്യങ്ങളും ഉയര്‍ത്തുന്നു.